தமிழகத்தில் தவெக ஆட்சிப் பொறுப்பேற்ற இந்த நான்கு மாதங்கள் நாடே சிரிக்கும் வகையில் அமைந்துள்ளது என்றும், இடைத்தேர்தல் தோல்வி பயத்தில் முதலமைச்சர் தெருவலம் போவது போதாமல் டிபன் கேரியரில் பணப்பட்டுவாடா செய்யப்படுவதாக வரும் குற்றச்சாட்டுகளுக்குப் பதில் என்ன என்றும் முதலமைச்சர் ச. ஜோசப் விஜய்க்கு திமுக தலைவரும் சட்டமன்ற எதிர்க்கட்சித் தலைவருமான மு.க.ஸ்டாலின் மிகக் காட்டமான கேள்விகளை எழுப்பியுள்ளார்.

மதுராந்தகம் மற்றும் தாராபுரம் சட்டமன்ற இடைத்தேர்தல் பிரச்சாரக் களம் இன்று மாலையுடன் ஓய்வடைந்த நிலையில், திமுக தலைவர் மு.க.ஸ்டாலின் தனது அதிகாரப்பூர்வ சமூக வலைதளப் பக்கத்தில் முதலமைச்சர் விஜய்யை நேரடியாகக் குறிப்பிட்டு நாடு சிரிக்கும் நான்கு மாதங்கள் என அனல் பறக்கும் பதிவு ஒன்றை வெளியிட்டுள்ளார்.

அந்தப் பதிவில், பெண்களைப் பாலியல் வன்கொடுமைக்கு உள்ளாக்கியோரைச் சட்டமன்ற உறுப்பினர்களாகவும் மாவட்டச் செயலாளர்களாகவும் கட்சிக்குள் வைத்துக்கொண்டு முதலமைச்சர் பெண் பாதுகாவலர் போல வேடம் போடலாமா என்று அவர் கேள்வி எழுப்பியுள்ளார். மேலும், அறிவிக்கப்படாத மின்வெட்டில் இருந்து இனி தினமும் அறிவித்துவிட்டு 8 மணி நேரம் மின்வெட்டு என்பதை நோக்கித் தமிழ்நாடு நகரவுள்ளதாக வரும் செய்திகள் முதலமைச்சரின் செவிகளை எட்டவில்லையா எனவும் சாடியுள்ளார்.

இதையும் படிங்க: CM சார்..!! உங்க பயம் எனக்கு புடிச்சிருக்கு..!! மதுராந்தகத்தில் ஆவேசமாக பேசிய மு.க.ஸ்டாலின்..!!

அதேபோல், அசையாத மரமொன்று கீழே விழுந்தது என்ற கதையாக, இடைத்தேர்தல் தோல்வியைத் தவிர்க்க முதலமைச்சர் மணிக்கணக்கில் தெருவலம் போவது போதாமல், தற்போது டிபன் கேரியரில் பணமும் போகிறதாமே என்றும், ஒரு தெருவுக்கு இவ்வளவு என வாக்குகள் விலைபேசப்படுவதாக தவெக ஆட்சி அமைய ஆதரவு தெரிவித்த கூட்டணிக் கட்சிகளே குற்றம்சாட்டுவதற்கு முதலமைச்சர் என்ன பதில் சொல்லப் போகிறார் என்றும் காரசாரமாகக் கேட்டுள்ளார். இத்தோடு இந்த குதிரைவேக குதிரை பேரத்துக்கு முற்றுப்புள்ளி வைக்கப்படுமா அல்லது இனியும் டிவி கே ஹார்ஸ் டிரேடிங்கின் அடுத்த சீசன் தொடருமா என்றும் அவர் கேள்வி எழுப்பியுள்ளார்.

இறுதியாக, தூயசக்தி எனத் தம்பட்டம் அடித்த முதலமைச்சர் விஜய்யின் அரசியல் ரீல் இப்படி நான்கே மாதங்களில் அறுந்து தொங்கிவிட்டதாகக் கூறி மு.க.ஸ்டாலின் கடுமையாக விமர்சித்துள்ளார். 

இதையும் படிங்க: அவ்ளோ சர்வ சாதாரணமா வருது..!! மு.க. ஸ்டாலின் பேச்சுக்கு தமிழிசை சவுந்தரராஜன் கடும் கண்டனம்..!!