மக்கள் நீதி மய்யம் கட்சியினரிடையே பெரும் அதிருப்தி எழுந்துள்ளது. தேர்தலில் போட்டியிட வாய்ப்பு கிடைக்கும் என நம்பி 50 ஆயிரம் ரூபாய் விண்ணப்பக் கட்டணம் செலுத்திய தொண்டர்கள், இப்போது அந்த பணத்தை திரும்பக் கேட்டு வருகின்றனர்.

நடிகரும் மக்கள் நீதி மய்யம் தலைவருமான கமல்ஹாசனுக்கு தி.மு.க. ராஜ்யசபா இடம் ஒதுக்கியதோடு, உதயசூரியன் சின்னத்தில் போட்டியிட வேண்டும் எனக் கட்டளையிட்டது. இதனால் தனது அதிருப்தியை வெளிப்படுத்தும் வகையில் கமல் “தேர்தலிலேயே போட்டியிடப் போவதில்லை” என அறிவித்தார். இந்த முடிவு கட்சி நிர்வாகிகள் மற்றும் தொண்டர்களிடையே பெரும் ஏமாற்றத்தை ஏற்படுத்தியுள்ளது.

தேர்தல் நெருங்கிய நிலையில், மக்கள் நீதி மய்யம் கட்சி போட்டியிட விரும்பும் உறுப்பினர்களிடம் இருந்து விண்ணப்பங்களை வரவேற்றது. ஒவ்வொரு விண்ணப்பத்துக்கும் 50 ஆயிரம் ரூபாய் கட்டணம் செலுத்த வேண்டும் என நிர்ணயிக்கப்பட்டது. இந்தத் தொகை மற்ற அரசியல் கட்சிகளை விட மிக அதிகம் என பலரும் முன்பே குமுறல் தெரிவித்திருந்தனர். இருந்தாலும் தமிழகம் முழுவதும் 60க்கும் மேற்பட்டோர் தங்கள் விண்ணப்பங்களை சமர்ப்பித்து கட்டணத்தையும் செலுத்தினர்.

இதையும் படிங்க: குட்டி ப்ளைட்டும்! ஸ்டார் ஹோட்டல் ரூமும் கொடுத்திருங்க!! பிரசாரத்திற்கு வர டிமாண்ட் செய்யும் கமல்! திமுக அப்செட்!

ஆனால் கமல்ஹாசன் திடீரென தேர்தலில் போட்டியிடப் போவதில்லை என அறிவித்ததும் நிலைமை மாறியது. அந்த அறிவிப்பில் விண்ணப்பக் கட்டணம் செலுத்தியவர்களுக்கு பணம் திரும்பத் தரப்படும் என எந்த தகவலும் இல்லை. இது தொண்டர்களை மிகுந்த மனச்சோர்வுக்கு உள்ளாக்கியுள்ளது.

கட்சி நிர்வாகிகள் சிலர் கூறுகையில், “தேர்தல்களிலேயே போட்டியிடப் போவதில்லை என்றால் ஒரு அரசியல் கட்சியை நடத்துவதன் நோக்கம் என்ன? கடந்த சில ஆண்டுகளாக அயராது உழைத்தோம். கோவை தெற்கு தொகுதியில் கூட்டணி காரணமாக வெற்றி வாய்ப்பு அதிகம் இருப்பதாக நம்பினோம். இப்போது போட்டியே இல்லை எனும்போது, செலுத்திய விண்ணப்பக் கட்டணத்தை திரும்பத் தருவது தானே நியாயம்? அதைப் பற்றி எந்த அறிவிப்பும் இல்லாமல் இருப்பது எந்த வகையில் நியாயம்?” என்று கேள்வி எழுப்பியுள்ளனர்.

தேர்தல் பிரசாரம் தீவிரமடையும் நேரத்தில் மக்கள் நீதி மய்யம் கட்சியில் ஏற்பட்டுள்ள இந்த உள் அதிருப்தி, கட்சியின் எதிர்காலத்தையும் பாதிக்கும் என அரசியல் வட்டாரங்கள் கருதுகின்றன. விண்ணப்பக் கட்டணம் திரும்ப வழங்கப்படுமா என்பது தொண்டர்களின் முக்கிய எதிர்பார்ப்பாக உள்ளது.

இதையும் படிங்க: டார்ச்லைட்தான்! உதயசூரியன்ல நிக்க மாட்டோம்! திமுகவிடம் முரண்டு பிடிக்கும் மநீம! கதறவிடும் கமல்!