டெல்லி: “வந்தே மாதரம்” தேசபக்தி பாடல் இயற்றப்பட்டு 150 ஆண்டுகள் நிறைவடைந்ததை முன்னிட்டு, வரும் டிசம்பர் 1-ம் தேதி தொடங்கும் பார்லிமென்ட் குளிர்கால கூட்டத் தொடரில் ஒரு முழு நாள் இரு அவைகளிலும் (லோக்சபா & ராஜ்யசபா) சிறப்பு விவாதம் நடத்த மத்திய அரசு முடிவு செய்துள்ளது. இந்த அறிவிப்பு, எதிர்க்கட்சிகளை “ரகளை செய்தால் தேசபக்தி எதிரிகள்” என்று முத்திரை குத்தும் அரசியல் ஆயுதமாக மாறியுள்ளது.

வங்கக் கவிஞர் பங்கிம் சந்திர சட்டர்ஜி 1875 நவம்பர் 7-ல் ‘பங்காதர்ஷன்’ இதழில் முதலில் வெளியிட்ட இந்தப் பாடல், 1882-ல் அவரது ‘ஆனந்தமடம்’ நாவலில் இடம்பெற்று தேசிய கீதமாக உருவெடுத்தது. ரவீந்திரநாத் தாகூர் இசையமைத்த இந்தப் பாடல், சுதந்திர போராட்டத்தில் லட்சோபலட்சம் இந்தியர்களுக்கு உத்வேகம் அளித்தது. 

இதன் 150-வது ஆண்டு கொண்டாட்டங்களை கடந்த மாதம் 7-ம் தேதி பிரதமர் மோடி தொடங்கி வைத்தார். ஒரு வருடம் தொடரும் இந்தக் கொண்டாட்டங்களின் உச்சமாக, பார்லிமென்ட்டில் ஒரு நாள் முழுக்க விவாதம் நடத்த மத்திய அரசு திட்டமிட்டுள்ளது.

இதையும் படிங்க: ஒரு வருஷம் கொண்டாட்டம்தான்!! மத்திய அரசின் பக்கா ப்ளான்! வந்தாச்சு சூப்பர் உத்தரவு!

குளிர்கால கூட்டத் தொடர் தொடங்கும் முதல் இரண்டு நாட்கள் பொதுவாக வாக்குவாதம், ரகளை, அமளியால் நிறைந்திருக்கும். அதை முறியடிக்கும் வியூகமாக, “வந்தே மாதரம்” விவாதத்தை முதல் அல்லது இரண்டாவது நாளே நிர்ணயிக்க மத்திய அரசு திட்டமிட்டுள்ளதாக தகவல் வெளியாகி உள்ளது. 

தேசபக்தி சார்ந்த விவகாரம் என்பதால், எதிர்க்கட்சிகள் ரகளையில் இறங்கினால் “தேசப்பற்று இல்லாதவர்கள்” என்ற குற்றச்சாட்டை சந்திக்க நேரிடும். இதனால், காங்கிரஸ், திமுக, திரிணாமுல், சமாஜ்வாடி உள்ளிட்ட இண்டியா கூட்டணி கட்சிகள் திணறி வருகின்றன.

அரசு வட்டாரங்கள் தெரிவிப்பதாவது: “விவாதத்தின்போது ‘வந்தே மாதரம்’ பாடலின் வரலாறு, சுதந்திர போராட்டத்தில் அதன் பங்கு, இன்றைய இளைஞர்களுக்கு அதன் முக்கியத்துவம் ஆகியவை பேசப்படும். முடிவில் இரு அவைகளும் இணைந்து ‘வந்தே மாதரம்’ பாடலை பாடுவதற்கும் ஏற்பாடு செய்யப்பட்டுள்ளது.” இதற்கு எதிர்க்கட்சிகள் ஒத்துழைக்காவிட்டால், அது தொலைக்காட்சியில் நேரலையாக ஒளிபரப்பப்பட்டு, மக்கள் மத்தியில் பெரும் எதிர்வினையை ஏற்படுத்தும் என்று பாஜக தலைமை நம்புகிறது.

கடந்த 2017-லும் ‘வந்தே மாதரம்’ 135-வது ஆண்டு கொண்டாட்டத்தின்போது பார்லிமென்ட்டில் சிறப்பு விவாதம் நடத்தப்பட்டது. இப்போது 150-வது ஆண்டு என்பதால், இன்னும் இரட்டிப்பு உற்சாகத்துடன் மத்திய அரசு செயல்படுகிறது. 

“இது வெறும் கொண்டாட்டம் மட்டுமல்ல… எதிர்க்கட்சிகளை அரசியல் ரீதியாக மடக்கும் மாஸ்டர் ஸ்ட்ரோக்” என்று டெல்லி அரசியல் வட்டாரங்கள் பரபரப்பாக பேசுகின்றன.

இதையும் படிங்க: வந்தே மாதரம் பாடலின் 150வது ஆண்டு விழா!! கொண்டாட்டத்தை துவக்கி வைத்தார் மோடி!! சிறப்பு தபால் தலை, நாணயம் வெளியீடு!