மக்களவை எதிர்க்கட்சித் தலைவர் ராகுல் காந்தி வரும் 10ம் தேதி சென்னை வருகிறார். கல்லூரி மாணவர்களை சந்திக்கும் வகையில், ‘மாணவர்களின் குரல்’ என்ற பெயரில் நடைபெறும் நிகழ்ச்சியில் அவர் பங்கேற்க உள்ளார். இந்த நிகழ்ச்சியை முன்னிட்டு தமிழக அரசியல் வட்டாரங்களில் பல்வேறு எதிர்பார்ப்புகள் ஏற்பட்டுள்ளன.

ராகுல் காந்தியின் சென்னை பயணத்தின்போது, தமிழக முதல்வரும் த.வெ.க., தலைவருமான விஜய்யை அவர் சந்திப்பாரா என்ற கேள்வி எழுந்துள்ளது. விஜய்யை சந்திப்பதற்காக காங்கிரஸ் தரப்பில் நேரம் கேட்கப்பட்டதாக கூறப்படும் நிலையில், இதுவரை சந்திப்புக்கான நேரம் உறுதி செய்யப்படவில்லை.

இதற்கிடையே, தமிழகத்தில் வாக்காளர் சிறப்பு தீவிர திருத்தப் பணி தொடர்பாக எதிர்க்கட்சிகள் சார்பில் டெல்லியில் ஆலோசனை நடைபெற்றது. தமிழகத்தில் த.வெ.க. தலைமையிலான ஆட்சிக்கு காங்கிரஸ் ஆதரவு அளித்து வருவதால், அந்த ஆலோசனையில் பங்கேற்க த.வெ.க.வுக்கும் அழைப்பு விடுக்கப்பட்டதாக கூறப்படுகிறது.

இதையும் படிங்க: டெல்லி போராட்டத்தில் போலீஸ் மீது தாக்குதல்? ராகுல் காந்தி, பிரியங்கா மீது 3 பாய்ந்தது வழக்கு! டெல்லியில் பரபரப்பு!

ஆனால் அந்தக் கூட்டத்தில் த.வெ.க. பங்கேற்கவில்லை. அதே நேரத்தில், த.வெ.க. கூட்டணியில் இடம்பெற்றுள்ள விடுதலை சிறுத்தைகள் கட்சி, ம.தி.மு.க. உள்ளிட்ட கட்சிகளின் பிரதிநிதிகள் கலந்து கொண்டனர்.

மதுராந்தகம், தாராபுரம் இடைத்தேர்தல் பிரசாரத்திலும் கூட்டணி கட்சிகள் இணைந்து நடத்திய நிகழ்ச்சிகளில் விஜய் பங்கேற்காமல், தனியாக பிரசாரம் செய்ததாக கூறப்படுகிறது. இந்த பின்னணியில் ராகுல்–விஜய் சந்திப்பு நடைபெறுமா என்பது கூடுதல் கவனம் பெற்றுள்ளது.

இளம் தலைமுறை வாக்காளர்களை குறிவைத்து ராகுலின் மாணவர் சந்திப்பு நிகழ்ச்சி நடைபெறுவதாக காங்கிரஸ் வட்டாரங்கள் தெரிவிக்கின்றன. இந்நிலையில், விஜய்யை ராகுல் சந்திப்பது இரு கட்சிகளுக்கும் அரசியல் ரீதியாக முக்கியத்துவம் பெறும் எனவும் கூறப்படுகிறது.

ஆனால் சந்திப்பு நடைபெறாமல் போனால், த.வெ.க. தனித்த அரசியல் அடையாளத்துடன் செயல்பட விரும்புகிறது என்ற கருத்து வலுப்பெறலாம் என அரசியல் வட்டாரங்களில் பேசப்படுகிறது.

இதற்கிடையே வரும் 11ம் தேதி பிரதமர் நரேந்திர மோடி சென்னைக்கு வருகிறார். பல்வேறு நிகழ்ச்சிகளில் பங்கேற்கும் பிரதமர் மோடியுடன் நடைபெறும் நிகழ்ச்சியில் முதல்வர் விஜய்யும் பங்கேற்க உள்ளதாக கூறப்படுகிறது. ராகுல் காந்தியை சந்திப்பது உறுதி செய்யப்படாத நிலையில், பிரதமர் மோடியுடன் விஜய் பங்கேற்கும் நிகழ்வு தமிழக அரசியலில் புதிய விவாதத்தை ஏற்படுத்தியுள்ளது.

மேலும், தேர்தல் கமிஷனர் ஞானேஷ்குமார் பதவி விலக வலியுறுத்தி எதிர்க்கட்சிகள் நடத்திய போராட்டத்தில் ராகுல் காந்தி உள்ளிட்ட காங்கிரஸ் தலைவர்கள் கைது செய்யப்பட்ட சம்பவமும் அரசியல் கவனம் பெற்றுள்ளது. கடந்த காலத்தில் ராகுல் கைது செய்யப்பட்டபோது விஜய் கண்டனம் தெரிவித்திருந்த நிலையில், தற்போதைய சம்பவத்தில் அவரது நிலைப்பாடு குறித்தும் விவாதம் எழுந்துள்ளது.

இந்த சூழலில், த.வெ.க. தனது அரசியல் பாதையை தனித்த அடையாளத்துடன் முன்னெடுக்க திட்டமிட்டுள்ளதாக அக்கட்சி வட்டாரங்கள் தெரிவிக்கின்றன. ராகுல் காந்தியின் சென்னை பயணம், விஜய்யுடனான சந்திப்பு மற்றும் மோடியுடன் நடைபெறும் நிகழ்ச்சி என அடுத்தடுத்த அரசியல் நிகழ்வுகள் தமிழக அரசியலில் பரபரப்பை ஏற்படுத்தியுள்ளன.

இதையும் படிங்க: கரப்பான்பூச்சி மக்கள் கட்சியை காப்பி அடிக்கிறதா காங்கிரஸ்? கிண்டல் செய்யும் எதிர்க்கட்சிகள்! டெல்லியில் பரபரப்பு!