சென்னை: தமிழக சட்டமன்றத் தேர்தலில் பாஜக முன்னாள் மாநிலத் தலைவர் கே. அண்ணாமலை போட்டியிடப் போவதில்லை என்ற தகவல் அவரது ஆதரவாளர்கள் மத்தியில் பெரும் விரக்தியையும், ஏமாற்றத்தையும் ஏற்படுத்தியுள்ளது.
தேர்தல் நெருங்கும் நிலையில் பெரும்பாலான கட்சிகள் வேட்பாளர்களை அறிவித்து தீவிர பிரசாரத்தில் ஈடுபட்டுள்ளன. ஆனால் பாஜக மற்றும் காங்கிரஸ் மட்டும் இன்னும் வேட்பாளர் தேர்விலேயே சிக்கலில் சிக்கித் தவிக்கின்றன. இரு கட்சிகளிலும் உட்கட்சி மோதல்களே இந்த இழுபறிக்கு முக்கிய காரணமாக உள்ளன.
அண்ணாமலை பாஜக மாநிலத் தலைவராக இருந்தபோது கட்சிக்குள் பெரும் எழுச்சியை ஏற்படுத்தினார். இதனால் தனக்கு முக்கிய பொறுப்பு கிடைக்கும் என்று அவர் எதிர்பார்த்தார். ஆனால் அதிமுக கூட்டணிக்காக அவரை மாநிலத் தலைவர் பதவியிலிருந்து நீக்கியதால் அவர் மனம் நொந்தார். அதன் பிறகு எந்த தேசியப் பொறுப்பும் அவருக்கு வழங்கப்படவில்லை.
இதையும் படிங்க: கோவை வடக்கா? மொடக்குறிச்சியா? அண்ணாமலை களமிறங்குவது எங்கே? பாஜக வட்டாரங்களில் கசிந்த தகவல்!
தேர்தல் நெருங்கியதும் தனக்கும் தன் ஆதரவாளர்களுக்கும் சீட் கிடைக்கும் என்று நம்பிய அண்ணாமலை, ஓரங்கட்டப்படுவதாக உணர்ந்தார். தன் தந்தையின் உடல்நிலை காரணமாக தேர்தல் பொறுப்புகளை ஏற்கப் போவதில்லை என்று அவர் தெரிவித்தார். இதைச் சாக்காக வைத்து கட்சியின் சீனியர்கள் அவரை தேர்தல் பணிகளிலிருந்து விலக்கி வைத்ததாகக் கூறப்படுகிறது.
அண்ணாமலையின் ஆதரவாளர்கள் கூறுகையில், “கட்சியில் பெரும் எழுச்சியை ஏற்படுத்திய அவரை நிகழ்ச்சிகளில் கூட முக்கியத்துவம் கொடுக்காமல் ஓரங்கட்டுகின்றனர். கோவையில் சீட் எதிர்பார்த்த அவருக்கு மொடக்குறிச்சி தொகுதியை பரிந்துரைத்தனர். ஆனால் அங்கும் உள்ளடி வேலை நடப்பதாகத் தெரிந்ததால் அவர் போட்டியிட விருப்பமில்லை என்று உறுதியாகக் கூறியுள்ளார்” என்றனர்.
சமீபத்தில் சில நண்பர்களுக்கு அனுப்பிய அலைபேசி செய்தியிலும் அண்ணாமலை “நான் இந்தத் தேர்தலில் போட்டியிடப் போவதில்லை” என்று தெளிவாகத் தெரிவித்துள்ளார். இதனால் அவரது ஆதரவாளர்கள் “அண்ணாமலை இல்லாத தேர்தலில் நாங்களும் தீவிரமாகப் பணியாற்றத் தேவையில்லை” என்ற மனநிலைக்கு வந்துள்ளனர்.
அண்ணாமலையின் இந்த முடிவு பாஜகவுக்குள் புதிய குழப்பத்தை ஏற்படுத்தியுள்ளது. அவரது செல்வாக்கு அதிகம் உள்ள இளைஞர் பிரிவினரிடையே ஏமாற்றம் அதிகரித்து வருகிறது. தமிழக பாஜகவின் தேர்தல் உத்தியில் இந்த உள் பிரச்னை பெரிய தாக்கத்தை ஏற்படுத்தும் என்று அரசியல் வட்டாரங்கள் கருதுகின்றன.
இதையும் படிங்க: அஜித், முருகன் பாடலை பாடி, அசத்திய பீகார் பாஜக எம்.எல்.ஏ!! தமிழில் பாடி வாக்குசேகரிக்க தமிழகம் வருகை!!