ஜப்பானில் நடைபெற்று வரும் 20-வது ஆசிய விளையாட்டுப் போட்டிகளில், ஸ்குவாஷ் பெண்கள் குழுப் பிரிவில் வெண்கலப் பதக்கம் வென்று தேசத்திற்குப் பெருமை சேர்த்துள்ள இந்திய அணிக்கும், அவ்வணியில் முத்திரை பதித்துள்ள தமிழ்நாட்டின் நட்சத்திர வீராங்கனைகள் ஜோஷ்னா சின்னப்பா மற்றும் ஷமீனா ரியாஸ் ஆகியோருக்கு தமிழ்நாடு அரசு சார்பில் தலா ரூ.30 லட்சம் உயரிய ஊக்கத்தொகை வழங்கப்படும் என்று முதலமைச்சர் விஜய் அதிரடியாக அறிவித்துள்ளார்.

ஜப்பான் மண்ணில் உலகத்தரம் வாய்ந்த பல்வேறு நாடுகளின் முன்னணி வீராங்கனைகள் களமிறங்கியுள்ள 20-வது ஆசிய விளையாட்டுப் போட்டிகள் விறுவிறுப்பாக நடைபெற்று வருகின்றன. இதில் ஸ்குவாஷ் பெண்கள் குழுப் பிரிவுக்கான போட்டியில் தொடக்கம் முதலே ஆக்ரோஷமான ஆட்டத்தை வெளிப்படுத்திய இந்திய அணி, அரையிறுதி வரை முன்னேறி வரலாற்றுச் சிறப்புமிக்க வெண்கலப் பதக்கத்தைத் தட்டிச் சென்று நாட்டுக்குப் பெருமை தேடித்தந்துள்ளது. இவ்வணியில் தமிழ்நாட்டின் அனுபவமிக்க முன்னணி வீராங்கனை ஜோஷ்னா சின்னப்பா மற்றும் இளம் நம்பிக்கை நட்சத்திரம் ஷமீனா ரியாஸ் ஆகியோர் அபாரமாக விளையாடி அணியின் பதக்க வெற்றிக்கு மிக முக்கியத் தூண்களாகத் திகழ்ந்துள்ளனர்.

தமிழ்நாட்டு வீராங்கனைகளின் இந்த மகத்தான சர்வதேச சாதனையைப் பாராட்டித் தமிழ்நாடு முதலமைச்சர் அலுவலகம் வெளியிட்டுள்ள அதிகாரப்பூர்வ அறிவிப்பில், ஜப்பானில் நடைபெற்று வரும் 20-வது ஆசிய விளையாட்டுப் போட்டிகளில், ஸ்குவாஷ் பெண்கள் குழுப் பிரிவில் வெண்கலப் பதக்கம் வென்று சாதனை படைத்துள்ள இந்திய அணிக்கும், அவ்வணியில் இடம்பெற்றுள்ள தமிழ்நாட்டைச் சேர்ந்த ஸ்குவாஷ் வீராங்கனைகள் ஜோஷ்னா சின்னப்பா மற்றும் ஷமீனா ரியாஸ் ஆகியோருக்கும் எனது மனமார்ந்த பாராட்டுகளையும், நல்வாழ்த்துகளையும் தெரிவித்துக் கொள்கிறேன் என்று முதல்வர் குறிப்பிட்டுள்ளார்.

இதையும் படிங்க: ஆசிய பேட்மிண்டனில் வெண்கலம் வென்ற ஹரிஹரனுக்கு ₹30 லட்சம் ஊக்கத்தொகை! முதலமைச்சர் விஜய் வாழ்த்து!

அவர்களின் உழைப்பைக் கௌரவிக்கும் விதமாகப் பேசிய அவர், வீராங்கனைகளின் இச்சாதனையைப் பாராட்டும் வகையில், தமிழ்நாடு அரசு சார்பில் தலா ரூ.30 இலட்சம் உயரிய ஊக்கத்தொகை வழங்கப்படும் என்று அறிவித்துள்ளார். மேலும், அவர்களது அசாத்திய திறமை, அசைக்க முடியாத தன்னம்பிக்கை மற்றும் தொடர் விடாமுயற்சி ஆகியவற்றால் எட்டப்பட்டுள்ள இந்த மாபெரும் வெற்றி, சர்வதேச அரங்கில் தமிழ்நாட்டின் விளையாட்டுத் திறனுக்கு மேலும் வலுசேர்த்துள்ளது" எனப் பெருமிதத்துடன் தெரிவித்துள்ளார்.

இறுதியாக, இவர்களின் இந்த அரிய வெற்றி விளையாட்டுத் துறையில் தடம்பதிக்கத் துடிக்கும் பல்லாயிரக்கணக்கான தமிழக இளைஞர்கள் மற்றும் மகளிருக்குச் சிறந்த உத்வேகத்தை அளிக்கும்; எதிர்காலத்திலும் அவர்கள் மேலும் பல உலகளாவிய வெற்றிகளைப் பெற்று தமிழ்நாடு மற்றும் இந்தியாவின் புகழை உலக அரங்கில் உயர்த்திப் பிடிக்க வேண்டும் என்று முதலமைச்சர் விஜய் வாழ்த்து தெரிவித்துள்ளார்.

இதையும் படிங்க: ஒரே நாளில் 2 பதக்கங்கள் வென்று தமிழக வீராங்கனை இளவேனில் வாலறிவன் சாதனை!