சென்னை: தமிழகத்தில் தவெக வெற்றி பெற்று ஆட்சி அமைத்துள்ள நிலையில், 5 சட்டமன்றத் தொகுதிகள் காலியாகியுள்ளதால் இடைத்தேர்தல் நடத்த தேர்தல் ஆணையம் முன்னேற்பாடுகளைத் தொடங்கியுள்ளது. இதனிடையே, அதிமுகவில் இருந்து ராஜினாமா செய்து தவெகவில் இணைந்த 4 எம்எல்ஏக்களுக்கு சபாநாயகர் ஜே.சி.டி. பிரபாகர் நோட்டீஸ் அனுப்பியுள்ளார்.
17-வது சட்டசபைத் தேர்தலில் தவெக தலைவர் விஜய் பெரம்பூர் மற்றும் திருச்சி கிழக்கு தொகுதிகளில் வெற்றி பெற்று, பின்னர் திருச்சி கிழக்கு தொகுதி எம்எல்ஏ பதவியை ராஜினாமா செய்தார். அதிமுகவைச் சேர்ந்த 25 எம்எல்ஏக்கள் தவெக அரசுக்கு ஆதரவு அளித்தனர். இதில் மரகதம் குமரவேல் (மதுராந்தகம்), ஜெயக்குமார் (பெருந்துறை), சத்யபாமா (தாராபுரம்) மற்றும் இசக்கி சுப்பையா (அம்பாசமுத்திரம்) ஆகிய நான்கு பேரும் தங்கள் பதவியை ராஜினாமா செய்து தவெகவில் இணைந்தனர்.
இதனைத் தொடர்ந்து திருச்சி கிழக்கு, மதுராந்தகம், பெருந்துறை, தாராபுரம் மற்றும் அம்பாசமுத்திரம் ஆகிய ஐந்து தொகுதிகளையும் காலியாக இந்திய தேர்தல் ஆணையம் அறிவித்தது. ஒரு தொகுதி காலியானால் 6 மாதத்துக்குள் இடைத்தேர்தல் நடத்த வேண்டும் என்பதால், மாவட்ட தேர்தல் அதிகாரிகளுக்கு தலைமை தேர்தல் அதிகாரி அர்ச்சனா பட்நாயக் முன் தயாரிப்பு பணிகளை மேற்கொள்ள உத்தரவிட்டுள்ளார்.
இதையும் படிங்க: தூத்துக்குடியில் கப்பல் கட்டும் தளம் கன்ஃபார்ம்?! தென்கொரியாவில் அதிரடி காட்டும் அமைச்சர் கீர்த்தனா!
தகவலின்படி, இடைத்தேர்தல் தேதி அடுத்த மாதம் (ஜூலை) இறுதியில் அறிவிக்கப்படலாம் என்றும், ஆகஸ்ட் மாதத்தில் வாக்குப் பதிவு நடைபெற வாய்ப்பு உள்ளதாகவும் கூறப்படுகிறது.
இந்நிலையில், ராஜினாமா செய்த நான்கு அதிமுக எம்எல்ஏக்களுக்கு சபாநாயகர் ஜே.சி.டி. பிரபாகர் நோட்டீஸ் அனுப்பியுள்ளார். “எம்எல்ஏ பதவியை ராஜினாமா செய்ததற்கான காரணம் என்ன? உங்கள் மீது நடவடிக்கை ஏன் எடுக்கக்கூடாது?” என 7 நாட்களுக்குள் விளக்கம் அளிக்க உத்தரவிட்டுள்ளார். தவெகவுக்கு ஆதரவு அளித்த எம்எல்ஏக்கள் மீது நடவடிக்கை எடுக்கக் கோரிய புகார்களின் அடிப்படையில் இந்த நோட்டீஸ் அனுப்பப்பட்டுள்ளது.
இந்த இடைத்தேர்தல் தமிழக அரசியலில் புதிய மாற்றங்களை ஏற்படுத்தும் என எதிர்பார்க்கப்படுகிறது. தவெக அரசின் பலத்தை அதிகரிக்கும் இந்த சூழலில், அதிமுகவின் உள்ளடி பிரச்சினைகளும் வெளிச்சத்துக்கு வரும் என அரசியல் வட்டாரங்கள் கருதுகின்றன.
இதையும் படிங்க: நேர்மையாகவும், சுதந்திரமாகவும் செயல்பட வேண்டும்! நகராட்சி அதிகாரிகளுக்கு முதல்வர் விஜய் அட்வைஸ்!