சென்னை: தமிழக சட்டமன்றத் தேர்தலில் தனி பெரும் கட்சியாக 108 தொகுதிகளில் வெற்றி பெற்ற தமிழக வெற்றிக் கழகம் (த.வெ.க.,) ஆட்சி அமைக்கும் முயற்சியில் வெற்றி பெறும் வாய்ப்பு உருவாகியுள்ள நிலையில், அ.தி.மு.க., பொதுச் செயலர் எடப்பாடி பழனிசாமியின் முதல்வர் கனவு முற்றிலும் சிதைந்து போனது.

தேர்தலுக்குப் பிறகு பெரும்பான்மை இல்லாத சூழலில், விஜய் முதல்வராவதைத் தடுக்க தி.மு.க., அ.தி.மு.க.,வுடன் கூட்டணி அமைக்க முயற்சி மேற்கொண்டது. இதற்காக அ.தி.மு.க.,வுக்கு வெளியில் இருந்து ஆதரவு அளித்து ஆட்சி அமைக்க தி.மு.க., திட்டமிட்டது. இந்தப் பேச்சுவார்த்தையின் ஒரு பகுதியாக அ.தி.மு.க.,வின் 47 எம்.எல்.ஏ.க்கள் புதுச்சேரி ரிசார்ட்டில் தங்க வைக்கப்பட்டனர். 

முன்னாள் அமைச்சர்கள் வேலுமணி, சண்முகம், பழனிசாமியின் மகன் மிதுன் உள்ளிட்டோர் தி.மு.க., தரப்புடன் நேரடி பேச்சு நடத்தினர். அ.தி.மு.க., ஆட்சி அமைத்தால் அமைச்சரவையில் யார் யார் இடம் பெறப் போகிறார்கள் என பழனிசாமி பட்டியல் தயாரித்து உற்சாகமாக இருந்ததாகக் கூறப்படுகிறது.

இதையும் படிங்க: உதயநிதி பேச்சை ஏற்க மறுத்த மு.க.ஸ்டாலின்!! கம்யூ., விசிக கட்சிகளுக்கு கொடுத்த அசைன்மெண்ட்! அரசியல் திருப்பம்!

ஆனால், எதிர்பாராத வகையில் வி.சி.க., மற்றும் கம்யூனிஸ்ட் கட்சிகள் த.வெ.க.,வுக்கு ஆதரவு அளிக்க முடிவு செய்ததால் முழு சூழ்நிலையும் மாறியது. தி.மு.க.,-அ.தி.மு.க., கூட்டணிக்கு எதிர்ப்பு தெரிவித்து திருமாவளவன், சண்முகம், வீரபாண்டியன் உள்ளிட்ட தலைவர்கள் த.வெ.க., பக்கம் சாய்ந்தனர். இதனால் பழனிசாமியின் முதல்வர் பதவிக் கனவு ஒரே நாளில் 'அம்போ' ஆனது.

மேலும், த.வெ.க., ஆட்சி அமைத்தால் தி.மு.க., எதிர்க்கட்சியாக அமரும் நிலை உருவாகியுள்ளது. இதனால் பிரதான எதிர்க்கட்சி அந்தஸ்தை அ.தி.மு.க., இழக்கும் நிலைக்கு தள்ளப்பட்டுள்ளது. தேர்தலில் பெரிய தோல்வியைச் சந்தித்த அ.தி.மு.க.,வுக்குள் ஏற்கெனவே அதிருப்தி அதிகரித்திருந்தது. “ஆட்சி அமைக்கப் போகிறோம்” எனக் கூறி அதைச் சமாளித்து வந்த பழனிசாமிக்கு, இப்போது கட்சிக்குள் புதிய சிக்கல்கள் உருவாகியுள்ளன.

புதுச்சேரி ரிசார்ட்டில் அமைச்சர் பதவிக் கனவுடன் தங்கியிருந்த எம்.எல்.ஏ.க்களும் பெரும் ஏமாற்றத்தில் உள்ளனர். தமிழக அரசியலில் எதிர்பாராத இந்தத் திருப்பம், அ.தி.மு.க.,வின் எதிர்காலத்தையும் பெரிதும் பாதிக்கும் என அரசியல் பார்வையாளர்கள் கருதுகின்றனர். 

இதையும் படிங்க: தவெக விஜய்க்கு ஆதரவு தாங்க!! திருமாவளவன், டி.ராஜாவிற்கு கார்கே கோரிக்கை!