தனியார் பள்ளிகளிடம் சுமார் 400 கோடி ரூபாய் அளவுக்கு மோசடி செய்யப்பட்டதாகக் கூறப்படும் விவகாரத்தில் முன்னாள் அமைச்சர் அன்பில் மகேஷ் பொய்யாமொழியை மத்திய குற்றப்பிரிவு போலீசார் கைது செய்துள்ளனர். கைது செய்யப்பட்ட அவரை இரண்டு நாட்கள் போலீஸ் காவலில் எடுத்து மத்திய குற்றப்பிரிவு போலீசார் விசாரணை மேற்கொண்டு வருகின்றனர்.

குறிப்பாக, பல்வேறு கேள்விகளை முன்வைத்து அவரிடம் விசாரணை நடத்தப்பட்டு வருகிறது. நேற்று மதியம் ஒரு மணி முதலே இந்த விசாரணை விடிய விடிய தொடர்ந்து நடைபெற்று வருவதாக மத்திய குற்றப்பிரிவு போலீசார் தரப்பில் தெரிவிக்கப்பட்டுள்ளது.

சுமார் 400 கோடி ரூபாய் அளவுக்கு மோசடி நடைபெற்றுள்ளதாகக் கூறப்படும் நிலையில், இந்த மோசடி எவ்வாறு நடைபெற்றது என்பது உள்ளிட்ட பல்வேறு கோணங்களில் அவரிடம் விசாரணை மேற்கொள்ளப்பட்டு வருகிறது. குறிப்பாக, யார் மூலமாகப் பணப் பரிவர்த்தனைகள் நடைபெற்றன என்பது குறித்தும் அன்பில் மகேஷ் பொய்யாமொழியிடம் தீவிர விசாரணை நடத்தப்பட்டு வருகிறது.

இதையும் படிங்க: ரூ.100 கோடி லஞ்சம்..! சூடுபிடிக்கும் வழக்கு.!! விசாரணை வளையத்தில் அன்பில் மகேஷ் மனைவி..!

மேலும், ஏற்கனவே இந்த வழக்கில் கைது செய்யப்பட்ட அரசகுமார் உள்ளிட்ட நபர்களிடம் நடத்தப்பட்ட விசாரணையில் கிடைத்த தகவல்களின் அடிப்படையிலும், அன்பில் மகேஷ் பொய்யாமொழி, அவரது உதவியாளர் மற்றும் நண்பர் உள்ளிட்டோருக்குச் சொந்தமான இடங்களில் மேற்கொள்ளப்பட்ட சோதனையில் கைப்பற்றப்பட்ட ஆவணங்களின் அடிப்படையிலும் தொடர்ந்து விசாரணை நடைபெற்று வருவதாகக் காவல்துறை தரப்பில் தெரிவிக்கப்பட்டுள்ளது.

தனியார் பள்ளிகளுக்கு அரசு அங்கீகாரம் பெற்றுத் தருவதாகக் கூறி இந்த மோசடியில் ஈடுபட்டதற்கான காரணம் என்ன? பணம் வசூலிக்கப்பட்டதன் பின்னணி என்ன? வசூலிக்கப்பட்ட பணம் யாருக்கெல்லாம் பகிர்ந்தளிக்கப்பட்டது? என்பது உள்ளிட்ட பல்வேறு கேள்விகள் முன்வைக்கப்பட்டுள்ளன.

ஏற்கனவே அன்பில் மகேஷின் வங்கிப் பணப் பரிவர்த்தனைகள் தொடர்பாக ஆய்வு செய்யப்பட்டுள்ள நிலையில், அதன் அடிப்படையிலும் போலீசார் விசாரணை மேற்கொண்டு வருகின்றனர்.

தொடர்ந்து பல்வேறு கேள்விகள் அவரிடம் முன்வைக்கப்பட்டு, அவர் அளிக்கும் பதில்கள் எழுத்துப்பூர்வமாகப் பதிவு செய்யப்பட்டு வருகின்றன. அவரது வாக்குமூலத்தையும் பதிவு செய்யும் பணியில் மத்திய குற்றப்பிரிவு போலீசார் ஈடுபட்டுள்ளனர்.

ஏற்கனவே சண்முகப்பிரியா என்பவரின் வீட்டிலும் சோதனை மேற்கொள்ளப்பட்டது. இது தொடர்பாகவும் அன்பில் மகேஷிடம் கேள்விகள் எழுப்பப்பட்டு விசாரணை நடத்தப்பட்டு வருகிறது. அவரிடம் நாளை மாலை வரை விசாரணை நடத்துவதற்கு நீதிமன்றம் அனுமதி வழங்கியுள்ள நிலையில், தொடர்ந்து விசாரணை மேற்கொள்ள போலீசார் திட்டமிட்டுள்ளனர்.

குறிப்பாக, எங்கிருந்து பணம் கைமாறியது, இந்தப் பணப் பரிவர்த்தனையில் யாருக்கெல்லாம் தொடர்பு உள்ளது, இந்த விவகாரத்தில் யாருடைய பங்கு முழுமையாக உள்ளது என்பது உள்ளிட்ட கேள்விகளை முன்வைத்து அவரிடம் தீவிர விசாரணை நடத்தி, வாக்குமூலத்தைப் பதிவு செய்யும் நடவடிக்கையில் மத்திய குற்றப்பிரிவு போலீசார் ஈடுபட்டு வருகின்றனர்.

இதையும் படிங்க: ரூ.400 கோடி எங்கப்பா?... சிக்கியது முக்கிய வீடியோ ஆதாரம்... அன்பில் மகேஷுக்கு இறங்கிய அடுத்த இடி..!