சென்னை: அதிமுகவில் நிலவும் உட்கட்சி பிரச்சினை குறித்து எந்த கருத்தும் தெரிவிக்க வேண்டாம் என தமிழக பாஜக நிர்வாகிகளுக்கு பாஜக மேலிடம் தடை விதித்துள்ளது. இந்த உத்தரவு தமிழக அரசியல் வட்டாரத்தில் பெரும் விவாதத்தை ஏற்படுத்தியுள்ளது.

தமிழகத்தில் சமீபத்தில் ஏற்பட்ட ஆட்சி மாற்றம் மற்றும் அரசியல் மாற்றங்கள் குறித்து பாஜக தேசிய அமைப்புப் பொதுச் செயலாளர் பி.எல். சந்தோஷ், தமிழக பாஜக மூத்த நிர்வாகிகளிடம் தொலைபேசி மூலம் விசாரித்தார். 

இந்த சந்தர்ப்பத்தில் அதிமுகவில் எடப்பாடி பழனிசாமி மற்றும் வேலுமணி ஆதரவாளர்கள் இடையே நிலவும் இரு குழுக்களின் பிரச்சினை குறித்து தமிழக பாஜக நிர்வாகிகள் எந்தவித கருத்தும் தெரிவிக்கக் கூடாது என பி.எல். சந்தோஷ் தெளிவாக உத்தரவிட்டதாக பாஜக வட்டாரங்கள் தெரிவித்துள்ளன.

இதையும் படிங்க: அதிமுக கூட்டணியின் பெரிய தலைக்கே ஆப்பு வைத்த சசிகலா!! நயினார் நாகேந்திரன் தோற்க காரணம் யார் தெரியுமா?

தமிழக பாஜகவினர் இதுவரை அதிமுக உட்கட்சி விவகாரங்களில் அவ்வப்போது கருத்து தெரிவித்து வந்த நிலையில், தற்போது மேலிடம் இருந்து வந்துள்ள இந்த தடை உத்தரவு மாநில பாஜகவினருக்கு சற்று ஆச்சரியத்தை ஏற்படுத்தியுள்ளது. தற்போதைய அரசியல் சூழலில் அதிமுகவின் உள் பிரச்சினைகளில் பாஜக தலையிட விரும்பவில்லை என்பதே மேலிடத்தின் நோக்கம் என கூறப்படுகிறது.

எடப்பாடி பழனிசாமி தரப்பும், வேலுமணி தரப்பும் தங்களுக்குள் மோதல் போக்கைத் தொடரும் நிலையில், பாஜக தனது நிலைப்பாட்டை தெளிவாக்கியுள்ளது. இந்த உத்தரவு தமிழக பாஜகவினர் இனிமேல் அதிமுக விவகாரத்தில் வாய் திறக்காமல் இருக்க வேண்டும் என்பதை உறுதிப்படுத்தியுள்ளது.

தமிழக அரசியலில் பாஜக, அதிமுக, தவெக உள்ளிட்ட கட்சிகளுக்கு இடையேயான உறவு மாற்றங்கள் தொடர்ந்து பேசப்படும் நிலையில், பாஜக மேலிடத்தின் இந்த அணுகுமுறை எதிர்கால கூட்டணி அரசியலுக்கு எப்படி வழிவகுக்கும் என்பதை பொறுத்திருந்து பார்க்க வேண்டும். 

மேலும், புதிய அரசு அமைந்துள்ள சூழலில் எதிர்க்கட்சிகளின் உள் பிரச்சினைகளில் பாஜக தலையிடாமல் இருப்பது தனது அரசியல் இடத்தை வலுப்படுத்தும் உத்தியாகவும் பார்க்கப்படுகிறது. தமிழக பாஜக தலைவர்கள் இனி அதிமுக விவகாரத்தில் கருத்து சொல்லாமல் மத்திய அரசின் திட்டங்கள் மற்றும் தமிழக அரசின் செயல்பாடுகள் குறித்தே கவனம் செலுத்த வேண்டும் என எதிர்பார்க்கப்படுகிறது.

இதையும் படிங்க: மோடி, அமித்ஷா பிரசாரம் வீண்?! வெற்றி வாய்ப்பு யாருக்கு! அறிக்கை கேட்கிறது பாஜக தலைமை!