சென்னை: வரும் தமிழக சட்டசபைத் தேர்தலில் மகளிர் வாக்குகளை முழுமையாக தங்கள் பக்கம் இழுக்கும் வியூகத்தில் திமுக தீவிரமாக இறங்கியுள்ளது. இதற்காக மாநிலம் முழுவதும் குறைந்தபட்சம் 25 தொகுதிகளில் பெண்களை வேட்பாளர்களாக களமிறக்க கட்சி தலைமை முடிவு செய்துள்ளது. சென்னையில் இருவர் உட்பட இந்த 25 பெண் வேட்பாளர்களும் கட்சியின் அமைப்பு ரீதியாக செயல்படும் மூன்று மாவட்டங்களுக்கு ஒரு மகளிர் வீதம் தேர்வு செய்யப்பட உள்ளனர்.
திமுக வட்டாரங்கள் தெரிவித்ததாவது: 2021 சட்டசபைத் தேர்தலில் திமுக சார்பில் 12 பெண்கள் போட்டியிட்டனர். அவர்களில் 6 பேர் வெற்றி பெற்றனர். கீதா ஜீவன், கயல்விழி ஆகியோர் தற்போது அமைச்சர்களாக உள்ளனர்.
ஆட்சிக்கு வந்த பிறகு இலவச பஸ் பயணம், 1.31 கோடி மகளிருக்கு மாதம் 1,000 ரூபாய் உரிமைத் தொகை உள்ளிட்ட திட்டங்கள் மூலம் பெண்களிடம் பெரும் வரவேற்பை பெற்றுள்ளது. இதனால் மகளிர் ஓட்டுகளை மொத்தமாக அறுவடை செய்யும் வாய்ப்பு உள்ளது என்று கட்சி மேலிடம் கருதுகிறது.
இதையும் படிங்க: அசைவ சாப்பாடு ரூ.350ஆ!! 2 இட்லி ரூ.40ஆ! தேர்தல் கமிஷன் லிஸ்ட் பார்த்து பதறும் கட்சி நிர்வாகிகள்!
சில தினங்களுக்கு முன் முதல்வர் மு.க. ஸ்டாலின் தரப்பில் தேர்தல் வியூக நிறுவனங்களுடன் ஆலோசனை நடத்தப்பட்டது. அப்போது “இலவச பஸ் பயணத் திட்டத்திற்கு மட்டுமே பெண்களிடம் மிகுந்த வரவேற்பு உள்ளது. மற்ற திட்டங்கள் முழுமையாக சென்றடையவில்லை. எனவே தேர்தலில் குறைந்தது 30 பெண்களுக்கு வாய்ப்பு அளிக்க வேண்டும்” என்ற ஆலோசனை வழங்கப்பட்டது.
இதையடுத்து, திமுக அமைப்பு ரீதியாக செயல்படும் 77 மாவட்டங்களில் மூன்று மாவட்டங்களுக்கு ஒரு மகளிர் வீதம் கணக்கில் குறைந்தபட்சம் 25 தொகுதிகளில் பெண் வேட்பாளர்களை நிறுத்த முடிவு செய்யப்பட்டுள்ளது.
இந்த முடிவு திமுகவின் மகளிர் வாக்கு உத்தியில் பெரிய மாற்றத்தை ஏற்படுத்தும் என எதிர்பார்க்கப்படுகிறது. கட்சியின் மகளிர் அணி, மாவட்ட செயலர்கள், அமைப்புச் செயலர்கள் ஆகியோரிடம் இருந்து பெண் வேட்பாளர்கள் பட்டியல் தயாரிக்கப்பட்டு வருகிறது.
சென்னை உள்ளிட்ட நகர்ப்புற தொகுதிகளிலும் பெண்களுக்கு முன்னுரிமை அளிக்கப்பட உள்ளது. இதனால் எதிர்க்கட்சிகளுக்கு பெண் வாக்காளர்கள் மீதான செல்வாக்கை தக்க வைப்பது சவாலாக அமையும் என்று அரசியல் வட்டாரங்கள் கருத்து தெரிவித்துள்ளன.
திமுகவின் இந்த அணுகுமுறை 2026 தேர்தலில் மகளிர் ஓட்டுகளை தீர்மானகரமான சக்தியாக மாற்றும் என்று கட்சியினர் நம்பிக்கை தெரிவித்து வருகின்றனர்.
இதையும் படிங்க: தொகுதி பங்கீடு!! திமுக கொடுத்த லாஸ்ட் ஆப்சன்!! காங்கிரசுக்கான தொகுதிகள் எது?! லிஸ்ட் ரெடி?!