தி.மு.க. தலைவரும், முன்னாள் முதலமைச்சருமான மு.க. ஸ்டாலின் லண்டன் சென்றுள்ள நிலையில், எதிர்க்கட்சித் தலைவர் உதயநிதி ஸ்டாலினும் தனது குடும்பத்தினருடன் இன்று லண்டன் புறப்பட்டுச் சென்றார். இன்பநிதியின் பட்டமளிப்பு விழாவில் பங்கேற்பதற்காக ஸ்டாலின் குடும்பத்தினர் ஒன்றாக லண்டனில் கூடவிருப்பதாக தகவல்கள் வெளியாகியுள்ளன.

முன்னதாக, கடந்த 4-ஆம் தேதி மு.க. ஸ்டாலின் தனது மனைவி துர்கா ஸ்டாலினுடன் இரண்டு வார பயணமாக லண்டன் சென்றார். பயணத்தின் முக்கிய நோக்கம், தனது பேரனும், உதயநிதி ஸ்டாலினின் மகனுமான இன்பநிதியின் பட்டமளிப்பு விழாவில் கலந்துகொள்வதாக கூறப்படுகிறது. இன்பநிதி, இங்கிலாந்தின் மான்செஸ்டர் நகரில் உள்ள பல்கலைக்கழகத்தில் விளையாட்டு மேம்பாடு தொடர்பான பட்டப்படிப்பை வெற்றிகரமாக முடித்துள்ளார். அவருக்கு பட்டம் வழங்கும் விழாவில் குடும்பத்தினர் அனைவரும் பங்கேற்க உள்ளனர்.

இந்த நிலையில், இன்று காலை 9.50 மணிக்கு சென்னை விமான நிலையத்தில் இருந்து எமிரேட்ஸ் விமானம் மூலம் உதயநிதி ஸ்டாலின் தனது குடும்பத்தினருடன் லண்டன் பயணத்தைத் தொடங்கினார். துபாய் வழியாக லண்டன் செல்லும் இந்த பயணத்தில், மொத்தம் 10 குடும்ப உறுப்பினர்கள் அவருடன் சென்றுள்ளதாக தகவல் வெளியாகியுள்ளது.

இதையும் படிங்க: உங்கள அவமானப்படுத்துவாங்கப்பா!! ப்ளீஸ் வேணாம்பா!! இடைத்தேர்தலில் போட்டி?! மு.க.ஸ்டாலினுக்கு உதயநிதி ரிக்வெஸ்ட்!

உதயநிதி ஸ்டாலினை வழியனுப்ப தி.மு.க.வின் முக்கிய நிர்வாகிகள் சென்னை விமான நிலையத்திற்கு வந்திருந்தனர். குடும்ப நிகழ்வில் பங்கேற்பதற்காக நடைபெறும் இந்த வெளிநாட்டு பயணம் அரசியல் வட்டாரங்களிலும் கவனத்தை ஈர்த்துள்ளது.

லண்டனில் நடைபெறும் பட்டமளிப்பு விழா முடிந்த பிறகு, குடும்பத்தினருடன் சில நாட்கள் தங்கி ஓய்வெடுக்கவும் திட்டமிடப்பட்டுள்ளதாக கூறப்படுகிறது. அதன்பின், மு.க. ஸ்டாலின், துர்கா ஸ்டாலின், உதயநிதி ஸ்டாலின் மற்றும் குடும்ப உறுப்பினர்கள் அனைவரும் வரும் 18-ஆம் தேதி சென்னை திரும்புவார்கள் என்று தகவல்கள் தெரிவிக்கின்றன.

இன்பநிதியின் கல்வி சாதனையை குடும்பத்தினர் நேரில் கொண்டாடுவதற்காக இந்த பயணம் மேற்கொள்ளப்பட்டுள்ளதாக கூறப்படும் நிலையில், தி.மு.க. தலைமை குடும்பத்தினரின் இந்த வெளிநாட்டு பயணம் அரசியல் மற்றும் பொதுமக்கள் மத்தியில் பேசுபொருளாக மாறியுள்ளது. இருப்பினும், இந்த பயணம் தொடர்பாக கட்சி தரப்பில் விரிவான அதிகாரப்பூர்வ அறிக்கை எதுவும் வெளியிடப்படவில்லை.

இதையும் படிங்க: இந்தவாட்டி மிஸ் ஆகவே கூடாது! மு.க.ஸ்டாலின் மும்முரம்! இடைத்தேர்தலுக்கு தயாராகும் திமுக! நிர்வாகிகளுடன் ஆலோசனை!