தமிழகத்தில் பணிபுரியும் பெண்களுக்காக செயல்படுத்தப்பட்டு வரும் ‘தோழி’ மகளிர் விடுதிகளுக்கான புதிய கட்டடங்களை சமூக நலத்துறையின் கீழ் செயல்படும் நிறுவனம் தானே கட்டிக்கொள்ள விருப்பம் தெரிவித்துள்ளதாக தகவல் வெளியாகியுள்ளது. இதனால், அரசுத் துறைகளுக்கான கட்டடங்களை கட்டும் முக்கிய பொறுப்பை வகித்து வரும் பொதுப்பணித்துறையின் பணி குறித்து புதிய விவாதம் எழுந்துள்ளது.

கடந்த அ.தி.மு.க. ஆட்சிக் காலத்தில் சமூக நலத்துறையின் கீழ் பணிபுரியும் மகளிர் விடுதிகள் நிறுவனம் தொடங்கப்பட்டது. இதன் மூலம் நகர்ப்புறங்களில் வேலைக்குச் செல்லும் பெண்களுக்கு குறைந்த கட்டணத்தில் பாதுகாப்பான தங்குமிட வசதி வழங்கும் வகையில் ‘தோழி’ என்ற பெயரில் விடுதிகள் செயல்பட்டு வருகின்றன.

தொடர்ந்து தி.மு.க. ஆட்சியில் இந்தத் திட்டம் விரிவுபடுத்தப்பட்டது. தற்போது 20 மாவட்டங்களில் செயல்படும் 25 மகளிர் விடுதிகளில் 2,300-க்கும் மேற்பட்ட பெண்கள் தங்கி வருவதாக கூறப்படுகிறது. மேலும், 14 மாவட்டங்களில் புதிய மகளிர் விடுதிகளை அமைப்பதற்கான பணிகளும் நடைபெற்று வருகின்றன.

இதையும் படிங்க: ரேஷன் பருப்பு கொள்முதலில் ரூ.187 கோடி மிச்சம்! திமுக ஆட்சியில் அதிக விலை கொடுத்தது அம்பலம்!!

இந்த நிலையில், புதிதாக அமைக்கப்பட உள்ள விடுதிகளுக்கான கட்டடங்களை பொதுப்பணித்துறை மூலம் கட்டுவதற்கு பதிலாக, தாங்களே கட்டிக்கொள்ள சமூக நலத்துறை விருப்பம் தெரிவித்துள்ளதாக கூறப்படுகிறது.

இதற்கான அதிகாரம் அந்த நிறுவனத்துக்கு இருந்தாலும், பொதுப்பணித்துறையைப் போன்று போதுமான பொறியாளர்கள் மற்றும் தொழில்நுட்ப கட்டமைப்பு இல்லை என அதிகாரிகள் சுட்டிக்காட்டுகின்றனர்.

பொதுவாக அரசு கட்டடங்களுக்கான திட்டம், ஒப்பந்தப்புள்ளி, கட்டுமானம், பணியின் தரத்தை ஆய்வு செய்தல் உள்ளிட்ட பணிகளை பொதுப்பணித்துறை மேற்கொள்கிறது. கட்டுமானம் முடிந்த பிறகு கட்டடத்தின் தரம் தொடர்பாக ஆய்வு செய்து அரசிடம் அறிக்கையும் சமர்ப்பிக்கப்படுகிறது.

ஆனால், மகளிர் விடுதி நிறுவனமே கட்டுமான பணிகளை மேற்கொண்டால், தேவையான தொழில்நுட்ப பணிகளுக்காக பொதுப்பணித்துறையில் இருந்து பொறியாளர்களை அயல் பணியாக அனுப்ப வேண்டிய நிலை ஏற்படும் என அதிகாரிகள் கூறுகின்றனர். ஏற்கனவே சில அரசு அமைப்புகளில் இதுபோன்ற நடைமுறை இருப்பதாகவும் அவர்கள் குறிப்பிட்டுள்ளனர்.

ஒவ்வொரு துறையும் தங்களுக்கான கட்டடங்களை தாங்களே கட்டத் தொடங்கினால், பொதுப்பணித்துறையின் பணிப்பரப்பு குறைந்து அதன் நிர்வாக அமைப்பு பலவீனமடையக்கூடும் என்ற கவலையும் அதிகாரிகள் தரப்பில் தெரிவிக்கப்பட்டுள்ளது.

மேலும், ஒரே கட்டுமானப் பணியில் ஒன்றுக்கும் மேற்பட்ட துறைகள் ஈடுபடுவதால் ஏற்படும் ஒருங்கிணைப்பு சிக்கல்கள் கட்டடங்களின் தரத்தையும் பாதிக்கக்கூடும் என அவர்கள் எச்சரித்துள்ளனர்.

பெண்களுக்கு குறைந்த கட்டணத்தில் தங்குமிட வசதியை வழங்கும் ‘தோழி’ திட்டம் விரிவடையும் நிலையில், புதிய கட்டடங்களை யார் கட்டுவது என்ற விவகாரம் தற்போது அரசுத் துறைகளுக்கிடையே கவனத்தை ஈர்த்துள்ளது.

இதையும் படிங்க: 15 ஆண்டுகளை கடந்த 40,296 அரசு வாகனங்கள் 2035 வரை இயக்க அனுமதி: தமிழக அரசு அதிரடி உத்தரவு!