சென்னை: டிசம்பர் 1-ம் தேதி தொடங்கும் பாராளுமன்ற குளிர்காலக் கூட்டத் தொடரை முன்னிட்டு, திமுக தலைவரும் முதலமைச்சருமான மு.க. ஸ்டாலின் இன்று (நவம்பர் 29, 2025) அண்ணா அறிவாலயத்தில் கட்சியின் மக்களவை மற்றும் மாநிலங்களவை உறுப்பினர்களுடன் முக்கிய ஆலோசனைக் கூட்டத்தை நடத்துகிறார். “இந்தக் கூட்டத் தொடரில் எந்தெந்த பிரச்சினைகளை எழுப்ப வேண்டும், எப்படி மத்திய அரசை வளைக்க வேண்டும்” என்பது குறித்து விரிவான உத்தி தீட்டப்படுகிறது.
கூட்டத்தில் கனிமொழி, டி.ஆர். பாலு, தயாநிதி மாறன், ஆ. ராசா, எஸ்.எஸ். பழனிமாணிக்கம், கலாநிதி வீராசாமி உள்ளிட்ட அனைத்து திமுக எம்பிக்களும் பங்கேற்றுள்ளனர். இது தவிர, ஒவ்வொரு எம்பியும் கடந்த இரண்டு மாதங்களில் செய்த பணிகள் குறித்த விரிவான அறிக்கையை ஸ்டாலினிடம் சமர்ப்பிக்க வேண்டும் என்று கட்சி முன்பே அறிவித்திருந்தது. அதன்படி இன்றைய கூட்டத்தில் அந்த அறிக்கைகளையும் ஸ்டாலின் ஆய்வு செய்கிறார்.
கூட்டத் தொடரில் திமுக எழுப்பவுள்ள முக்கிய விவகாரங்கள்:
- தமிழ்நாட்டுக்கு உரிய நிதி பங்கு வழங்கப்படாதது
- நீட் தேர்வு ரத்து, மாநில உரிமைகள் பறிப்பு
- காவிரி, முல்லைப் பெரியாறு நீர் பிரச்சினைகள்
- வடகிழக்குப் பருவமழை வெள்ள நிவாரண நிதி உடனடி வழங்கல்
- புதிய கல்விக் கொள்கை திணிப்பு
திமுக வட்டாரங்கள் தெரிவிக்கையில், “இந்த முறை மத்திய அரசை கடுமையாக விளாசத் திட்டமிட்டுள்ளோம். ஸ்டாலின் நேரடியாக உத்தி தருகிறார். ஒவ்வொரு எம்பியும் தினமும் ஒரு பிரச்சினையை எழுப்ப வேண்டும் என்று உத்தரவிட்டுள்ளதாக ” கூறினர்.
இதையும் படிங்க: ‘வந்தே மாதரம்’ 150! பார்லி.,யில் ஒருநாள் முழுக்க விவாதம்! எதிர்க்கட்சிகளை மடக்க மோடி ‘மாஸ்டர் ஸ்ட்ரோக்’!
கடந்த பட்ஜெட் கூட்டத் தொடரிலும் ஸ்டாலின் இதேபோல் எம்பிக்களை அழைத்து உத்தி போட்டார். அதனால் திமுக எம்பிக்கள் தொடர்ந்து மத்திய அரசை கேள்விகளால் துளைத்து வந்தனர். இந்த முறையும் அதே வேகத்தில் தாக்குதல் நடத்த திமுக தயாராகி வருகிறது.
இதையும் படிங்க: ஜெய்ஹிந்த், வந்தே மாதரம் கோஷம் கூடாது!! பார்லி கூட்டத்தொடரில் வந்தது புது ரூல்ஸ்! எம்.பிக்களுக்கு அட்வைஸ்!