சென்னை: தமிழக அரசியலில் புதிய அணி மாற்றம் உருவாகும் என எதிர்பார்க்கப்படும் நிலையில், பா.ஜ.க.வுடன் நெருக்கம் காட்டுவதில் தி.மு.க. மற்றும் த.வெ.க. ஆகிய இரு கட்சிகளும் தீவிர ஆர்வம் காட்டி வருகின்றன. வரும் ஆகஸ்ட் மாதம் இந்த அரசியல் மாற்றங்கள் தெளிவாகும் என்று கூறப்படுகிறது.

சட்டசபைத் தேர்தலுக்குப் பிறகு தி.மு.க. கூட்டணியில் இருந்த காங்கிரஸ், விடுதலை சிறுத்தைகள், முஸ்லிம் லீக் உள்ளிட்ட கட்சிகள் வெளியேறி த.வெ.க. அரசுக்கு ஆதரவு அளித்துள்ளன. ம.தி.மு.க. இன்று தனது வெளியேற்ற முடிவை அதிகாரப்பூர்வமாக அறிவிக்க உள்ளது. இதனால் த.வெ.க. அரசுக்கு மத்திய அரசின் ஆதரவு மிகவும் தேவைப்படுகிறது. அதனால்தான் முதல்வர் விஜய், “மத்திய அரசுடன் மோதல் போக்கை கடைப்பிடிக்க மாட்டோம்” என தெளிவாக அறிவித்துள்ளார்.

இந்த நெருக்கத்தை வலுப்படுத்தும் வகையில் ஆகஸ்ட் 4-ஆம் தேதி டெல்லியில் ம.தி.மு.க. பொதுச் செயலர் வைகோவின் புத்தக வெளியீட்டு விழா நடைபெற உள்ளது. வைகோவின் பார்லிமெண்ட் உரைகளை தொகுத்த நூலை துணை ஜனாதிபதி சி.பி. ராதாகிருஷ்ணன் வெளியிட, முதல்வர் விஜய் பெற்றுக் கொள்ள உள்ளார். இந்த நிகழ்ச்சி பா.ஜ.க. - த.வெ.க. இடையேயான உறவை பலப்படுத்தும் முயற்சியாக பார்க்கப்படுகிறது.

இதையும் படிங்க: முதல்வர் விஜய்க்கு எதிராக காவிரி பிரச்னையை தூண்டிவிட முடிவு?! போராட்டங்களுக்கு எதிர்க்கட்சிகள் நிதியுதவி?!

மறுபுறம், கூட்டணி கட்சிகள் பிரிந்து சென்றதால் புதிய அணியை உருவாக்கும் நெருக்கடியில் தி.மு.க. உள்ளது. மாநில ஆட்சியை இழந்த நிலையில் மத்திய அரசையும் பகைக்க விரும்பாத தி.மு.க. தலைமை, பா.ஜ.க.வுடன் நெருக்கம் காட்ட முயற்சிக்கிறது. ஏற்கெனவே சில முன்னாள் அமைச்சர்கள் அமலாக்கத்துறை, வருமான வரித்துறை வழக்குகளில் சிக்கியுள்ளனர்.

இந்தச் சூழலில் ஆகஸ்ட் 10-ஆம் தேதி சென்னை நந்தனத்தில் நாடார் சமுதாய அமைப்புகளின் சார்பில் காமராஜர் பிறந்த நாள் விழா நடைபெற உள்ளது. தி.மு.க. முன்னாள் அமைச்சர் அனிதா ராதாகிருஷ்ணன் ஏற்பாடு செய்துள்ள இந்த விழாவில் மத்திய உள்துறை அமைச்சர் அமித் ஷா, தி.மு.க. தலைவர் ஸ்டாலின் மற்றும் நாம் தமிழர் கட்சி ஒருங்கிணைப்பாளர் சீமான் ஆகியோர் ஒரே மேடையில் பங்கேற்க உள்ளதாக தகவல்கள் வெளியாகியுள்ளன.

வரும் ஆகஸ்ட் மாதத்தில் நடைபெறும் இந்த இரு முக்கிய நிகழ்வுகளும் தமிழக அரசியலில் புதிய அணி சேர்க்கைக்கு வழி வகுக்கும் என அரசியல் வட்டாரங்கள் தெரிவிக்கின்றன. இரு பெரிய கட்சிகளும் பா.ஜ.க.வுடன் நெருக்கம் காட்டும் முயற்சிகள் தமிழக அரசியலை புதிய திசைக்கு கொண்டு செல்லும் வாய்ப்பு உள்ளது.

இதையும் படிங்க: அது தேவையே இல்ல! கொளுத்திப்போட்ட செங்கோட்டையன்! கொந்தளித்த அன்பில் மகேஷ்!!