தமிழகச் சட்டமன்றத் தேர்தலுக்கான ஆயத்தப் பணிகளில் ஆளுங்கட்சியான திமுக தீவிரமாக இறங்கியுள்ள நிலையில், அக்கட்சியின் மாவட்டச் செயலாளர்கள் கூட்டம் நாளை (பிப்ரவரி 20) மாலை நடைபெறவுள்ளது. திமுக தலைவரும், தமிழக முதலமைச்சருமான மு.க. ஸ்டாலின் அவர்கள் தலைமையில் காணொலி காட்சி வாயிலாக இந்த ஆலோசனைக் கூட்டம் நடைபெறவுள்ளதாகத் திமுக பொதுச்செயலாளர் துரைமுருகன் அறிவித்துள்ளார்.
நாளை மாலை 6.30 மணிக்கு இந்தக் கூட்டம் தொடங்குகிறது. தமிழகம் முழுவதும் உள்ள திமுக மாவட்டச் செயலாளர்கள் மற்றும் தலைமைக் கழக நிர்வாகிகள் இந்தக் கூட்டத்தில் பங்கேற்கின்றனர். வரும் பிப்ரவரி 20 முதல் தொடங்கவுள்ள தேர்தல் விருப்ப மனு விநியோகம், பிப்ரவரி 22 முதல் நடைபெறவுள்ள கூட்டணிக் கட்சிகளுடனான தொகுதிப் பங்கீட்டுப் பேச்சுவார்த்தை மற்றும் தேர்தல் காலப் பணிகள் குறித்து முதல்வர் விரிவான ஆலோசனைகளை வழங்கவுள்ளார்.
இதையும் படிங்க: தேனியில் நாதக - தவெக இடையே கடும் மோதல்! தவெக நிர்வாகிகள் மீது 5 பிரிவுகளில் வழக்கு.. மா.செ. தலைமறைவு!
ஒவ்வொரு தொகுதியிலும் பூத் கமிட்டி பணிகளின் நிலை மற்றும் 'திராவிட மாடல்' அரசின் சாதனைகளை மக்களிடம் கொண்டு செல்வது குறித்தும் மாவட்டச் செயலாளர்களுக்கு இலக்குகள் நிர்ணயிக்கப்பட உள்ளன.
தேர்தல் தேதி அறிவிப்பு நெருங்கி வரும் வேளையில், கட்சி நிர்வாகிகளை ஒருங்கிணைக்கவும், தேர்தல் வியூகங்களை வகுக்கவும் இந்தக் கூட்டம் மிக முக்கியத்துவம் வாய்ந்ததாகக் கருதப்படுகிறது. ஏற்கனவே 200 தொகுதிகளில் வெற்றி பெற வேண்டும் என்ற இலக்கை முதல்வர் நிர்ணயித்துள்ள நிலையில், நாளை நடைபெறும் கூட்டத்தில் இதற்கான 'ரோடு மேப்' (Road Map) இறுதி செய்யப்படும் என எதிர்பார்க்கப்படுகிறது.
இதையும் படிங்க: அதிமுக மாவட்ட செயலாளர்கள் கூட்டம்! எடப்பாடியார் தலைமையில் 2026 தேர்தல் வியூகம் வகுப்பு!