திருச்சி மாவட்டம் மணப்பாறை தொகுதியில் தி.மு.க. கூட்டணி வேட்பாளரான மனிதநேய மக்கள் கட்சியின் சிட்டிங் எம்.எல்.ஏ. அப்துல் சமதுவுக்கு ஆதரவாக அமைச்சர்கள் நேரு மற்றும் மகேஷ் தீவிர பிரசாரத்தில் இறங்கியுள்ளனர். தொகுதியில் ஏற்பட்டுள்ள அதிருப்தி மற்றும் உள் பூசல்களை சமாளிக்க இரு அமைச்சர்களும் இரு நாட்கள் தொடர் பிரசாரம் மேற்கொண்டனர்.

மணப்பாறை தொகுதி அமைச்சர் மகேஷின் தெற்கு மாவட்டத்தில் உள்ளது. அப்துல் சமதுவின் பிரசாரத்தின்போது சில ஊர்களில் “வேட்பாளர் தொகுதிக்கு அதிகம் வரவில்லை” என்ற குற்றச்சாட்டு எழுந்தது. மேலும், தி.மு.க.வில் சீட் கிடைக்காத நிர்வாகிகளும், அமைச்சர் நேருவின் ஆதரவாளர்களும் பிரசாரத்தில் ஈடுபடாமல் ஒதுங்கியுள்ளனர். இதனால் தொகுதியில் அதிருப்தி அதிகரித்துள்ளது.

இந்த நிலையில் அமைச்சர் நேரு, தனது ஆதரவாளர்களை அழைத்து ஒவ்வொருவருக்கும் தலா 10,000 ரூபாய் கொடுத்து, தீவிரமாக பிரசாரம் செய்து அப்துல் சமதுவை வெற்றி பெறச் செய்ய வேண்டும் என்று உத்தரவிட்டார். அமைச்சர் மகேஷும் அதிருப்தி நிர்வாகிகளை அழைத்து, “ஒழுங்காக வேலை செய்து வேட்பாளரை வெற்றி பெற வையுங்கள். இல்லையென்றால் தேர்தலுக்குப் பிறகு பதவிக்கு சிக்கல் வரும்” என்று கடுமையாக எச்சரித்தார்.

இதையும் படிங்க: ஆ.ராசா பேசியது அத்தனையும் உண்மை!! ஆடியோ லீக் விவகாரம்!! கொளுத்தி போடும் அண்ணாமலை!

இருப்பினும் சில தி.மு.க. நிர்வாகிகள் இன்னும் களத்தில் தீவிரமாக இறங்கவில்லை. சிலர் அதிமுகவுக்கு சாதகமாக செயல்படுவதாகவும் குற்றச்சாட்டு எழுந்துள்ளது. இதனால் “கட்சியினர் கால்வாரிவிடுவார்களோ” என்ற பயத்தில் அமைச்சர்கள் நேருவும் மகேஷும் மணப்பாறை தொகுதியில் தொடர் பிரசாரத்தில் ஈடுபட்டனர். திருச்சி மாவட்டத்தில் உள்ள மற்ற தி.மு.க. வேட்பாளர்களுக்கு கூட இவ்வளவு முக்கியத்துவம் கொடுக்காத அமைச்சர்கள், மணப்பாறையில் மட்டும் இரு நாட்கள் முழு கவனம் செலுத்தியது பெரும் ஆச்சரியத்தை ஏற்படுத்தியுள்ளது.

இந்த தீவிர பிரசாரம் மனிதநேய மக்கள் கட்சியினருக்கு மகிழ்ச்சியை அளித்துள்ளது. ஆனால் தி.மு.க.வுக்குள் நிலவும் உள் பூசல் மற்றும் அதிருப்தி முழுமையாக தீர்க்கப்பட்டதா என்பது இன்னும் தெளிவாகவில்லை. தேர்தல் நாள் நெருங்கும் நிலையில், மணப்பாறை தொகுதியில் நடைபெறும் இந்த உள் மோதல்கள் மற்றும் அமைச்சர்களின் தீவிர நடவடிக்கைகள் அரசியல் வட்டாரத்தில் பெரும் விவாதத்தை உருவாக்கியுள்ளன.

இதையும் படிங்க: கோவையில் திமுக செய்யும் தில்லாலங்கடி!! அண்ணாமலை பகீர்!! அமாவாசை காலத்து டெக்னிக் என விளாசல்!