மக்களவை சபாநாயகர் ஓம் பிர்லா மீது எதிர்க்கட்சிகள் பெரும் தாக்குதலைத் தொடங்கியுள்ளன. சபாநாயகர் ஒருதலைபட்சமாக செயல்படுவதாகக் குற்றஞ்சாட்டி, அவருக்கு எதிராக 118 எம்பிக்கள் கையெழுத்திட்ட நம்பிக்கையில்லா தீர்மான நோட்டீஸை மக்களவை செயலகத்தில் எதிர்க்கட்சிகள் சமர்ப்பித்துள்ளன.

இந்தியா கூட்டணி தலைமையிலான எதிர்க்கட்சிகள் இணைந்து இந்த நடவடிக்கையை மேற்கொண்டுள்ளன. காங்கிரஸ், திமுக, திரிணமூல் காங்கிரஸ், சமாஜ்வாடி கட்சி, ஆம் ஆத்மி உள்ளிட்ட கட்சிகளைச் சேர்ந்த எம்பிக்கள் இதில் கையெழுத்திட்டுள்ளனர்.

சபாநாயகர் ஓம் பிர்லா கடந்த பிப்ரவரி 5-ஆம் தேதி பகிரங்கமாக மிகப் பெரிய குற்றச்சாட்டை முன்வைத்தார். குடியரசுத் தலைவர் உரைக்கு நன்றி தெரிவிக்கும் தீர்மானத்தில் பிரதமர் மோடி பதிலுரை ஆற்ற இருந்தபோது, சில காங்கிரஸ் எம்பிக்கள் பிரதமரின் இருக்கைக்கு அருகில் சென்று அசம்பாவித சம்பவத்தை ஏற்படுத்தத் திட்டமிட்டதாக தனக்குத் தகவல் கிடைத்ததாகக் கூறினார். இத்தகைய சூழலில் ஜனநாயக மரபுகள் சிதைக்கப்படுவதைத் தடுக்க பிரதமரை அவைக்கு வரவேண்டாம் என்று தாமே கேட்டுக்கொண்டதாகவும் தெரிவித்தார்.

இதையும் படிங்க: மக்களவையில் தொடரும் கூச்சல், குழப்பம்! எதிர்க்கட்சிகள் தொடர் அமளி! முடங்கும் நடவடிக்கைகள்!

இந்தக் குற்றச்சாட்டு நாடு முழுவதும் பெரும் பரபரப்பை ஏற்படுத்தியது. காங்கிரஸ் எம்பிக்கள் இதை மறுத்து, ஆளுங்கட்சி அழுத்தத்தில் அபாண்டக் குற்றச்சாட்டு சுமத்தப்படுவதாகவும், சபாநாயகர் நடுநிலை இழந்துவிட்டதாகவும் கடிதம் எழுதினர்.

இந்நிலையில் எதிர்க்கட்சிகள் சபாநாயகரின் செயல்பாடுகளை ஒருதலைபட்சமானவை எனக் குற்றஞ்சாட்டி நம்பிக்கையில்லா தீர்மான நோட்டீஸ் கொடுத்துள்ளன. இதன் மூலம் ஓம் பிர்லாவுக்கு பெரும் நெருக்கடி ஏற்படுத்த எதிர்க்கட்சிகள் திட்டமிட்டுள்ளன.

பட்ஜெட் கூட்டத் தொடர் தொடங்கியதிலிருந்தே எதிர்க்கட்சிகளின் அமளி காரணமாக லோக்சபா முடங்கிய நிலையில், இந்த நம்பிக்கையில்லா தீர்மானம் சபையின் செயல்பாட்டை மேலும் சிக்கலாக்கியுள்ளது. தீர்மானத்தை முன்னெடுக்க எதிர்க்கட்சிகள் தீவிரமாக முயற்சி செய்யும் என எதிர்பார்க்கப்படுகிறது.

இது நாடாளுமன்ற வரலாற்றில் மிக முக்கியமான தருணமாக அமைந்துள்ளது. சபாநாயகர் பதவிக்கு எதிரான இத்தகைய நடவடிக்கை வெற்றி பெறுமா என்பது அடுத்த சில நாட்களில் தெரியவரும்.

இதையும் படிங்க: ஓம் பிர்லாவுக்கு எதிராக நம்பிக்கையில்லா தீர்மானம்?! லோக்சபா எதிர்க்கட்சி எம்.பிகள் திட்டம்?! அப்டேட் தகவல்!!