சென்னை: தமிழக சட்டசபை தேர்தல் 2026-க்கு இன்னும் சில மாதங்களே உள்ள நிலையில், திமுக தலைமையிலான கூட்டணியில் உள்ள விடுதலை சிறுத்தைகள் கட்சி (விசிக) தொகுதி பங்கீடு குறித்து பெரும் எதிர்பார்ப்பு நிலவுகிறது. விசிக தரப்பு 12 தொகுதிகள் கேட்டுள்ள நிலையில், திமுக தலைமை 8 தொகுதிகள் தர முன்வந்துள்ளதாக தகவல்கள் வெளியாகியுள்ளன. இது கூட்டணியில் சிறு பதற்றத்தை ஏற்படுத்தியுள்ளது.

விசிக கட்சி கடந்த 9 ஆண்டுகளாக தொடர்ந்து திமுக கூட்டணியில் இருந்து வருகிறது. 2021 சட்டசபை தேர்தலில் 6 தொகுதிகளில் போட்டியிட்டு 4 இடங்களை வென்றது. இப்போது இரண்டு எம்பிக்கள், நான்கு எம்எல்ஏக்கள் உள்ளனர். 

இதனால் அங்கீகரிக்கப்பட்ட அரசியல் கட்சியாக வளர்ந்துள்ளது. வட மாவட்டங்கள், சில தென் மாவட்டங்களில் வலுவான செல்வாக்கு கொண்டுள்ளது. இதனால் 2026-ல் இரட்டை இலக்க தொகுதிகள் (10 அல்லது அதற்கு மேல்) கோரியுள்ளது.

இதையும் படிங்க: திருமாவளவன் முரண்டு புடிச்சா?! விசிகவை இரண்டா உடைங்க?! திமுக போட்ட மாஸ்டர் ப்ளான்! பகீர் திட்டம்!

விசிக நிர்வாகிகள் சிலர் கூறுகையில், "இரட்டை இலக்க எண்ணிக்கைக்கு குறைவாக தொகுதி கொடுத்தால் உடன்படிக்கை செய்ய வேண்டாம் என்று திருமாவளவனிடம் வலியுறுத்தியுள்ளோம்" என்றனர்.

திருமாவளவன் தலைமையிலான கட்சி, கடந்த தேர்தல்களில் கிடைத்த வெற்றியை வைத்து வலுவான கோரிக்கை வைத்துள்ளது. ஆனால் திமுக தரப்பில், கூட்டணியில் உள்ள பல கட்சிகளை (காங்கிரஸ், இஐஏம்எல், இடதுசாரிகள், மதிமுக, தேமுதிக உள்ளிட்டவை) இடமளிக்க வேண்டிய சூழல் உள்ளதால் 8 தொகுதிகளை மட்டுமே வழங்க முன்வந்துள்ளது என்று தகவல்கள் தெரிவிக்கின்றன.

திமுக தலைமை சமீபத்தில் கூட்டணி கட்சிகளுடன் தொகுதி பங்கீடு பேச்சுவார்த்தை தொடங்கியுள்ளது. IUML-க்கு 2 தொகுதிகள், காங்கிரஸ்-க்கு 25-28 தொகுதிகள் என பேச்சு நடக்கிறது. விசிக-க்கு 8 தொகுதி என்பது 2021-ல் கிடைத்த 6-ஐ விட அதிகம் என்றாலும், கட்சியின் தற்போதைய வளர்ச்சியை கருத்தில் கொண்டு குறைவு என்று விசிக தரப்பில் கருதப்படுகிறது. திருமாவளவன் தரப்பில் இன்னும் அதிகாரப்பூர்வ அழைப்பு வரவில்லை என்றாலும், பேச்சு தொடங்கியவுடன் கோரிக்கையை வலுப்படுத்த திட்டமிட்டுள்ளனர்.

இந்த விவகாரம் திமுக கூட்டணியின் உறுதியை சோதிக்கும் வகையில் உள்ளது. விசிக தனித்து போட்டியிட்டால் வட மாவட்டங்களில் திமுகவுக்கு சவால் ஏற்படலாம் என அரசியல் வட்டாரங்கள் கூறுகின்றன. 

தேர்தல் நெருங்கும் நிலையில் இந்த பேச்சுவார்த்தை எப்படி முடிவடையும் என்பது கவனத்தை ஈர்த்துள்ளது. விசிக்-திமுக உறவு இன்னும் வலுவாக இருக்கும் என எதிர்பார்க்கப்படுகிறது, ஆனால் தொகுதி எண்ணிக்கை முக்கிய சவாலாக உள்ளது.

இதையும் படிங்க: திமுக கூட்டணியில் இணையும் புதிய கட்சிகள்! பறி போகிறது பழைய கட்சிகளின் சீட்! தலை சொறியும் தலைமை!