தமிழக அரசியலில் ஆட்சி மாற்றத்திற்குப் பிறகு எதிர்க்கட்சிகளுக்கும் ஆளுங்கட்சிக்கும் இடையிலான மோதல்கள் தொடர்ந்து தீவிரமடைந்து வருகின்றன. இந்தச் சூழலில் அமைச்சர் சி.டி.ஆர். நிர்மல் குமார் அண்ணா அறிவாலயம் குறித்து வெளியிட்ட கருத்துக்கு திமுக நாடாளுமன்ற உறுப்பினர் ஆ. ராசா கடும் கண்டனம் தெரிவித்துள்ளார். அவரது பதிலடி அரசியல் வட்டாரங்களில் பெரும் விவாதத்தை ஏற்படுத்தியுள்ளது.

மதுரையில் நடைபெற்ற நிகழ்ச்சியில் அமைச்சர் நிர்மல் குமார் பேசும்போது, முதலமைச்சர் விஜய் திமுகவை முற்றிலும் ஒழித்துவிட்டதாகக் கூறினார். இனி அண்ணா அறிவாலயத்திற்கு வெள்ளை அடித்துவிட்டு வாடகைக்கு விட்டுவிட்டு, திமுகவினர் வேறு வேலைகளைப் பார்க்கச் சென்றுவிடுவார்கள் என்று அவர் தெரிவித்தார். இந்தக் கருத்தை ஆ. ராசா கடுமையாக எதிர்த்தார். காருக்கு தேசியக்கொடி வந்துவிட்ட காரணத்தால் அறிவாலயத்தை வாடகைக்கு விடலாம் என சில தறுதலை அமைச்சர்கள் பேசுவதாக அவர் குறிப்பிட்டார்.

அதிகாரத்தின் போதையில் இத்தகைய அவமதிப்புக் கருத்துக்களை வெளியிடுவது தமிழகத்தின் அரசியல் மரபையும் வரலாற்றையும் புறக்கணிப்பதாகும் என்று அவர் வலியுறுத்தினார்.ஆ. ராசா தொடர்ந்து பேசும்போது, பெரியாரும் அண்ணாவும் கலைஞரும் அரசியலில் கிரகப்பிரவேசம் செய்த பிறகுதான் தமிழர்கள் தங்கள் வீடுகளுக்கு வெள்ளை அடித்தனர் என்று நினைவூட்டினார். திராவிட இயக்கத்தின் தலைவர்கள் தமிழர்களுக்கு சுயமரியாதையையும் சமூக விழிப்புணர்வையும் ஏற்படுத்தியதன் விளைவாகவே மக்கள் தங்கள் வாழ்க்கைத் தரத்தை உயர்த்தினர் என்பதை அவர் சுட்டிக்காட்டினார். அண்ணா அறிவாலயம் என்பது வெறும் கட்டிடம் அல்ல, திராவிட இயக்கத்தின் வரலாற்றுச் சின்னமும் தொண்டர்களின் உணர்வுகளின் அடையாளமுமாகும்.

இதையும் படிங்க: மின்துறை முறைகேடு.! செந்தில் பாலாஜி vs நிர்மல் குமார்..!! பேரவையில் பரபரப்பு விவாதம்.!

அதை வாடகைக்கு விடும் நிலையைப் பற்றிப் பேசுவது கட்சியின் வேர்களையும் மக்களின் நம்பிக்கையையும் அவமதிப்பதாகும் என்று அவர் கண்டனம் தெரிவித்தார்.மேலும், தமிழ்நாட்டில் உள்ள தறுதலைக் கூட்டத்தை விரட்டுவதற்கு எல்லா முயற்சிகளையும் எடுப்போம் என்று ஆ. ராசா உறுதியளித்தார். அனுபவமற்றவர்களும் அரசியல் மரபைப் புரிந்துகொள்ளாதவர்களும் ஆட்சிப் பொறுப்பில் அமர்ந்து இத்தகைய கருத்துக்களை வெளியிடுவது மக்களுக்கு ஏமாற்றத்தை ஏற்படுத்தும் என்று அவர் எச்சரித்தார். திமுகவின் கொள்கைகளையும் திராவிட இயக்கத்தின் பாரம்பரியத்தையும் பாதுகாக்கும் வகையில் தொடர்ந்து போராடுவோம் என்றும் அவர் தெரிவித்தார்.

இதையும் படிங்க: வார்த்தைக்கு வார்த்தை ‘ஜெயலலிதா’... சசிரேகாவால் டென்ஷன் ஆன தவெக... செங்குன்றத்தில் பரபரப்பு...!