சென்னை விமான நிலையத்தில் பிரம்மாண்டமான போலீஸ் அணிவகுப்பு மரியாதையுடன் முன்னாள் தமிழக கவர்னர் ஆர்.என். ரவி வழியனுப்பப்பட்டார். தனது குடும்பத்தினருடன் டெல்லி சென்ற அவருக்கு, தமிழக போலீஸ் துறை சார்பில் மரியாதை அளிக்கப்பட்டது. இந்த நிகழ்வு அரசியல் வட்டாரத்தில் பெரும் கவனத்தை ஈர்த்துள்ளது.
2021 செப்டம்பரில் பீகார் கேடர் ஐபிஎஸ் அதிகாரியாக இருந்த ரவி தமிழக கவர்னராக நியமிக்கப்பட்டார். பதவிக் காலத்தில் இந்திய விடுதலை போராட்ட வீரர்களை கௌரவிக்கும் நிகழ்வுகளை தீவிரமாக முன்னெடுத்தார். ஒவ்வொரு நிகழ்ச்சியிலும் இந்திய பாரம்பரியம், தமிழக கலாசாரம், தமிழ் மொழி ஆகியவற்றை பெருமிதத்துடன் பேசினார். ஆனால் தமிழக அரசுடன் அவருக்கு ஏற்பட்ட மோதல்கள் பல்வேறு விவகாரங்களில் தொடர்ந்தன.
பல்கலைக்கழக துணை வேந்தர் நியமனங்கள், சட்டசபை உரை, சட்ட மசோதாக்கள் ஒப்புதல், சிறப்பு அனுமதி சட்டங்கள் என பல்வேறு விஷயங்களில் கவர்னர் ரவி அரசுக்கு எதிரான நிலைப்பாட்டை எடுத்தார். இதனால் தமிழக அரசுக்கும் கவர்னருக்கும் இடையே பனிப்போர் உருவானது. பல சமயங்களில் இரு தரப்பும் பகிரங்கமாக மோதிக்கொண்டன.
இதையும் படிங்க: “ஸ்டாலினை பிடித்த சனியன் தொலைந்தது” - ஆளுநர் ஆர்.என்.ரவியை தாறுமாறாக விமர்சித்த லியோனி...!
சமீபத்தில் மேற்கு வங்க கவர்னர் சி.வி. ஆனந்த போஸ் ராஜினாமா செய்ததைத் தொடர்ந்து, ரவி மேற்கு வங்க கவர்னராக மாற்றப்பட்டார். தமிழக கவர்னர் பதவியை கேரள கவர்னர் ராஜேந்திர அர்லேகர் கூடுதலாக கவனிக்க உள்ளார். இந்நிலையில் ரவி தனது குடும்பத்தினருடன் டெல்லி புறப்பட்டார்.
சென்னை விமான நிலையத்தில் அவருக்கு போலீஸ் அணிவகுப்பு மரியாதை அளிக்கப்பட்டது. போலீஸ் அதிகாரிகள், காவலர்கள் வரிசையாக நின்று மரியாதை செலுத்தினர். இந்த நிகழ்வு கவர்னர் ரவியின் பதவிக்காலத்தை முடிவுக்கு கொண்டுவரும் சின்னமாக பார்க்கப்படுகிறது. தமிழகத்தில் அவரது பதவிக்காலம் சர்ச்சைகளுடன் முடிந்தாலும், இறுதியில் அரசு சார்பில் மரியாதை அளிக்கப்பட்டது குறிப்பிடத்தக்கது.
ரவியின் புதிய பதவியில் மேற்கு வங்கத்தில் என்ன நடக்கும் என்பது இப்போது அரசியல் வட்டாரத்தில் ஆர்வத்தை ஏற்படுத்தியுள்ளது.
இதையும் படிங்க: ஆர்.எஸ்.எஸ் தொண்டர்; பாஜக விசுவாசி... பொறுப்பு ஆளுநர் ராஜேந்திர விஸ்வநாத் அர்லேகரின் பரபரப்பு பிண்ணணி...!!