இந்திய நீதித்துறையின் செயல்பாடுகளை வேகப்படுத்தவும், தேங்கிக் கிடக்கும் லட்சக்கணக்கான வழக்குகளுக்கு விரைந்து தீர்வு காணவும் மத்திய அரசு மிக முக்கியமான முடிவை எடுத்துள்ளது. உச்ச நீதிமன்ற (Supreme Court) நீதிபதிகளின் எண்ணிக்கையை உயர்த்துவதற்கான சட்டத் திருத்தத்திற்குப் பிரதமர் தலைமையிலான மத்திய அமைச்சரவை இன்று அதிகாரப்பூர்வமாக ஒப்புதல் அளித்துள்ளது.

தற்போது உச்ச நீதிமன்றத்தில் தலைமை நீதிபதி உட்பட அனுமதிக்கப்பட்ட நீதிபதிகளின் எண்ணிக்கை 34 ஆக உள்ளது. இருப்பினும், மக்கள் தொகை உயர்வு மற்றும் நீதிமன்றங்களில் நிலுவையில் உள்ள வழக்குகளின் சுமையைக் கருத்தில் கொண்டு, இந்த எண்ணிக்கையை அதிகரிக்க வேண்டும் என உச்ச நீதிமன்றத் தலைமை நீதிபதி தரப்பிலிருந்து நீண்டகாலமாகக் கோரிக்கை விடுக்கப்பட்டு வந்தது.

இன்றைய கூட்டத்தில், நீதிபதிகளின் எண்ணிக்கையை மேலும் அதிகரிக்க அமைச்சரவை பச்சைக்கொடி காட்டியுள்ளது. இதன் மூலம் புதிய நீதிபதிகள் நியமிக்கப்பட வழிவகை செய்யப்பட்டுள்ளது.

இதையும் படிங்க: "சேவல் கொடி பறக்குது": மருதமலையில் பாடகர் வேல்முருகன் உற்சாகம்!

இந்த முடிவைச் செயல்படுத்த, 'உச்ச நீதிமன்ற (நீதிபதிகள் எண்ணிக்கை) சட்டம், 1956'-ல் உரியத் திருத்தங்களைக் கொண்டு வர மத்திய அரசு திட்டமிட்டுள்ளது. நீதித்துறையில் நிலவும் பணிச்சுமையைக் குறைப்பதே இந்த அதிரடி மாற்றத்தின் பிரதான நோக்கமாகும்:

உச்ச நீதிமன்றத்தில் மட்டும் பல்லாயிரக்கணக்கான வழக்குகள் பல ஆண்டுகளாகத் தீர்ப்புக்காகக் காத்திருக்கின்றன. நீதிபதிகளின் எண்ணிக்கை அதிகரிப்பதன் மூலம் கூடுதல் அமர்வுகள் (Benches) அமைக்கப்பட்டு வழக்குகள் விரைந்து விசாரிக்கப்படும்.

முக்கியத்துவம் வாய்ந்த அரசியலமைப்புச் சட்ட வழக்குகளை விசாரிக்க 5 அல்லது அதற்கு மேற்பட்ட நீதிபதிகள் கொண்ட அமர்வுகள் தேவைப்படுகின்றன. நீதிபதிகள் பற்றாக்குறையால் இத்தகைய அமர்வுகளை அமைப்பதில் நிலவும் சிக்கல் இனி நீங்கும். காலந்தாழ்த்தி வழங்கப்படும் நீதி, மறுக்கப்பட்ட நீதிக்குச் சமம் என்ற பழமொழிக்கு ஏற்ப, பொதுமக்களுக்கு விரைவாக நீதி கிடைப்பதை உறுதி செய்ய இந்த நடவடிக்கை உதவும்.

மத்திய அமைச்சரவையின் இந்த ஒப்புதலைத் தொடர்ந்து, நாடாளுமன்றத்தின் அடுத்த கூட்டத்தொடரில் இதற்கான மசோதா தாக்கல் செய்யப்பட்டு நிறைவேற்றப்படும் என எதிர்பார்க்கப்படுகிறது. அதன் பின்னர், கொலிஜியம் (Collegium) அமைப்பின் பரிந்துரையின் அடிப்படையில் புதிய நீதிபதிகள் முறைப்படி நியமிக்கப்படுவார்கள்.

இதையும் படிங்க: அரபிக் கடலில் தத்தளித்த இந்தியக் கப்பல்: கைகொடுத்து உதவிய பாகிஸ்தான் கடற்படை!