சென்னையின் மூன்றாவது முனையமாகத் திகழும் தாம்பரம் ரயில் நிலையத்தில், இன்று அதிக அளவிலான பயணிகள் பயணம் செய்து வருகின்றனர். குறிப்பாக, தென் மாவட்டங்களுக்குச் செல்லும் பயணிகளின் எண்ணிக்கை அதிகமாக உள்ளது.

விஜயதசமி மற்றும் ஆயுத பூஜையை முன்னிட்டு, தொடர்ந்து நான்கு நாட்கள் விடுமுறை கிடைத்துள்ளதால், ஏராளமானோர் பயணம் மேற்கொண்டு வருகின்றனர்.

இந்நிலையில், ஜிஎஸ்டி சாலையின் மேற்குப் பகுதியில் இருந்து, பயணிகள் நகரும் படிக்கட்டுகள் (எஸ்கலேட்டர்) மூலம் மேலேறி, ஸ்கைவாக் எனப்படும் இரும்பு நடைபாதை வழியாக ரயில் நிலைய நடைமேடைக்குச் செல்கின்றனர்.

இதையும் படிங்க: ஞானேஷ் குமாருக்கு வலுக்கும் எதிர்ப்பு..! எழும்பூரில் ரயில் மறியல்... குண்டுக்கட்டாக கைது..!!

ஆனால், தற்போது அந்தப் பகுதி முழுவதும் மின்சாரம் துண்டிக்கப்பட்டு இருளில் மூழ்கியுள்ளது. மேலும், நகரும் படிக்கட்டுகளும் செயல்படவில்லை. இதனால், ரயில் பயணிகள் மற்றும் பேருந்து நிலையத்திற்கு வரும் பயணிகள் கடுமையாகப் பாதிக்கப்பட்டுள்ளனர்.

வயதானவர்கள், குழந்தைகளுடன் வருபவர்கள் மற்றும் சுமைகளை எடுத்துச் செல்பவர்கள், இருளில் படிக்கட்டுகளைத் தடவித் தடவி நடந்து செல்லும் நிலை ஏற்பட்டுள்ளது.

அதேபோல், சுமார் அரை கிலோமீட்டர் நீளமுள்ள ஸ்கைவாக் இரும்பு நடைபாதையிலும் பயணிகள் இருளிலேயே நடந்து செல்லும் காட்சிகளைக் காண முடிகிறது.

ரயில்வே நிர்வாகம் மற்றும் நெடுஞ்சாலைத் துறை அதிகாரிகளின் அலட்சியப் போக்கால், நகரும் படிக்கட்டுகள் அடிக்கடி இதுபோன்ற பாதிப்புகளைச் சந்திப்பதாகப் பயணிகள் குற்றம்சாட்டுகின்றனர். மேலும், மின்சார வசதியை முறையாகப் பராமரிக்காததால்தான் இதுபோன்ற சிரமங்கள் ஏற்படுவதாகவும் தெரிவிக்கின்றனர்.

அதிக அளவில் பயணிகள் வந்து செல்லும் இதுபோன்ற முக்கியமான நாட்களில், பயணிகள் இத்தகைய சிரமங்களுக்கு ஆளாகியிருப்பது பெரும் பரபரப்பை ஏற்படுத்தியுள்ளது.

இதையும் படிங்க: #BREAKING விடிந்ததுமே இடியை இறக்கிய விஜய் அரசு... 450 மருத்துவ பணியாளர்கள் மீது பாய்ந்தது வழக்கு...!