தமிழக சட்டமன்றத் தேர்தல் 2026-க்கு இன்னும் சில மாதங்களே உள்ள நிலையில், அதிமுகவின் தகவல் தொழில்நுட்ப அணியில் (ஐ.டி. அணி) ஏற்பட்டுள்ள உள் சீரற்ற தன்மை மற்றும் செயல்பாட்டு தோல்வி பெரும் பரபரப்பை ஏற்படுத்தியுள்ளது. 

ராஜ்சத்யன் தலைமையிலான இந்த அணி சுணங்கிப் போன நிலையில், அதன் முழு கட்டுப்பாட்டையும் வியூக வகுப்பு நிறுவனமான பிரமான்யாவிடம் ஒப்படைத்துவிட்டதாக அதிமுக வட்டாரங்களில் இருந்து தகவல்கள் வெளியாகியுள்ளன.

அதிமுக பொதுச்செயலர் எடப்பாடி கே. பழனிசாமி, தனது தலைமையில் ஐ.டி. அணியை மிகுந்த முக்கியத்துவத்துடன் கையாண்டு வந்தார். ராஜ்சத்யன் தலைமையிலான இந்த அணிக்கு மாவட்ட பொறுப்பாளர் பதவிகள் வரை வழங்கி, மாவட்ட செயலர்களின் பரிந்துரையின் பேரில் நிர்வாகிகளை நியமித்தார். 

இதையும் படிங்க: எம்.பி சீட்டுக்கு அடம்பிடிக்கும் டிடிவி! அமித்ஷா கொடுக்கும் ஆஃபர்! அமமுகவுக்கு இவ்வளவு தான்! முடிந்தது தொகுதி பங்கீடு!

ஆனால், இந்த நிர்வாகிகளில் பெரும்பாலானோர் மாவட்ட செயலர்களுக்கு துதிபாடும் ஆட்களாக மாறினர். அதேபோல், ராஜ்சத்யன் தனக்கு வசதியான, துதிபாடும் ஆட்களை மண்டல மற்றும் மாநில அளவில் நியமித்ததால், அணியின் உள் ஒருங்கிணைப்பு முற்றிலும் சீர்குலைந்தது.

கோவை சத்யன் (அணி தலைவர்) மற்றும் ராஜ்சத்யன் (செயலர்) இடையேயும் மோதல் ஏற்பட்டது. இதனால், திமுக-த.வெ.க.-பாஜக அணிகளுக்கு இணையாக சமூக வலைதளங்களில் அதிமுக ஐ.டி. அணி செயல்பட முடியவில்லை. 

பழனிசாமியின் பதிவுகள் கூட நிர்வாகிகளால் பகிரப்படாமல் இருப்பது, அணியின் செயல்பாடு மிகவும் பின்னடைந்துள்ளதை வெளிப்படுத்துகிறது. இதனால் பெரும் டென்ஷனுக்கு ஆளான பழனிசாமி, ஐ.டி. அணியின் முழு கட்டுப்பாட்டையும் தன்னால் நியமிக்கப்பட்ட பிரமான்யா என்ற வியூக நிறுவனத்திடம் ஒப்படைத்துவிட்டார்.

இந்நிலையில், பிரமான்யா நிறுவனத்தைச் சேர்ந்த வியூக வல்லுநர்கள் ஏற்கனவே பணியில் இறங்கியுள்ளனர். மூன்று மாவட்டங்களுக்கு ஒரு ஒருங்கிணைப்பாளரை நியமித்து, சமூக வலைதள உத்திகளை மறுசீரமைக்கும் பணிகளை தொடங்கியுள்ளனர். 

ஆனால், இதுவரை ஐ.டி. அணியின் செயல்பாட்டில் எந்த குறிப்பிடத்தக்க முன்னேற்றமும் ஏற்படவில்லை என்றும், பழனிசாமியின் பதிவுகள் இன்னும் பரவலாக பகிரப்படாமல் இருப்பதாகவும் கட்சி வட்டாரங்கள் தெரிவிக்கின்றன.

தேர்தல் நெருங்கும் வேளையில், அதிமுகவின் டிஜிட்டல் போராட்டம் மிக முக்கியமானதாக இருக்கும் நிலையில், ஐ.டி. அணியின் இந்த சீரற்ற நிலை கட்சியின் வெற்றி வாய்ப்புகளை பாதிக்கலாம் என்ற அச்சம் எழுந்துள்ளது. பழனிசாமி இந்த முடிவை எடுத்திருப்பது, அணியை மீட்டெடுக்கும் கடைசி முயற்சியாக பார்க்கப்படுகிறது. ஆனால், வியூக நிறுவனத்தின் கட்டுப்பாட்டுக்கு மாறிய பிறகும் முன்னேற்றம் ஏற்படாவிட்டால், அதிமுகவின் சமூக ஊடக உத்தி மேலும் பின்னடைவை சந்திக்கும் அபாயம் உள்ளது.

இதையும் படிங்க: தேமுதிகவும், ஓபிஎஸ்-உம் கட்டாயம் வேணும்! எடப்பாடி பழனிசாமி அதிமுகவினர் ரிக்வெஸ்ட்! தேர்தல் பார்முலா!