புது டெல்லியின் காற்று மாசு விவகாரம் இந்தக் குளிர்காலத்தில் மிக மோசமான நிலையை எட்டியுள்ளது. இதற்கு பிரதமர் நரேந்திர மோடி ஏன் மௌனமாக இருக்கிறார்? உங்கள் அரசு ஏன் அவசர நடவடிக்கை எடுக்கவில்லை? ஏன் திட்டமிடலோ, பொறுப்பேற்கலோ இல்லை? என்று மக்களவை எதிர்க்கட்சித் தலைவர் ராகுல் காந்தி கடுமையாகக் கேள்வி எழுப்பியுள்ளார். 

"இந்திய குழந்தைகள் நம் கண் முன்னே மூச்சுத் திணறிக் கொண்டிருக்கிறார்கள்" என்று சமூக வலைதளத்தில் பதிவிட்ட ராகுல், இதை "சுகாதார அவசரநிலை" என்று சுட்டிக்காட்டியுள்ளார். நாடாளுமன்றத்தில் உடனடி விவாதம் நடத்தி, கண்டிப்பான திட்டத்தை செயல்படுத்த வேண்டும் என்று வலியுறுத்தியுள்ளார்.

காங்கிரஸ் தலைவர் ராகுல் காந்தி, தனது X (முன்னர் ட்விட்டர்) பக்கத்தில் இன்று (நவம்பர் 28, 2025) வெளியிட்ட பதிவில், "என்னுடைய சந்திப்புகளில் நான் சந்திக்கும் ஒவ்வொரு தாயும் இதையே கேட்கிறார்கள்: 'எங்கள் குழந்தைகள் மாசடைந்த காற்றைத்தான் சுவாசிக்க வேண்டுமா?' அவர்கள் அதிருப்தியில், அச்சத்திலும் கோபத்திலும் உச்சத்தில் இருக்கிறார்கள்" என்று கூறியுள்ளார். 

இதையும் படிங்க: அதிகரிக்கும் காற்று மாசு!! டெல்லி மக்கள் அவதி! 75% வீடுகளில் ஒருவருக்கு சுவாச நோய்!

இந்தப் பதிவுடன், தனது இல்லத்தில் புது டெல்லியைச் சேர்ந்த சில தாய்மார்களுடன் நடத்திய உரையாடலின் வீடியோவையும் இணைத்துள்ளார். அந்த வீடியோவில், தாய்மார்கள் தங்கள் குழந்தைகளின் உடல்நலத்தைப் பற்றி வேதனையுடன் பேசுகின்றனர். "இந்த மாசு நம் குழந்தைகளை கொல்கிறது. அரசு ஏன் உடனடி சுகாதார எச்சரிக்கைகள் விடுக்கவில்லை? ஏன் தடுப்பு நடவடிக்கைகள் இல்லை?" என்று கேள்வி எழுப்புகின்றனர்.

ராகுல் காந்தி பதிலளிக்கையில், "மாசு தொடர்ந்து இருப்பதற்கு சில சக்திகள் இதில் பயனடைகின்றனர். அவர்கள் உண்மையான சரிசெய்தலை எதிர்க்கிறார்கள்" என்று விமர்சித்தார். அவர் மேலும், "மோடி அவர்களே, இந்திய குழந்தைகள் நம் கண் முன்னே மூச்சுத் திணறுகிறார்கள். எப்படி நீங்கள் மௌனமாக இருக்க முடியும்? உங்கள் அரசு ஏன் அவசரம் காட்டவில்லை, ஏன் திட்டமும் இல்லை, ஏன் பொறுப்பேற்கவில்லை?" என்று கேள்வி எழுப்பியுள்ளார். 

"நம் குழந்தைகள் தூய்மையான காற்றை சுவாசிக்க தகுதியானவர்கள். இதில் எந்த சமரசமும், கவனக்குறைவும் இல்லை" என்று வலியுறுத்தினார்.

புது டெல்லியின் காற்று தர குறியீடு (AQI) இன்று 384-ஐ எட்டியுள்ளது, இது "மிக மோசமான" நிலையைக் காட்டுகிறது. கடந்த 15 நாட்களாக இந்த மாசு தொடர்ந்து நீடித்து வருகிறது. பல்வேறு மானிட்டரிங் ஸ்டேஷன்கள் 400-ஐத் தாண்டியுள்ளன. இதனால், குழந்தைகள், ஆஸ்துமா நோயாளிகள், இதய நோயாளிகள் உள்ளிட்டவர்கள் கடுமையான உடல்நல பாதிப்புகளை சந்திக்கின்றனர். மருத்துவர்கள், "மாசு தொடர்பான உடல்நல பாதிப்புகளை ஆரம்பத்திலேயே கண்டறிய வழக்கமான சோதனைகள் தேவை" என்று எச்சரிக்கை விடுத்துள்ளனர்.

ராகுல் காந்தியின் இந்த விமர்சனம், மோடி அரசின் சுற்றுச்சூழல் கொள்கைகளுக்கு எதிரான புதிய சர்ச்சையைத் தூண்டியுள்ளது. காங்கிரஸ் கட்சி, "டெல்லி காற்று மாசுக்கு உடனடி கண்டிப்பான திட்டம் தேவை" என்று வலியுறுத்தி வருகிறது. 

இதற்கிடையில், ஆம் ஆத்மி கட்சி தலைவர் அரவிந்த் கெஜ்ரிவால், காற்று சுத்திகரிப்பு உபகரணங்களுக்கு 18% GST விதிப்பதை விமர்சித்து, "சுத்தமான காற்றும் தண்ணீரும் அடிப்படை உரிமை. அரசு தீர்வு கொடுக்காமல் வரி வசூலிக்கிறது" என்று கூறியுள்ளார்.

இந்த விவகாரம், வட இந்தியாவின் காற்று மாசு பிரச்சினையை மீண்டும் முன்னிலைப்படுத்தியுள்ளது. நாடாளுமன்ற குளிர்கால அமர்வுக்கு முன், இதற்கான விவாதம் நடக்க வேண்டும் என்ற கோரிக்கை வலுப்பெறுகிறது. ராகுலின் பதிவும் வீடியோவும் சமூக வலைதளங்களில் வைரலாகி, மக்கள் ஆதரவைப் பெறுகிறது. "நம் குழந்தைகளின் எதிர்காலத்தை காப்பாற்ற வேண்டும்" என்ற குரல்கள் எழுந்து வருகின்றன.

இதையும் படிங்க: 2 நாள் பயணம்..!! இந்தியா வருகிறார் ரஷ்ய அதிபர் புதின்..!! காரணம் இதுதான்..!!