தமிழக அரசியல் களத்தில் பெரும் எதிர்பார்ப்பை ஏற்படுத்தியுள்ள மதுராந்தகம், தாராபுரம் சட்டப்பேரவை இடைத்தேர்தல் முடிவுகள் நாளை (அக்.9) வெளியாக உள்ளன. அக்டோபர் 6-ம் தேதி நடைபெற்ற வாக்குப்பதிவில் இரு தொகுதிகளிலும் வாக்காளர்கள் ஆர்வத்துடன் வாக்களித்த நிலையில், தற்போது வேட்பாளர்கள் மட்டுமின்றி முக்கிய அரசியல் கட்சிகளும் முடிவை எதிர்நோக்கி காத்திருக்கின்றன.

இந்த இடைத்தேர்தல், குறிப்பாக ஆளும் தமிழக வெற்றிக் கழகத்துக்கு முக்கியமான அரசியல் சோதனையாக பார்க்கப்படுகிறது. மதுராந்தகம் மற்றும் தாராபுரம் ஆகிய இரு தொகுதிகளிலும் தவெக வேட்பாளர்கள் களமிறங்கியுள்ளனர்.

இந்த இரண்டு தொகுதிகளிலும் வெற்றி கிடைத்தால், ஆட்சிக்கு வந்த சில மாதங்களிலேயே மக்களிடையே தங்களுக்கு வலுவான ஆதரவு இருப்பதாக தவெக தரப்பு அரசியல் ரீதியாக முன்னிறுத்த முடியும்.

இதையும் படிங்க: சுங்கச்சாவடிகளில் கட்டாய வழிப்பறியா.? வாய்திறக்குமா மத்திய அரசு..? வேல்முருகன் விளாசல்.!!

மறுபுறம், திமுகவும் அதிமுகவும் இந்த தேர்தலை சாதாரண இடைத்தேர்தலாக பார்க்கவில்லை. இரு தொகுதிகளிலும் தங்களது வாக்கு வங்கியை தக்க வைப்பதற்கான போட்டியில் இரண்டு கட்சிகளும் தீவிரமாக செயல்பட்டன.

குறிப்பாக, முன்னாள் அதிமுக எம்.எல்.ஏ.க்கள் ராஜினாமா செய்து தவெகவில் இணைந்ததைத் தொடர்ந்து இந்த இடைத்தேர்தல் உருவானதால், அதிமுகவுக்கும் இந்த தேர்தல் கூடுதல் முக்கியத்துவம் பெற்றுள்ளது. அதே வேட்பாளர்கள் தற்போது தவெக சார்பில் மீண்டும் களமிறங்கியுள்ளனர்.

மதுராந்தகத்தில் 27 வேட்பாளர்களும், தாராபுரத்தில் 22 வேட்பாளர்களும் போட்டியிட்டுள்ளனர். திமுக, அதிமுக, தவெக ஆகியவற்றுடன் இடதுசாரி கட்சிகள் மற்றும் நாம் தமிழர் கட்சியும் களத்தில் உள்ளன. இதனால் இரு தொகுதிகளிலும் பலமுனைப் போட்டி நிலவியது.

வாக்குப்பதிவைப் பொறுத்தவரை மதுராந்தகத்தில் சுமார் 86 சதவீதமும், தாராபுரத்தில் சுமார் 80 சதவீதமும் வாக்குகள் பதிவாகியுள்ளன. கடந்த சட்டப்பேரவை தேர்தலுடன் ஒப்பிடும்போது இரு தொகுதிகளிலும் வாக்குப்பதிவு குறைந்துள்ளது.

இதனால், நாளை வெளியாகும் முடிவுகள் வெறும் இரண்டு தொகுதிகளின் வெற்றி, தோல்வியை மட்டும் தீர்மானிக்காமல், தமிழக அரசியலில் அடுத்தகட்ட நகர்வுகளுக்கும் முக்கியமானதாக அமையுமா என்ற எதிர்பார்ப்பு ஏற்பட்டுள்ளது. யாருக்கு வெற்றி, யாருக்கு அதிர்ச்சி என்பது நாளை தெரிந்துவிடும்.

இதையும் படிங்க: சத்தியபாமா விவகாரம் விஸ்வரூபம்!! மு.க.ஸ்டாலினுக்கு எதிராக அடுத்தடுத்து புகார்!! திருச்சியில் பரபரப்பு!