தமிழ்நாடு சட்டமன்றத் தேர்தல் 2026 நெருங்கி வரும் நிலையில், அரசியல் கட்சிகளின் பிரசாரம் தீவிரமடைந்துள்ளது. தேசிய ஜனநாயக கூட்டணி (என்டிஏ) தனது முதல் பொதுக்கூட்டத்தை செங்கல்பட்டு மாவட்டம் மதுராந்தகத்தில் இன்று (ஜனவரி 23, 2026) நடத்தவுள்ளது.
இந்தக் கூட்டத்தில் பிரதமர் நரேந்திர மோடி பங்கேற்று உரையாற்ற உள்ளார். இந்நிலையில், மத்திய அமைச்சரும் தமிழக பாஜக தேர்தல் பொறுப்பாளருமான பியூஷ் கோயல், செய்தியாளர்களிடம் பேசியபோது திமுகவை கடுமையாக விமர்சித்தார்.
பியூஷ் கோயல் கூறியதாவது: "திமுக அரசு மிகவும் மோசமாக செயல்பட்டு வருகிறது. இது ஒரு வாரிசு அரசியல், ஊழல் நிறைந்த மற்றும் திறமையற்ற அரசு. இந்தக் கட்சியில்தான் தேச விரோதி உதயநிதி ஸ்டாலின் போன்ற தலைவர்கள் உள்ளனர். ஊழல் மற்றும் வளர்ச்சிக்கு எதிரான சக்திகளைத் தோற்கடிக்க மக்கள் முடிவெடுத்துள்ளனர். தேசிய ஜனநாயகக் கூட்டணியால் திமுக அரசு தோற்கடிக்கப்படும்." இந்த விமர்சனங்கள் திமுக தரப்பில் பெரும் சர்ச்சையை ஏற்படுத்தியுள்ளன.
இதையும் படிங்க: தை இன்னும் முடியல!! 2 நாள் பொறுங்க!! கூட்டணி அறிவிப்பு எப்போது? ட்விஸ்ட் வைக்கும் ஓபிஎஸ்!
முன்னதாக, பிரதமர் மோடி தனது எக்ஸ் (ட்விட்டர்) பக்கத்தில் பதிவிட்டிருந்தார்: "ஊழல் திமுக அரசுக்கு விடைகொடுக்கும் காலம் வந்துவிட்டது என்று தமிழ்நாடு முடிவு செய்துவிட்டது." இந்த பதிவு தமிழக அரசியலில் பெரும் பரபரப்பை ஏற்படுத்தியது.
என்டிஏ கூட்டணியில் அதிமுக தலைமையில் பாஜக, பாமக (அன்புமணி ராமதாஸ்), அமமுக (டிடிவி தினகரன்), தமிழ் மாநில காங்கிரஸ் (ஜி.கே. வாசன்) உள்ளிட்ட கட்சிகள் இணைந்துள்ளன. இந்தக் கூட்டணி திமுகவுக்கு பெரும் சவாலாக உருவெடுத்துள்ளது.
மதுராந்தகம் கூட்டம் என்டிஏவின் முதல் பெரிய பிரசார நிகழ்வாக அமையும். பிரதமர் மோடி கேரளாவிலிருந்து சென்னை வந்து ஹெலிகாப்டர் மூலம் மதுராந்தகம் சென்று உரையாற்ற உள்ளார். இந்த நிகழ்வு தமிழக மக்களிடையே என்டிஏவின் வலிமையை காட்டும் என்று கூட்டணி தலைவர்கள் நம்பிக்கை தெரிவித்துள்ளனர்.
திமுக தரப்பில் இந்த விமர்சனங்களுக்கு பதிலடி கொடுக்கப்படும் என எதிர்பார்க்கப்படுகிறது. தேர்தல் நெருங்கும் நிலையில், இது போன்ற அரசியல் தாக்குதல்கள் மேலும் அதிகரிக்கும் என அரசியல் பார்வையாளர்கள் கருத்து தெரிவித்துள்ளனர்.
இதையும் படிங்க: 16 வயசுக்கு கம்மியா? சோஷியல் மீடியா யூஸ் பண்ண தடை!! ஆந்திர அரசு தீவிர ஆலோசனை!