சென்னை: மதுராந்தகம் (தனி) சட்டப்பேரவைத் தொகுதி இடைத்தேர்தல் களம் சூடுபிடித்துள்ளது. அக்டோபர் 6-ம் தேதி வாக்குப்பதிவு நடைபெற உள்ள நிலையில், தவெக, அதிமுக, திமுக உள்ளிட்ட கட்சிகள் தீவிர பிரசாரத்தில் ஈடுபட்டு வருகின்றன. இந்த தொகுதியில் தற்போது 27 வேட்பாளர்கள் களத்தில் இருந்தாலும், முக்கிய கட்சிகளின் வேட்பாளர்களை மையமாகக் கொண்டே அரசியல் கவனம் திரும்பியுள்ளது.

கடந்த மே மாத சட்டப்பேரவைத் தேர்தலில் மதுராந்தகத்தில் அதிமுக சார்பில் போட்டியிட்ட மரகதம் குமரவேல் 69,284 வாக்குகள் பெற்று வெற்றி பெற்றார். தவெக வேட்பாளர் எழில் கேத்தரின் 62,090 வாக்குகளும், திமுக வேட்பாளர் அமுலு பொன்மலர் 59,838 வாக்குகளும் பெற்றனர். அதிமுகவுக்கும் தவெகவுக்கும் இடையே 7,194 வாக்குகள் மட்டுமே வித்தியாசம் இருந்தது.

தற்போதைய இடைத்தேர்தலில் அரசியல் கணக்கு மாறியுள்ளது. முன்னாள் அதிமுக எம்எல்ஏ மரகதம் குமரவேல் தற்போது தவெக வேட்பாளராக களமிறங்கியுள்ளார். அவரை எதிர்த்து அதிமுக சார்பில் கணிதா சம்பத், திமுக சார்பில் பரந்தாமன் போட்டியிடுகின்றனர். மார்க்சிஸ்ட் கம்யூனிஸ்ட் கட்சி சார்பில் சுகந்தியும், நாம் தமிழர் கட்சி சார்பில் ஜானகிராமனும் களத்தில் உள்ளனர்.

இதையும் படிங்க: மதுராந்தகத்தில் அதிமுக நிர்வாகிகள் ஆப்செண்ட்! பழனிசாமியின் உத்தரவுக்கு ‘நோ ரெஸ்பான்ஸ்’?

இதனால் கடந்த தேர்தலில் ஒரே தொகுதியில் இருந்த வாக்கு கணக்கு, இந்த இடைத்தேர்தலில் வேறு வடிவம் எடுத்துள்ளது. குறிப்பாக மரகதம் குமரவேல் தனது கடந்த தேர்தல் தனிப்பட்ட ஆதரவை தவெக வாக்குகளுடன் இணைக்க முடியுமா என்பதும், அதிமுக தனது பாரம்பரிய வாக்குகளை தக்கவைக்க முடியுமா என்பதும் கவனிக்கப்படும் அம்சங்களாக உள்ளன.

அதேபோல், கடந்த தேர்தலில் 59,838 வாக்குகள் பெற்ற திமுக தற்போது பரந்தாமனை களமிறக்கியுள்ளது. கடந்த தேர்தலில் அதிமுக, தவெக, திமுக இடையே ஏற்பட்ட நெருக்கமான வாக்கு வித்தியாசம் காரணமாக, இந்த முறை ஒவ்வொரு வாக்கும் முக்கியத்துவம் பெறுகிறது.

மதுராந்தகத்தில் யார் வெற்றி பெறுவார்கள் என்பதற்கான உறுதியான முடிவு தற்போது கூற முடியாது. களப்பிரசாரம், கட்சிகளின் வாக்கு மாற்றம், வேட்பாளர்களின் தனிப்பட்ட செல்வாக்கு உள்ளிட்ட காரணிகள் முடிவில் தாக்கத்தை ஏற்படுத்தலாம். இறுதி பதில் அக்டோபர் 9-ம் தேதி வாக்கு எண்ணிக்கைக்குப் பிறகே தெரியவரும்.

இதையும் படிங்க: மதுராந்தகம் மக்கள் மீண்டும் அந்தத் தவறை செய்ய மாட்டார்கள்! திருமாவளவனின் கணிப்புக்கு திமுக வேட்பாளர் பதில்!