புதுச்சேரியில் ஆளும் என்.ஆர். காங்கிரஸ் கட்சியின் தலைவரும் முதலமைச்சருமான என். ரங்கசாமி, நடிகர் விஜய்யின் தமிழக வெற்றிக் கழகத்துடன் (தவெக) கூட்டணி அமைக்கும் திட்டத்தில் இருப்பதாக தகவல்கள் வெளியாகியுள்ளன. தற்போது பாஜகவுடன் உள்ள கூட்டணியில் ஏற்பட்டுள்ள பிரச்சனைகளுக்கு தீர்வு காண முடியாத நிலையில், மாற்று ஏற்பாடாக தவெகவை நோக்கி ரங்கசாமி தனது கவனத்தைத் திருப்பியுள்ளார்.

2021 தேர்தலில் என்.ஆர். காங்கிரஸ் - பாஜக கூட்டணி வெற்றி பெற்று ரங்கசாமி முதலமைச்சரானார். ஆனால் ஐந்தாண்டு கால ஆட்சியிலும் இரு கட்சிகளுக்கும் இடையே மோதல்கள் தொடர்ந்தன. 2026 தேர்தலுக்குப் பிறகும் இந்தப் பிரச்சனை தீர்க்கப்படாமல் உள்ளது. என்.ஆர். காங்கிரஸ் 16 தொகுதிகளில் போட்டியிட்டு 12 இடங்களில் வெற்றி பெற்றது. பாஜக 10 தொகுதிகளில் போட்டியிட்டு 4 இடங்களை மட்டுமே கைப்பற்றியது.

தேர்தலுக்குப் பிறகு கூட்டணி ஆட்சி அமைந்தாலும் பிரச்சனைகள் முடிவுக்கு வரவில்லை. அமைச்சர்களுக்கு இலாகா ஒதுக்கீடு இன்னும் நடைபெறவில்லை. முதலமைச்சர் ரங்கசாமியே அனைத்துத் துறைகளையும் நிர்வகித்து வருகிறார். சபாநாயகர், துணை சபாநாயகர் பதவிகள் குறித்தும் இழுபறி நீடிக்கிறது. 

இதையும் படிங்க: இலாகா ஒதுக்குவதில் இழுபறி! முடங்கியது அரசு நிர்வாகம்! புதுச்சேரி அரசியலில் வீசும் புயல்!

பாஜகவுக்கு எம்.எல்.ஏ.க்கள் எண்ணிக்கை குறைந்ததால் துணை சபாநாயகர் பதவியை ஏற்க மறுப்பதாகவும், என்.ஆர். காங்கிரஸ் தரப்பில் புகார்கள் எழுந்துள்ளன. பிரசாரத்தின்போதே இரு தரப்புக்கும் இடையே மனக்கசப்பு ஏற்பட்டதாகக் கூறப்படுகிறது.

இந்த நிலையில் தவெக கட்சி 3 எம்.எல்.ஏ.க்களுடன் சட்டசபைக்கு வந்துள்ளது. ரங்கசாமி இரண்டு தொகுதிகளில் வெற்றி பெற்று ஒன்றை ராஜினாமா செய்ததால் தற்போது சட்டசபையில் 29 உறுப்பினர்கள் உள்ளனர். ஆட்சி அமைக்க 15 எம்.எல்.ஏ.க்களின் ஆதரவு போதுமானது. என்.ஆர். காங்கிரஸின் 11 உறுப்பினர்கள், தவெகவின் 3 உறுப்பினர்கள், அதிமுகவின் 1 உறுப்பினர் மற்றும் 2 சுயேச்சைகளின் ஆதரவுடன் 17 எம்.எல்.ஏ.க்களை திரட்ட முடியும் என்பதால் பாஜகவின் ஆதரவு இல்லாமலேயே ஆட்சியை தக்க வைக்கும் வாய்ப்பு ரங்கசாமிக்கு உள்ளது.

கடந்த தேர்தலில் வேறு வாய்ப்பு இல்லாததால் பாஜகவுடன் கூட்டணி வைத்த ரங்கசாமி, இம்முறை தவெகவுடன் இணைந்து ஆட்சி நடத்தும் திட்டத்தில் இருப்பதாக செய்திகள் வெளியாகியுள்ளன. இதனால் புதுச்சேரி அரசியல் களம் பரபரப்பாக மாறியுள்ளது. அடுத்த சில நாட்களில் முக்கிய முடிவுகள் எடுக்கப்படலாம் என எதிர்பார்க்கப்படுகிறது.

இதையும் படிங்க: முக்கிய துறைகளை குறி வைக்கும் பாஜக! இலாகா ஒதுக்குவதில் நீடிக்கும் இழுபறி! புதுவை அரசியலில் புயல்!