மத்திய கிழக்கில் ஈரான்-அமெரிக்கா இடையிலான மோதல் நீடித்து வரும் நிலையில், உலக எண்ணெய் மற்றும் எரிவாயு விநியோகத்தின் முக்கிய கடல்வழிப்பாதையான ஹார்முஸ் ஜலசந்தியைச் சுற்றி பதற்றம் தொடர்ந்து அதிகரித்து வருகிறது. உலக எண்ணெய் மற்றும் திரவ இயற்கை எரிவாயு விநியோகத்தில் சுமார் ஐந்தில் ஒரு பங்கு இந்த ஜலசந்தி வழியாகவே செல்கிறது. போர் தொடங்கியதிலிருந்து இந்தப் பாதை கடுமையான கட்டுப்பாடுகளுக்கு உள்ளாகி, சர்வதேச வர்த்தகத்தில் பெரும் தாக்கத்தை ஏற்படுத்தி வருகிறது.
அமெரிக்க அதிபர் டொனால்ட் டிரம்ப் அண்மையில் தனது ட்ரூத் சோசியல் தளத்தில் ஹார்முஸ் ஜலசந்தியின் வரைபடத்தை வெளியிட்டு, அதை “புதிய அமெரிக்கப் பிராந்தியம்” எனக் குறிப்பிட்டார். வெள்ளை மாளிகையின் அதிகாரப்பூர்வ எக்ஸ் கணக்கும் இதனை மறுபதிவு செய்தது. டிரம்ப் இதற்கு முன் பலமுறை இந்த ஜலசந்தியை அமெரிக்காவின் கட்டுப்பாட்டில் கொண்டு வருவதாகக் கூறியிருந்தார்.
அமெரிக்கா கடல் தடை விதித்துள்ளதாகவும், ஜலசந்தி திறந்துள்ளதாகவும் அவர் கூறினார். ஆனால் ஈரான் இதை மறுத்து, தனது கோரிக்கைகள் நிறைவேறும் வரை ஜலசந்தி மூடப்பட்டிருக்கும் என வலியுறுத்தி வருகிறது. இதற்குப் பதிலடியாக, ஐதராபாத்தில் உள்ள ஈரான் தூதரகத்தின் அதிகாரப்பூர்வ எக்ஸ் கணக்கு ஒரு வரைபடத்தை வெளியிட்டது. அதில் அமெரிக்காவின் கலிபோர்னியா மாநிலம் நீல நிறத்தில் தனித்துக் காட்டப்பட்டு, “இஸ்லாமிய குடியரசான ஈரானின் புதிய பிராந்தியம்” எனக் குறிப்பிடப்பட்டது.
இதையும் படிங்க: ஈரான் - அமீரகம் இடையே போர் மூளுமா? கொந்தளிக்கும் வளைகுடா... பதற்றம் உச்சம்!
ஈரானின் துணை வெளியுறவு அமைச்சர் காசெம் கரிபாபாதி டிரம்பின் அறிவிப்பை “மாயை” என விமர்சித்தார். ஏன் கலிபோர்னியா? அமெரிக்காவில் உள்ள ஈரானிய வம்சாவளி மக்களில் பெரும்பாலோர் இங்கு வாழ்கின்றனர். லாஸ் ஏஞ்சலஸ் கவுண்டியில் மட்டும் சுமார் 1,41,000 ஈரானிய வம்சாவளி அமெரிக்கர்கள் வசிக்கின்றனர். லாஸ் ஏஞ்சலஸின் வெஸ்ட்வுட் பகுதி “தெஹ்ரான்கலெஸ்” என்று அழைக்கப்படுகிறது.
1979-ஆம் ஆண்டு ஈரானிய இஸ்லாமியப் புரட்சிக்குப் பிறகு நாட்டை விட்டு வெளியேறியவர்கள் இங்கு குடியேறி, பெர்சியன் கலாச்சார மையமாக மாற்றியுள்ளனர். இந்த சமூக ஊடகப் பரிமாற்றம் நகைச்சுவையாகத் தோன்றினாலும், ஹார்முஸ் ஜலசந்தியின் கட்டுப்பாடு தொடர்பான உண்மையான மோதலின் பின்னணியில் அமைந்துள்ளது. இரு தரப்பும் தத்தமது நிலைப்பாட்டில் உறுதியாக இருக்கும் நிலையில், உலக எரிசக்தி சந்தையும் கடல் வழிப்போக்குவரத்தும் தொடர்ந்து பாதிக்கப்படும் அபாயம் உள்ளது.
இதையும் படிங்க: அமெரிக்க ராணுவ வீரர்களை கொன்றால் ரூ.28 லட்சம்!! ஈரான் வெளியிட்ட அதிரடி சன்மான அறிவிப்பு!