காவிரி நதி நீர் பங்கீடு தொடர்பான விவகாரம் தமிழ்நாடு மற்றும் கர்நாடகா மாநிலங்களுக்கு இடையே பல தசாப்தங்களாக நீடித்து வரும் ஒரு முக்கிய சிக்கலாகவே இருந்து வருகிறது. உச்ச நீதிமன்றத்தின் 2018 ஆம் ஆண்டு தீர்ப்பின் அடிப்படையில் காவிரி நீர் மேலாண்மை ஆணையம் மற்றும் காவிரி நீர் ஒழுங்காற்று குழு ஆகியவை இந்தப் பங்கீட்டை கண்காணித்து உத்தரவுகளை பிறப்பித்து வருகின்றன. 2026 ஆம் ஆண்டு பருவமழை காலத்தில் எல் நினோ விளைவால் கர்நாடகாவில் மழைப்பொழிவு கணிசமாகக் குறைந்தது.

காவிரி படுகையில் உள்ள கிருஷ்ணராஜ சாகர், கபினி, ஹாரங்கி மற்றும் ஹேமாவதி ஆகிய நான்கு முக்கிய அணைகளிலும் நீர்வரத்து சராசரியை விட பெருமளவு குறைந்து காணப்பட்டது. குறிப்பாக கே.ஆர்.எஸ். அணையின் நீர்மட்டம் மிகக் குறைந்த அளவிலேயே இருந்தது. இதனால் கர்நாடக அரசு தனது மாநிலத்தின் குடிநீர் தேவையையும் விவசாயத் தேவையையும் முன்னிறுத்தி தமிழ்நாட்டிற்கு நீர் திறப்பதில் தயக்கம் காட்டியது.ஜூலை மாத இறுதியில் காவிரி நீர் ஒழுங்காற்று குழு கூடி நிலைமையை ஆய்வு செய்தது.

அப்போது கர்நாடகாவில் நீர்வரத்து குறைவாக இருந்தாலும் தமிழ்நாட்டின் தேவையை கருத்தில் கொண்டு ஜூலை 29 முதல் 15 நாட்களுக்கு தினமும் வினாடிக்கு 3,500 கன அடி நீர் பிலிகுண்டுலு எல்லைப் பகுதியில் கிடைக்கும் வகையில் திறக்க வேண்டும் என உத்தரவிட்டது. இந்த உத்தரவுக்கு கர்நாடக அரசு கடும் எதிர்ப்பு தெரிவித்தது. மாநிலத்தில் வறட்சி நிலவுவதாகவும், அணைகளில் நீர் இருப்பு குறைவாக இருப்பதால் குடிநீர் தேவைக்கே போதுமான அளவு இல்லை என்றும் வாதிட்டது. கே.ஆர்.எஸ். அணையில் இருந்து நீர் திறக்கப்பட்டால் அது தங்களது விவசாயிகளுக்கு பெரும் பாதிப்பை ஏற்படுத்தும் என அரசு தரப்பில் தெரிவிக்கப்பட்டது.

இதையும் படிங்க: காவிரி சர்ச்சைக்கு நடுவே கபினியில் நீர் திறப்பு..!! தமிழகத்திற்கு நிம்மதி..!!

இந்த உத்தரவை எதிர்த்து காவிரி நீர் மேலாண்மை ஆணையத்தில் மேல்முறையீடு செய்யப்பட்டது. ஆனால் ஆணையம் ஒழுங்காற்று குழுவின் உத்தரவை உறுதி செய்து கர்நாடகாவை நீர் திறக்கும்படி அறிவுறுத்தியது.இந்த உத்தரவுக்குப் பிறகு கர்நாடகாவில் விவசாயிகள் மற்றும் பல்வேறு அமைப்புகள் கடும் போராட்டங்களை நடத்தின. கே.ஆர்.எஸ். அணை பகுதியில் போராட்டங்கள் தீவிரமடைந்தன. கர்நாடக அரசு அனைத்துக் கட்சிக் கூட்டத்தைக் கூட்டி தனது நிலைப்பாட்டை வலுப்படுத்தியது.

மேகதாது அணைத் திட்டமே இந்தப் பிரச்சினைக்கு நிரந்தரத் தீர்வு என்றும் அதற்கு ஆதரவு திரட்டப்பட்டது. ஆரம்பத்தில் நீர் திறப்பதில் முரண்டு பிடித்த கர்நாடகா, பின்னர் காவிரி படுகையில் ஏற்பட்ட கனமழையால் நிலைமை மாறியது. கபினி அணை வேகமாக நிரம்பத் தொடங்கியது. கே.ஆர்.எஸ். அணைக்கும் நீர்வரத்து அதிகரித்தது. இதனால் அணைகளின் பாதுகாப்பு கருதியும் உத்தரவுகளுக்கு இணங்கவும் நீர் திறக்கப்பட்டது. கே ஆர் எஸ் அணையில் இருந்து 3000 கன அடி நீர் திறக்கப்பட்டுள்ளது. 

இதையும் படிங்க: சூடுபிடிக்கும் மேகதாது பிரச்சனை..! மாணிக்கம் தாகூர் ஒத்திவைப்பு நோட்டீஸ்... மத்திய அரசுக்கு அழுத்தம்..!!