தமிழகத்தில் இன்னும் 15 முதல் 25 ஆண்டுகள் வரை தவெக ஆட்சி தொடரும் என்றும், விஜய் நீண்ட காலம் தமிழக முதல்வராக இருப்பார் என்றும் அமைச்சர் ஆனந்த் பேசியிருப்பது அரசியல் வட்டாரத்தில் கவனம் பெற்றுள்ளது.

சென்னை கலைவாணர் அரங்கில் அமைச்சர் ஆனந்த் தலைமையில் ஊரக வளர்ச்சித் துறையின் முதல் மண்டல மாநாடு நடைபெற்றது. இந்தக் கூட்டத்தில் பருவமழையை எதிர்கொள்வதற்கான முன்னெச்சரிக்கை நடவடிக்கைகள், கிராமங்களின் அடிப்படை தேவைகள் உள்ளிட்ட பல்வேறு அம்சங்கள் குறித்து ஆலோசனை மேற்கொள்ளப்பட்டது.

கூட்டத்தில் பேசிய அமைச்சர் ஆனந்த், ஒரு கிராமத்துக்கே இவ்வளவு பிரச்னைகள் இருக்கும்போது, தமிழகத்தில் உள்ள 12,147 கிராமங்களில் எவ்வளவு பிரச்னைகள் இருக்கும் என்பதை சுட்டிக்காட்டினார். இந்தப் பிரச்னைகளுக்கு அடுத்த 5 ஆண்டுகளில் தீர்வு காண நடவடிக்கை எடுக்கப்படும் என்றும் அவர் தெரிவித்தார்.

இதையும் படிங்க: விரைவில் புதிய எரிசக்திக் கொள்கை... அமைச்சர் நிர்மல் குமார் கொடுத்த அப்டேட்.!

ஒவ்வொரு சட்டப்பேரவைத் தொகுதியிலும் உள்ள அடிப்படை பிரச்னைகளை கண்டறிந்து கண்காணிக்க ட்ரோன் தொழில்நுட்பத்தை பயன்படுத்த திட்டமிடப்பட்டுள்ளதாகவும் அமைச்சர் கூறினார். இதன் மூலம் கிராமப்புறங்களில் உள்ள தேவைகளை நேரடியாக கண்காணித்து, அவற்றுக்கு தீர்வு காண நடவடிக்கை எடுக்க முடியும் என அவர் குறிப்பிட்டார்.

தொடர்ந்து விஜயின் அரசியல் ஆட்சி குறித்து பேசிய அமைச்சர் ஆனந்த், இன்னும் 15, 20, 25 ஆண்டுகளுக்கு விஜயின் தலைமையிலேயே ஆட்சி நடைபெறும் என்று நம்பிக்கை தெரிவித்தார். விஜய்தான் நிரந்தர முதல்வராக இருப்பார் என்றும் அவர் கூறினார்.

மேலும், மக்களுக்கு தேவையான அடிப்படை வசதிகளை உறுதி செய்வதே விஜயின் முக்கிய கனவு என அமைச்சர் ஆனந்த் தெரிவித்தார். குறிப்பாக அனைவருக்கும் சுத்தமான குடிநீர், சுகாதாரம் உள்ளிட்ட அத்தியாவசிய வசதிகள் கிடைக்க வேண்டும் என்பதில் கவனம் செலுத்தப்படுவதாகவும் கூறினார்.

விஜயின் இந்த கனவை நிறைவேற்ற அனைவரும் ஒற்றுமையாக செயல்பட வேண்டும் என்பதே தனது விருப்பம் என்றும் அமைச்சர் ஆனந்த் தெரிவித்தார். அவரது இந்தப் பேச்சு தற்போது தமிழக அரசியல் வட்டாரத்தில் பேசுபொருளாகியுள்ளது.

இதையும் படிங்க: தவெக எம்எல்ஏ வி.எஸ்.பாபு உடல்நிலை என்ன? அமைச்சர் அருண்ராஜ் வெளியிட்ட முக்கிய தகவல்!