மதுரை: ஆன்லைன் ரம்மி உள்ளிட்ட சூதாட்ட விளையாட்டுகளில் ஈடுபடுவோர் தங்கள் நற்பெயருக்கு களங்கம் ஏற்படுத்திக் கொள்வதுடன், சொத்துக்களையும் இழக்கும் அபாயம் உள்ளது என மதுரை உயர்நீதிமன்றக் கிளை எச்சரிக்கை விடுத்துள்ளது.

ஒரு தனியார் நிறுவனத்தில் பணிபுரியும் ஊழியர் ஒருவர் ஆன்லைன் ரம்மி விளையாட்டில் ஈடுபட்டு பெரும் தொகையை இழந்தார். பின்னர் அந்த பழக்கத்தை விட்டுவிட்டதாகக் கூறிய அவர், வருமான வரி தாக்கல் செய்யும்போது சூதாட்டம் தொடர்பான வருமானத்தை மறைத்தார். வருமான வரித் துறை விசாரணையில் அவர் ரூ.2 கோடியே 63 லட்சத்து 87 ஆயிரத்து 173 ரூபாய் வருமானத்தை மறைத்திருப்பது தெரியவந்தது. இதனால் கூடுதல் வரி மற்றும் அபராதம் விதிக்கப்பட்டது.

இதை எதிர்த்து அவர் மதுரை உயர்நீதிமன்றக் கிளையில் மனு தாக்கல் செய்தார். நீதிபதி டி.பரதசக்கரவர்த்தி வழக்கை விசாரித்து உத்தரவு பிறப்பித்தார்.

இதையும் படிங்க: நீதிமன்ற அதிகாரியை காக்க வைத்ததால் வினை! நாள்முழுவதும் கோர்ட்டில் காத்திருந்த ஐபிஎஸ் அருண்! பரபரப்பு பின்னணி!

“ஆன்லைன் ரம்மி போன்ற விளையாட்டுகளில் ஈடுபடுபவர்களின் கோரிக்கைகளுக்கு இந்த நீதிமன்றம் பொதுவாக செவி சாய்ப்பதில்லை. இத்தகைய விளையாட்டுகள் தனிப்பட்ட நற்பெயருக்கு பெரும் களங்கத்தை ஏற்படுத்தும். மேலும் சொத்துக்களை இழக்கும் நிலைக்கும் தள்ளும்” என நீதிபதி கடுமையாக எச்சரித்தார்.

எனினும், வருமான வரித் துறையின் கணக்கீட்டில் சில குறைபாடுகள் இருப்பதால் மனுதாரருக்கு மேல்முறையீடு செய்ய வாய்ப்பு அளித்து உத்தரவிட்டார். மனுதாரர் ரூ.1.99 கோடி இழந்த நிலையில், ரூ.54 லட்சம் மட்டுமே லாபம் ஈட்டியிருந்தார். வருமான வரித் துறை இந்த கணக்கீட்டில் தவறு செய்திருப்பதாக நீதிபதி சுட்டிக்காட்டினார். மேலும், வங்கிக் கணக்கு முடக்க உத்தரவையும் நீக்க உத்தரவிட்டார்.

ஆன்லைன் சூதாட்டத்தால் இளைஞர்கள் உள்ளிட்ட பலர் பெரும் நிதி இழப்பை சந்தித்து வரும் நிலையில், உயர்நீதிமன்றத்தின் இந்த எச்சரிக்கை முக்கியத்துவம் பெற்றுள்ளது. பொதுமக்கள், குறிப்பாக இளைஞர்கள் இத்தகைய விளையாட்டுகளில் இருந்து விலகி இருக்க வேண்டும் என சமூக ஆர்வலர்கள் வலியுறுத்துகின்றனர்.

இதையும் படிங்க: திருப்பரங்குன்றம் கோயிலில் விதிமீறலா? அமைச்சருக்காக நடை அடைப்பில் தாமதமா? அறிக்கை கேட்கும் ஹைகோர்ட்!