சென்னை: தமிழக சட்டமன்றத் தேர்தலில் பெரம்பூர் தொகுதியில் வேட்புமனு தாக்கல் செய்த தவெக தலைவரும், நடிகருமான விஜய்யின் சொத்து மற்றும் வருமான விவரங்கள் வெளியாகியுள்ள நிலையில், சமூக வலைதளங்களில் அவருக்கு எதிராக டிரோல் புயல் வீசத் தொடங்கியுள்ளது.

விஜய்யின் வேட்புமனுவில் அசையும், அசையா சொத்துக்கள் உட்பட மொத்த சொத்து மதிப்பு 642 கோடியே 74 லட்சம் ரூபாய் என்று குறிப்பிடப்பட்டுள்ளது. 2024-25 ஆம் ஆண்டில் அவரது வருமானம் 184 கோடியே 53 லட்சம் ரூபாயாகவும், 2023-24ல் 105 கோடியாகவும், 2022-23ல் 198 கோடியாகவும், 2021-22ல் 237 கோடியாகவும், 2020-21ல் 8 கோடியாகவும் தெரிவிக்கப்பட்டுள்ளது. கடந்த ஐந்து ஆண்டுகளின் மொத்த வருமானம் சுமார் 732 கோடி ரூபாய் ஆகும்.

ஆனால், விஜய் திரையுலகில் ஒரு படத்துக்கு 200 கோடி ரூபாய் சம்பளம் வாங்குவதாகவும், ஆண்டுக்கு 500 கோடி ரூபாய் வருமானத்தை தூக்கி எறிந்துவிட்டு அரசியலுக்கு வந்ததாகவும் தவெக நிர்வாகிகள், குறிப்பாக உயர்மட்ட நிர்வாகக் குழு தலைமை ஒருங்கிணைப்பாளர் கே.எ.செங்கோட்டையன் உள்ளிட்டோர் பல மேடைகளில் பேசி வந்தனர். இந்தக் கூற்றுகளுக்கு முரணாக வேட்புமனுவில் காட்டப்பட்ட வருமான விவரங்கள் பலரையும் ஆச்சரியப்படுத்தியுள்ளன.

இதையும் படிங்க: தேர்தல்ல சீட்டும் கொடுக்கல! கட்சியில பதவியும் கொடுக்கல! தவெகவில் இணைந்த மாஜிக்கள் குமுறல்!

சமூக வலைதளங்களில் தற்போது “உச்சத்தை விட்டு வந்தவருக்கு மிச்சம் இவ்வளவு தானா?”, “200 கோடி சம்பளம் என்னாச்சு?”, “500 கோடி வருமானம் எங்கே போச்சு?” என விஜய்யை கேலி செய்யும் மீம்கள் மற்றும் காணொளிகள் வைரலாகி வருகின்றன. “வாரிசு, லியோ, ஜனநாயகன்” உள்ளிட்ட படங்களுக்கு 200 கோடி சம்பளம் என்று ரசிகர்கள் பெருமிதம் கொண்டு பேசிய அதே நேரத்தில், வேட்புமனு விவரங்கள் வெளியான பிறகு எதிர் தரப்பினர் இதை பெரிதும் கிண்டல் செய்கின்றனர்.

விஜய் தனது வேட்புமனுவில் ரியல் எஸ்டேட் நிறுவனம் ஒன்றையும் நடத்தி வருவதாகக் குறிப்பிட்டுள்ளார். இருப்பினும், அவரது வருமானம் ஒரு ஆண்டில் கூட 200 கோடிக்கு மேல் செல்லவில்லை என்பது வேட்புமனு மூலம் தெளிவாகியுள்ளது.

இந்த விவகாரம் தமிழக அரசியல் மற்றும் சினிமா வட்டாரத்தில் பெரும் விவாதத்தை ஏற்படுத்தியுள்ளது. விஜய்யின் ரசிகர்கள் இதை பாதுகாக்க முயற்சிக்கும் அதேவேளையில், எதிர்க்கட்சியினர் மற்றும் சில சினிமா ரசிகர்கள் இந்த வேறுபாட்டை சுட்டிக்காட்டி தொடர்ந்து டிரோல் செய்து வருகின்றனர்.

விஜய் இதுவரை இந்த விவகாரம் குறித்து எந்த கருத்தும் தெரிவிக்கவில்லை. தவெக தலைமை இந்த டிரோல்களுக்கு எப்படி பதிலளிக்கும் என்பதை அரசியல் அவதானிகள் உன்னிப்பாக கவனித்து வருகின்றனர்.

இதையும் படிங்க: சிறுபான்மையினர் பாதுகாப்பா?! 4 முஸ்லிம்களுக்கு மட்டுமே சீட்! திமுகவை விளாசும் விமர்சகர்கள்!