மேற்காசிய நாடான ஈரான் மீதான ராணுவ நடவடிக்கையை கையாள்வதில் அமெரிக்கா -- இஸ்ரேல் இடையே லேசான முரண்பாடுகள் எட்டிப் பார்ப்பதாக சர்வதேச அரசியல் நிபுணர்கள் தெரிவித்துள்ளனர்.
வாஷிங்டன்: ஈரான் மீதான ராணுவ நடவடிக்கை குறித்து அமெரிக்கா மற்றும் இஸ்ரேல் இடையே லேசான முரண்பாடுகள் தெரிய வருவதாக சர்வதேச அரசியல் நிபுணர்கள் தெரிவித்துள்ளனர்.
ஈரானின் அணு ஆயுதத் திட்டத்தை முறியடிக்க உடனடியாக கடுமையான ராணுவத் தாக்குதல் நடத்த வேண்டும் என இஸ்ரேல் பிரதமர் பெஞ்சமின் நெதன்யாகு உறுதியாக இருக்கிறார். ஆனால் அமெரிக்க அதிபர் டொனால்ட் டிரம்ப், தூதரக ரீதியான பேச்சுவார்த்தைக்கு இன்னும் ஒரு வாய்ப்பு கொடுத்துப் பார்க்கலாம் என்ற நிலைப்பாட்டில் உள்ளார்.
இதையும் படிங்க: ஈரான் போரை நிறுத்த அதிபர் ட்ரம்ப்பின் உத்தி என்ன? அமெரிக்காவுக்கு ஜெர்மனி அதிபர் கேள்வி!
சமீபத்தில் வளைகுடா நாடுகளின் கோரிக்கையை ஏற்று, ஈரான் மீதான திட்டமிடப்பட்ட ராணுவத் தாக்குதலை டிரம்ப் தற்காலிகமாக ஒத்திவைத்திருந்தார்.
இந்நிலையில், இஸ்ரேலின் முன்னணி செய்தி நிறுவனமான ‘சேனல் 12’ வெளியிட்ட தகவலின்படி, டிரம்ப் மற்றும் நெதன்யாகு நேற்று முன்தினம் நள்ளிரவில் நீண்ட நேரம் காரசாரமான உரையாடலை நடத்தினர்.
ஈரான் விவகாரத்தில் அடுத்தகட்ட நகர்வுகள் குறித்து இரு தலைவர்களும் மிக முக்கியமான இறுதி முடிவை எடுக்கும் தருணத்தில் இருப்பதாக அந்த அறிக்கை கூறுகிறது. இது கடந்த மூன்று நாட்களில் இருவருக்கும் இடையே நடைபெற்ற இரண்டாவது முக்கிய பேச்சு ஆகும். முன்னதாக, டிரம்ப் தனது சீன பயணம் மற்றும் சீன அதிபர் ஷீ ஜின்பிங்குடனான சந்திப்பு குறித்து நெதன்யாகுவிடம் விவாதித்திருந்தார்.
இஸ்ரேல் உடனடி தாக்குதலை விரும்பும் நிலையில், டிரம்ப் இன்னும் சிறிது காலம் பொறுத்துப் பார்க்க விரும்புவதாகத் தெரிகிறது. இந்த லேசான கருத்து வேறுபாடு இரு நாடுகளுக்கும் இடையிலான உறவில் சிறிய விரிசலை ஏற்படுத்தியுள்ளதாக அரசியல் வல்லுநர்கள் கருதுகின்றனர்.
ஈரான் அணு ஆயுதத் திட்டம் தொடர்பான பதற்றம் உலக அளவில் அதிகரித்துள்ள நிலையில், அமெரிக்கா-இஸ்ரேல் இடையேயான இந்த முரண்பாடு மத்திய கிழக்குப் பிராந்தியத்தின் எதிர்காலத்தை பாதிக்கும் என எதிர்பார்க்கப்படுகிறது. இரு தலைவர்களும் விரைவில் ஒரு பொதுவான முடிவுக்கு வருவார்களா என்பது அடுத்த சில நாட்களில் தெரியவரும்.
இதையும் படிங்க: அமெரிக்கா அவசரப்படலை!! ஆனா ஈரானுக்கு காலம் கடந்துகிட்டுருக்கு! போரை நிறுத்த அதிபர் ட்ரம்ப் வார்னிங்!