தமிழக சட்டமன்றத் தேர்தல் 2026 நெருங்கி வரும் நிலையில், திமுக தலைமையிலான கூட்டணியின் தொகுதி பங்கீடு பேச்சுவார்த்தைகள் தீவிரமடைந்து வருகின்றன. பழைய கூட்டணிக் கட்சிகளுக்கு கூடுதல் இடங்கள் வழங்காமல், புதிய கட்சிகளுக்கு முன்னுரிமை அளிக்கும் வகையில் முதலமைச்சர் மு.க. ஸ்டாலின் திட்டமிட்டுள்ளதாக திமுக வட்டாரங்கள் தெரிவிக்கின்றன.

குறிப்பாக காங்கிரஸுக்கு கூடுதல் தொகுதிகள் இல்லை என்றும், தேமுதிக போன்ற புதிய கட்சிகளுக்கு கூடுதல் இடங்கள் வழங்கப்படலாம் என்றும் கூறப்படுகிறது.

திமுக கூட்டணியில் ஏற்கனவே காங்கிரஸ், விடுதலை சிறுத்தைகள், கம்யூனிஸ்ட் கட்சிகள், மதிமுக உள்ளிட்டவை உள்ளன. 2019-ஆம் ஆண்டு முதல் இக்கூட்டணி தொடர்ந்து வரும் நிலையில், 2021 தேர்தலில் காங்கிரஸுக்கு 25 தொகுதிகள் வழங்கப்பட்டன. இம்முறை காங்கிரஸ் தரப்பில் அமைச்சரவை பங்கு கோரப்பட்டாலும், திமுக அதற்கு இடமளிக்கத் தயாரில்லை.

இதையும் படிங்க: யாருக்கு எவ்வளவு தொகுதி? ஸ்டாலின் டேபிளுக்கு போன ரிப்போர்ட்! இறுதியானது திமுக தொகுதி பங்கீடு!!

 “2021-ல் வழங்கப்பட்ட அதே அளவிலான தொகுதிகளே காங்கிரஸுக்கு வழங்கப்படும்” என்று திமுக மூத்த தலைவர் ஒருவர் தெரிவித்தார். ஏ.ஐ.சி.சி. பொதுச்செயலாளர் கே.சி. வேணுகோபால் திமுக தலைமையுடன் தொடர்பில் இருந்தாலும், கூடுதல் இடங்களை கோரும் காங்கிரஸின் எதிர்பார்ப்பு ஏமாற்றத்தையே ஏற்படுத்தும் என கூறப்படுகிறது.

புதிய கட்சிகளை கூட்டணிக்குள் கொண்டு வருவதிலேயே திமுக கவனம் செலுத்துகிறது. கமல் ஹாசனின் மக்கள் நீதி மய்யம் (எம்என்எம்) ஏற்கனவே கூட்டணியில் இணைந்துள்ள நிலையில், அவர்களுக்கு 3 தொகுதிகள் வழங்கப்படலாம். தேமுதிகவுக்கு இரட்டை இலக்க தொகுதிகள் கோரப்பட்டாலும், ஒற்றை இலக்க இடங்களே வழங்கப்படும் என்றாலும் அது சற்று அதிகமாக இருக்கும் என திமுக வட்டாரங்கள் தெரிவிக்கின்றன. 

பாமக ராமதாஸ் அணிக்கு 3 தொகுதிகள் வழங்க வாய்ப்புள்ளது. இதற்கான பேச்சுவார்த்தைகள் திரைமறைவில் நடந்து வருகின்றன. ராமதாஸ் அணி இணைந்தால் விசிகவை சமாதானம் செய்ய கூடுதல் இடங்கள் வழங்கப்படலாம்.

நடிகர் விஜய்யின் தமிழக வெற்றிக் கழகத்துடன் (தவெக) காங்கிரஸ் கூட்டணி அமைக்கலாம் என்ற யூகங்களுக்கு முற்றுப்புள்ளி வைக்கும் வகையில், காங்கிரஸ் தனது குழுவை அமைத்துள்ளது. அதோடு தனது நிர்வாகிகள் சமூக வலைதளங்களில் திமுகவிற்கு எதிராக கருத்து தெரிவிக்க வேண்டாம் என்றும் அறிவுறுத்தியுள்ளது. 

பழைய கூட்டணிகளின் நிலையை மாற்றாமல் புதிய கட்சிகளை உள்ளே கொண்டு வரும் இந்த உத்தி, திமுகவின் வெற்றி வாய்ப்பை மேலும் அதிகரிக்கும் என அரசியல் விமர்சகர்கள் கருதுகின்றனர்.

இதையும் படிங்க: அய்யா தரப்புக்கு 3 தொகுதி!! திமுக - பாமக டீல் ஓவர்! அமைச்சர் எ.வ.வேலு தலையீட்டால் திருமாவளவன் டென்சன்!