மதுரை மீனாட்சி அம்மன் கோவிலில் துணை ஜனாதிபதி சி.பி. ராதாகிருஷ்ணன் சாமி தரிசனம் செய்தபோது ஏற்பட்ட மின்தடை விவகாரத்தில், கோவிலின் இளநிலை பொறியாளர் ஜானகிராமன் பணியிடை நீக்கம் செய்யப்பட்டுள்ளார். பணியில் கவனக்குறைவாகச் செயல்பட்டதாகக் கூறி, 15 நாட்களுக்குள் விளக்கம் அளிக்குமாறு கோவில் அறங்காவலர் குழுத் தலைவர் ருக்மணி பழனி வேல்ராஜன் உத்தரவிட்டுள்ளார்.

மீனாட்சி அம்மன் கோவிலில் துணை ஜனாதிபதி தரிசனம்!

துணை ஜனாதிபதி சி.பி. ராதாகிருஷ்ணன், மதுரை மீனாட்சி அம்மன் கோவிலில் சாமி தரிசனம் செய்வதற்காக நேற்று முன்தினம் மாலை சுமார் 5.30 மணிக்கு வருகை தந்தார். அவருடன் தமிழக ஆளுநர் ராஜேந்திர விஸ்வநாத் அர்லேகர், அமைச்சர் ஜெகதீசுவரி, மாவட்ட ஆட்சியர் நிஷாந்த் கிருஷ்ணா உள்ளிட்டோரும் வந்திருந்தனர்.

இதையும் படிங்க: மது பழக்கத்தை கண்டித்த வளர்ப்புத் தந்தை! அரிவாளால் வெட்டிக் கொன்ற மகன்! சோழவந்தானில் அதிர்ச்சி சம்பவம்!

கோவில் அறங்காவலர் குழுத் தலைவர் ருக்மணி பழனி வேல்ராஜன், கோவில் இணை ஆணையர் செல்லத்துரை ஆகியோர் அவர்களை வரவேற்றனர். தொடர்ந்து பூரண கும்ப மரியாதை அளிக்கப்பட்டு துணை ஜனாதிபதி கோவிலுக்குள் அழைத்துச் செல்லப்பட்டார்.

மின்தடை ஏற்பட்டதால் பரபரப்பு!

கோவிலில் மீனாட்சி அம்மன் மற்றும் சுந்தரேசுவரர் சன்னதிகளில் துணை ஜனாதிபதி சிறப்பு அர்ச்சனை செய்து வழிபட்டார். அவருக்கும் ஆளுநர் அர்லேகருக்கும் தீபாராதனை காட்டப்பட்டது. தரிசனத்தை முடித்த பின்னர் இருவரும் பொற்றாமரைக் குளத்தின் அருகே நின்று புகைப்படம் எடுத்துக்கொண்டனர்.

இதற்கிடையே, கோவிலுக்கு வெளியே செய்தியாளர்களைச் சந்தித்துப் பேட்டியளிக்கத் தயாரானபோது திடீரென மின்சாரம் தடைபட்டது. சிறிது நேரத்தில் மின்சாரம் மீண்டும் வந்த நிலையில், தொடர்ந்து இருமுறை மின்தடை ஏற்பட்டு சீரானது. துணை ஜனாதிபதியின் வருகையின்போது ஏற்பட்ட இந்தச் சம்பவம் பரபரப்பை ஏற்படுத்தியது.

ஜெனரேட்டரை நிறுத்தியபோது மின்தடை ஏற்பட்டதாக விளக்கம்!

இந்தச் சம்பவம் குறித்து கோவில் நிர்வாகத்தினர் விளக்கம் அளித்தனர். துணை ஜனாதிபதி தரிசனத்தின்போது மின்தடை ஏற்படுவதைத் தவிர்ப்பதற்காக, வழக்கமான மின்சாரம் இருந்தபோதிலும் ஜெனரேட்டர் மூலம் மின்சாரம் வழங்கப்பட்டதாகத் தெரிவித்தனர்.

துணை ஜனாதிபதி கோவிலிலிருந்து வெளியேறிய பிறகு ஜெனரேட்டர் நிறுத்தப்பட்டு, மீண்டும் வழக்கமான மின்சார விநியோகத்திற்கு மாற்றப்பட்டபோது மின்தடை ஏற்பட்டதாகவும், சில நொடிகளிலேயே மின்சாரம் திரும்பியதாகவும் நிர்வாகத்தினர் விளக்கமளித்தனர்.

இளநிலை பொறியாளர் ஜானகிராமன் சஸ்பெண்ட்!

இந்த நிலையில், துணை ஜனாதிபதியின் வருகையின்போது ஏற்பட்ட மின்தடை தொடர்பாக கோவில் நிர்வாகம் நடவடிக்கை எடுத்துள்ளது. பணியில் கவனக்குறைவாகச் செயல்பட்டதாகக் கூறி, கோவிலின் இளநிலை பொறியாளர் ஜானகிராமன் பணியிடை நீக்கம் செய்யப்பட்டுள்ளார்.

மேலும், இந்த விவகாரம் தொடர்பாக 15 நாட்களுக்குள் விளக்கம் அளிக்க வேண்டும் என்று கோவில் அறங்காவலர் குழுத் தலைவர் ருக்மணி பழனி வேல்ராஜன் ஜானகிராமனுக்கு உத்தரவிட்டுள்ளார். துணை ஜனாதிபதி வருகையின்போது ஏற்பட்ட மின்தடை விவகாரம் தற்போது கோவில் பணியாளர் மீதான நடவடிக்கை வரை சென்றுள்ளது.

இதையும் படிங்க: சோற்றில் முழு பூசணிக்காயை மறைப்பதா.? மீனாட்சியம்மன் கோவிலில் மின்வெட்டு.! வெளுத்து வாங்கிய TTV தினகரன்.!