கோவை: தமிழகத்தில் ஹிந்துக்களின் ஓட்டுகளை ஒருங்கிணைத்து பாரதிய ஜனதா கட்சியை வலுப்படுத்த நல்ல வாய்ப்பு உருவாகியுள்ளது எனக் கூறி, இந்த வாய்ப்பைப் பயன்படுத்திக் கொள்ள வேண்டும் என்று கட்சியின் தேசிய அமைப்புப் பொதுச் செயலர் பி.எல். சந்தோஷிடம் மூத்த நிர்வாகிகள் வலியுறுத்தியுள்ளனர்.

சட்டசபைத் தேர்தலில் 27 தொகுதிகளில் போட்டியிட்ட பா.ஜ.க., ஊட்டியில் மட்டுமே வெற்றி பெற்றது. இந்தத் தோல்வியில் இருந்து மீண்டு கட்சியை வலுப்படுத்தும் நோக்கில், மாதந்தோறும் மாநில நிர்வாகிகள் கூட்டம் மற்றும் பூத் கமிட்டி கூட்டங்கள் நடத்த திட்டமிடப்பட்டுள்ளது. இதை கண்காணிக்க தனிப்பொறுப்பாளர்களும் நியமிக்கப்பட்டுள்ளனர்.

கோவையில் உள்ள மாவட்ட பா.ஜ.க. தலைமை அலுவலகத்தில் நேற்று நடைபெற்ற மாநில நிர்வாகிகள் ஆலோசனைக் கூட்டத்துக்கு பி.எல். சந்தோஷ் தலைமை தாங்கினார். மேலிடப் பொறுப்பாளர் அரவிந்த் மேனன், இணைப் பொறுப்பாளர் சுதகர் ரெட்டி, தமிழக பா.ஜ.க. தலைவர் நயினார் நாகேந்திரன் உள்ளிட்டோர் பங்கேற்றனர்.

இதையும் படிங்க: 27 பேர்ல 1 ஒருத்தர்தான் ஜெயிச்சிருக்காரு! பாஜக மையக்குழு கூட்டத்தில் காரசார விவாதம்!

கூட்டத்தில் பல நிர்வாகிகள் தேர்தல் தோல்விக்கான காரணங்களை விவாதித்தனர். சிலர் தனித்து போட்டியிட்டிருக்க வேண்டும் எனக் கருத்து தெரிவித்தனர். தி.மு.க.வின் நிலைப்பாட்டைப் போலவே தமிழக வெற்றிக் கழக அரசும் செயல்படுவதாக விமர்சனம் எழுந்தது. இருப்பினும், த.வெ.க. அரசின் தவறுகளை மட்டும் சுட்டிக்காட்ட வேண்டுமே தவிர, தனிநபர் விமர்சனங்களைத் தவிர்க்க வேண்டும் என அறிவுறுத்தப்பட்டது.

பி.எல். சந்தோஷ் பேசுகையில், “தேர்தல் தோல்வி எனக்கும் பெரும் வேதனையை அளிக்கிறது. பிரதமர் மோடி தலைமையிலான மத்திய அரசின் பல்வேறு நலத்திட்டங்களை தெருமுனை கூட்டங்கள், பொதுக்கூட்டங்கள் மூலம் மக்களிடம் கொண்டு செல்ல வேண்டும்” என்றார்.

மேலும், “தமிழகத்தில் ஹிந்துக்களின் ஓட்டுகளை ஒருங்கிணைத்து பா.ஜ.க.வை வலுப்படுத்த சிறந்த வாய்ப்பு உள்ளது. இதை நழுவவிடக் கூடாது. ஒவ்வொரு மாவட்டத்திலும் கட்சி வளர்ச்சிப் பணிகளை தீவிரப்படுத்த வேண்டும். இந்தப் பணிகளை மேலிடத் தலைவர்கள் நேரடியாகக் கண்காணிக்க வேண்டும்” என மூத்த நிர்வாகிகள் சந்தோஷிடம் வலியுறுத்தினர்.

இந்தக் கூட்டம் தமிழக பா.ஜ.க.வில் புதிய உற்சாகத்தை ஏற்படுத்தியுள்ளது. வரும் காலத்தில் கட்சியின் அடித்தளத்தை வலுப்படுத்தும் வகையில் பல்வேறு திட்டங்கள் செயல்படுத்தப்படும் என எதிர்பார்க்கப்படுகிறது.

இதையும் படிங்க: அதிமுக உட்கட்சி விவகாரங்கள்ல மூக்கை நுழைக்காதீங்க! பாஜகவினருக்கு கடிவாளம் போட்ட டெல்லி தலைமை!!