சென்னை ஓஎம்ஆர் சாலையில் திருவான்மியூர் பகுதியில் இன்று காலை திடீரென ஏற்பட்ட பள்ளம் அப்பகுதி மக்களிடையே பெரும் அதிர்ச்சியை ஏற்படுத்தியது. திருவான்மியூரிலிருந்து தரமணி நோக்கிச் செல்லும் சாலையில், திருவான்மியூர் ரயிலடி எதிரே உள்ள பகுதியில் காலை 10:45 மணியளவில் சாலையின் ஒரு பகுதி திடீரென இடிந்து விழுந்தது. அப்போது அந்த வழியாகச் சென்று கொண்டிருந்த ஒரு கார் அந்தப் பள்ளத்தில் சிக்கிக் கவிழ்ந்தது. காரில் இருந்த ஓட்டுநர் அதிர்ஷ்டவசமாக பாதுகாப்பாக இருந்தார்.

உடனடியாக வாகனத்தை மீட்கும் பணிகள் தொடங்கின.இந்த சம்பவம் நடைபெற்ற பகுதி சென்னை மெட்ரோ ரயில் திட்டத்தின் கீழ் சுரங்கப் பணிகள் நடைபெற்று வரும் இடத்திற்கு அருகில் அமைந்துள்ளது. திருவான்மியூர் ஷாஃப்ட் பகுதியிலிருந்து சுமார் 30 மீட்டர் தொலைவில் இந்த நிகழ்வு நடந்ததாகத் தெரிகிறது. சாலையில் ஏற்பட்ட பெரிய பள்ளத்தில் கார் கவிழ்ந்ததால் அப்பகுதியில் போக்குவரத்து பெரிதும் பாதிக்கப்பட்டது. வாகன ஓட்டிகள் அச்சத்துடன் சென்றனர். உடனடியாக போலீசாரும் மெட்ரோ அதிகாரிகளும் அங்கு வந்து நிலைமையைக் கட்டுக்குள் கொண்டு வந்தனர்.

சென்னை மெட்ரோ ரயில் நிர்வாகம் இந்த சம்பவம் குறித்து விளக்க அறிக்கை வெளியிட்டுள்ளது. அதில், சாலையில் ஏற்பட்ட பள்ளத்தை கான்கிரீட் கொண்டு நிரப்பும் பணிகள் தற்போது நடைபெற்று வருவதாகக் குறிப்பிடப்பட்டுள்ளது. அதேபோல், அப்பகுதியில் பாதுகாப்பு நடவடிக்கைகள் மேற்கொள்ளப்பட்டுள்ளன. தளப் பாதுகாப்பு ஏற்பாடுகளும் விரைவாகச் செய்யப்பட்டு வருகின்றன. மேலும், திருவான்மியூர் ஓஎம்ஆர் சாலையில் திடீர் பள்ளம் ஏற்பட்டதற்கான காரணத்தை அறிய தொழில்நுட்ப விசாரணை நடத்தப்பட்டு வருவதாகவும் மெட்ரோ நிர்வாகம் தெரிவித்துள்ளது.

இதையும் படிங்க: சரித்திரத்தில் திமுக-வை மறைக்க முடியாது! பூந்தமல்லி - வடபழனி மெட்ரோ திறப்பு குறித்து மு.க.ஸ்டாலின் அறிக்கை!

இந்தச் சம்பவம் காரணமாக அப்பகுதியில் சாலை போக்குவரத்து தற்காலிகமாகத் திசைதிருப்பப்பட்டது. இருசக்கர வாகனங்கள் மட்டும் கவனமாகச் செல்ல அனுமதிக்கப்பட்டன. மற்ற வாகனங்கள் மாற்று வழிகளில் செல்ல வழிகாட்டப்பட்டன. பள்ளத்தை நிரப்பும் பணிகள் முடிவடையும் வரை சாலையின் ஒரு பகுதி மூடப்பட்டிருக்கும் என எதிர்பார்க்கப்படுகிறது. கான்கிரீட் ஊற்றி பள்ளத்தை நிலைப்படுத்தும் பணிகள் விரைவாக முடிக்கப்படும் என அதிகாரிகள் உறுதியளித்துள்ளனர்.

இதையும் படிங்க: பிரதமர் வருகையும், மெட்ரோ திறப்பு பணிகளும்..! தலைமைச் செயலர் முக்கிய ஆலோசனை.!