தமிழக சட்டமன்றத் தேர்தல் 2026 நெருங்கி வரும் நிலையில், கூட்டணி அரசியல் மிகுந்த பரபரப்புடன் நடைபெற்று வருகிறது. குறிப்பாக காங்கிரஸ் கட்சியைச் சுற்றி ஏற்பட்டுள்ள இரட்டை ஆஃபர் நாடகம் தமிழக அரசியல் வட்டாரத்தில் பெரும் விவாதத்தை ஏற்படுத்தியுள்ளது.

நடிகர் விஜய் தலைமையிலான தமிழக வெற்றிக் கழகம் (தவெக) தரப்பிலிருந்து காங்கிரஸ் மேலிடத்துக்கு அனுப்பப்பட்ட அதிரடி முன்மொழிவு இந்தப் பரபரப்புக்கு முக்கிய காரணமாக உள்ளது. நம்பத்தகுந்த வட்டாரத் தகவல்களின்படி, தவெக தரப்பு காங்கிரஸுக்கு 100 சட்டமன்றத் தொகுதிகள் ஒதுக்கீடு செய்வதுடன், ஆட்சி அமைந்தால் துணை முதலமைச்சர் பதவியும், ஆட்சியில் கணிசமான பங்கும் வழங்குவதாக உறுதியளித்துள்ளது. 

இந்தப் பிரம்மாண்டமான ஆஃபர் ராகுல் காந்தியை ஆழ்ந்த யோசனையில் ஆழ்த்தியுள்ளது. திமுகவுடன் தொடர்ந்தால் வெற்றி வாய்ப்பு அதிகம் என்றாலும் ஆட்சியில் பெரிய பங்கு கிடைக்காது; விஜய்யுடன் இணைந்தால் காங்கிரஸ் தமிழகத்தில் மீண்டும் பெரிய அளவில் செல்வாக்கு பெற முடியும் என்ற இரு வழிகளை ராகுல் காந்தி தீவிரமாக பரிசீலித்து வருவதாகத் தெரிகிறது.

இதையும் படிங்க: திமுக கூட ரொம்ப உறவாடாதீங்க! காங்., மாவட்ட தலைவர்களுக்கு மேலிடம் போட்ட வாய்மொழி உத்தரவு!

இந்த சூழலில் தான் முதலமைச்சர் மு.க. ஸ்டாலின் காங்கிரஸை தக்க வைப்பதற்காக புதிய வியூகத்தை வகுத்துள்ளார். டெல்லியில் உள்ள காங்கிரஸ் உயர்மட்டத்துக்கு திமுக தரப்பிலிருந்து மிகத் தெளிவான செய்தி அனுப்பப்பட்டுள்ளது. 

அதில் காங்கிரஸுக்கு 25 முதல் 28 தொகுதிகள் (அதிகபட்சம் 30 தொகுதிகள் வரை) ஒதுக்கப்படும் என்றும், ஆனால் அமைச்சரவையில் எந்தப் பங்கும் வழங்க முடியாது என்றும் உறுதியாகத் தெரிவிக்கப்பட்டுள்ளது. அமைச்சரவைப் பதவிகளுக்கு பேச்சுக்கே இடமில்லை என்ற நிலைப்பாட்டை ஸ்டாலின் தெளிவாக வலியுறுத்தியுள்ளார்.

அதே சமயம் காங்கிரஸை கௌரவப்படுத்தும் வகையில் மாற்று அதிகாரப் பகிர்வு திட்டங்கள் முன்வைக்கப்பட்டுள்ளன. தமிழக சட்டமன்றத்தின் கௌரவமிக்க இரண்டாவது பதவியான துணை சபாநாயகர் பதவி காங்கிரஸ் சட்டமன்ற உறுப்பினருக்கு வழங்கப்படும். மேலும் செல்வாக்குமிக்க ஐந்து அரசு வாரியத் தலைவர் பதவிகள் காங்கிரஸுக்கு ஒதுக்கப்படும். 

பல்கலைக்கழக சிண்டிகேட் உறுப்பினர்கள், நலவாரியத் தலைவர்கள், கார்ப்பரேஷன் நியமனங்கள் உள்ளிட்ட பல்வேறு நியமனப் பதவிகளில் காங்கிரஸுக்கு கணிசமான இடங்கள் ஒதுக்கப்படும். வரும் உள்ளாட்சித் தேர்தலில் காங்கிரஸின் பலத்தை நிரூபிக்கும் வகையில் கூடுதல் இடங்கள் வழங்கப்படும் என்றும் உறுதியளிக்கப்பட்டுள்ளது.

திமுக மூத்த நிர்வாகிகள் ஒருவர் கூறுகையில், “காங்கிரஸை நாங்கள் மதிக்கிறோம். ஆனால் திராவிடக் கட்சிகளின் தனிப்பெரும் பெரும்பான்மை என்ற கொள்கையில் சமரசம் செய்ய முடியாது. துணைச் சபாநாயகர் பதவி, வாரியத் தலைவர் பதவிகள் போன்றவை மிகப்பெரிய அங்கீகாரம். இதை ஏற்றுக்கொள்வதும் நிராகரிப்பதும் அவர்கள் கையில்தான் உள்ளது” என்றார்.

விஜய் தரப்பு கொடுத்துள்ள துணை முதலமைச்சர் பதவி போன்ற பகட்டான வாக்குறுதியை நம்பி காங்கிரஸ் வெளியேறுமா? அல்லது ஸ்டாலின் வழங்கும் இந்த நிச்சயமான அதிகாரப் பகிர்வை ஏற்றுக்கொண்டு பழைய கூட்டணியிலேயே தொடருமா? என்ற கேள்வி தற்போது ராகுல் காந்தியின் முடிவில் தங்கியுள்ளது. 

இரு தரப்பு ஆஃபர்களும் காங்கிரஸ் உயர்மட்டத்தில் பெரும் விவாதத்தை ஏற்படுத்தியுள்ளன. அடுத்த சில நாட்களில் காங்கிரஸ் இறுதி முடிவு எடுக்கும் என எதிர்பார்க்கப்படுகிறது. இந்த முடிவு தமிழக அரசியலின் போக்கை மாற்றும் முக்கிய தருணமாக அமையும்.

இதையும் படிங்க: காங்கிரஸை உடைக்க விஜய் திட்டம்!! கதறும் கதர் வேட்டிகள்! தவெகவுக்கு தாவ தயாராகும் முக்கிய புள்ளிகள்!