சென்னை: தமிழகத்தில் சிறப்பு தீவிர வாக்காளர் பட்டியல் திருத்தமான எஸ்ஐஆர் தொடர்பான விவகாரத்தில், தங்கள் கட்சி தொடர்ந்து எதிர்ப்பு தெரிவித்து வருவதாக அமைச்சர் ராஜ்மோகன் தெரிவித்துள்ளார்.

சென்னை முன்னாள் மேயர் சிவராஜ் பிறந்தநாளையொட்டி தமிழக அரசு சார்பில் மரியாதை செலுத்தும் நிகழ்ச்சி நடைபெற்றது. இதில் பங்கேற்ற அமைச்சர் ராஜ்மோகன், பின்னர் செய்தியாளர்களிடம் பல்வேறு அரசியல் விவகாரங்கள் குறித்து பேசினார்.

எஸ்ஐஆர் நடைமுறை தொடர்பாக முதல் நாளிலிருந்தே தாங்கள் எதிர்ப்பு தெரிவித்து வருவதாக அவர் கூறினார். வாக்காளர் பட்டியலில் இருந்து பலரது பெயர்கள் விடுபடும் வகையில் சிறப்பு எஸ்ஐஆர் நடைமுறை அமையக்கூடாது என்பதே தங்களது நிலைப்பாடு என்றும் தெரிவித்தார். கூட்டணிக் கட்சிகளின் நிலைப்பாடே தங்கள் நிலைப்பாடு என்றும் அவர் குறிப்பிட்டார்.

இதையும் படிங்க: ஞானேஷ் குமார் விவகாரத்தில் திமுகவுக்கு அழைப்பு? எதிர்க்கட்சிகளை ஒன்றிணைக்க ராகுல்காந்தி திட்டம்?

காங்கிரஸ் கட்சியும், தமிழக வெற்றிக் கழகமும் இணைந்து செயல்படுவதாக விமர்சனங்கள் எழுந்துள்ள நிலையில், இரு கட்சிகளையும் “இரட்டைக் குழல் துப்பாக்கிகள்” என ராஜ்மோகன் வர்ணித்தார். எஸ்ஐஆர் நடைமுறை மட்டும் இல்லாமல் இருந்திருந்தால், த.வெ.க. மேலும் பல தொகுதிகளில் வெற்றி பெற்றிருக்கும் என்றும் அவர் தனது கருத்தை தெரிவித்தார்.

மேலும், அதிக எண்ணிக்கையில் அமைச்சர்கள் உருவாகியிருப்பார்கள் என்றும், பெண்களுக்கும் கூடுதல் பிரதிநிதித்துவம் கிடைத்திருக்கும் என்றும் ராஜ்மோகன் கூறினார். எஸ்ஐஆர் நடைமுறையை அவர் கடுமையாக விமர்சித்ததுடன், அது தொடர்பாக தங்களது எதிர்ப்பு தொடரும் என்றும் தெரிவித்தார்.

தமிழக அமைச்சரவையில் மாற்றம் செய்யப்பட உள்ளதாக வெளியாகும் தகவல்கள் குறித்தும் அமைச்சர் ராஜ்மோகனிடம் கேள்வி எழுப்பப்பட்டது. இதற்கு பதிலளித்த அவர், இணையதளங்களில் இதுபோன்ற பல்வேறு ஊகங்கள் வெளியாகலாம் என்றும், தங்களுக்கு ஒதுக்கப்பட்ட பொறுப்புகளை செய்து வருவதாகவும் கூறினார். அமைச்சரவை மாற்றம் தொடர்பாக முதலமைச்சர் விஜய்தான் இறுதி முடிவை எடுப்பார் என்றும் அவர் தெரிவித்தார்.

அ.தி.மு.க.வை நம்பியே த.வெ.க. செயல்படுவதாக முன்னாள் முதலமைச்சர் எடப்பாடி பழனிசாமி கூறியிருப்பது அரசியல் பிரசாரத்துக்காக தெரிவிக்கப்பட்ட கருத்து என்று ராஜ்மோகன் விமர்சித்தார்.

மேலும், தேர்தல் முடிவுகளுக்குப் பிறகு தி.மு.க., அ.தி.மு.க. ஆகிய கட்சிகள் ஒன்றிணையக்கூடிய சூழல் ஏற்பட்டுள்ளதாக தாங்கள் கருதுவதாலேயே மரகதம் குமரவேல் உள்ளிட்ட சிலர் அங்கிருந்து விலகி தங்கள் அணிக்கு வந்ததாகவும் அவர் கூறினார்.

அமைச்சர் ராஜ்மோகனின் இந்த கருத்துகள் தமிழக அரசியல் வட்டாரத்தில் புதிய விவாதத்தை ஏற்படுத்தியுள்ளன. குறிப்பாக எஸ்ஐஆர், த.வெ.க.வின் அரசியல் நிலைப்பாடு, அமைச்சரவை மாற்றம் மற்றும் அ.தி.மு.க. தொடர்பான அவரது விமர்சனங்கள் கவனம் பெற்றுள்ளன.

இதையும் படிங்க: தலைமை தேர்தல் கமிஷனர் ஞானேஷ் குமாருக்கு எதிராக மீண்டும் பதவி நீக்க தீர்மானம்? எதிர்க்கட்சிகள் தீவிர ஆலோசனை!!