ஜப்பானின் ஐச்சி-நகோயாவில் நடைபெற்று வரும் 2026 ஆசிய விளையாட்டுப் போட்டியில், பெண்களுக்கான 10 மீட்டர் ஏர் ரைஃபிள் தனிநபர் பிரிவில் 252.4 புள்ளிகள் குவித்துத் தமிழ்நாட்டைச் சேர்ந்த நட்சத்திர வீராங்கனை இளவேனில் வாலறிவன் வெள்ளிப் பதக்கத்தை முத்தமிட்டு, நடப்புத் தொடரில் இந்தியாவுக்கான 2-வது பதக்கத்தைப் பெற்றுத் தந்துள்ளார்.

சர்வதேச விளையாட்டு அரங்கில் கோலாகலமாகத் தொடங்கியுள்ள ஆசிய விளையாட்டுப் போட்டியில், இந்திய துப்பாக்கி சுடுதல் வீராங்கனைகள் ஆரம்பம் முதலே அசாத்திய ஆதிக்கத்தைச் செலுத்தி வருகின்றனர். முன்னதாக இன்று காலை நடைபெற்ற மகளிருக்கான 10 மீட்டர் ஏர் ரைஃபிள் குழுப் பிரிவில் இளவேனில் வாலறிவன், சோனம் மாஸ்கர் மற்றும் விதர்ஷா வினோத் ஆகியோர் அடங்கிய இந்திய அணி வெள்ளிப் பதக்கம் வென்று தேசத்தின் பதக்கக் கணக்கைத் திறந்து வைத்தது. அதனைத் தொடர்ந்து நடைபெற்ற தனிநபர் தகுதிச் சுற்றிலும் அபாரமாகச் செயல்பட்டு முதல் 8 வீராங்கனைகளில் ஒருவராக இறுதிச் சுற்றுக்கு முன்னேறினார் இளவேனில்.

இதையும் படிங்க: கம்பீரமாக உயர்ந்த இந்தியக் கொடி: ஆசிய விளையாட்டு தொடக்க விழாவில் மனு பாக்கர், பவன் ஷெராவத்!!

உச்சக்கட்டப் பரபரப்புடன் அரங்கேறிய 10 மீட்டர் ஏர் ரைஃபிள் தனிநபர் இறுதிச் சுற்றில், சர்வதேச முன்னணி வீராங்கனைகளுடன் சமரசமின்றி நேருக்கு நேர் மோதிய இளவேனில் வாலறிவன், ஒவ்வொரு சுற்றிலும் துல்லியமாகக் குறிபார்த்து 252.4 புள்ளிகளைக் குவித்து அசத்தினார். இதன் மூலம் இரண்டாவது இடத்தைப் பிடித்து வெள்ளிப் பதக்கத்தைத் தனது கழுத்தில் சூடிக் கொண்டார். ஒரே நாளில் குழுப் போட்டி மற்றும் தனிநபர் போட்டி என இரண்டிலும் அடுத்தடுத்து 2 வெள்ளிப் பதக்கங்களை வென்று இந்தியாவிற்கும் தமிழ்நாட்டிற்கும் அளப்பரிய வரலாற்றுப் பெருமை சேர்த்துள்ள இளவேனில் வாலறிவனுக்குப் பல்வேறு தரப்பிலிருந்தும் வாழ்த்துகள் குவிந்து வருகின்றன.

இதையும் படிங்க: ஆசிய விளையாட்டு போட்டி: இந்தியாவுக்கு முதல் பதக்கம்... துப்பாக்கி சுடுதலில் மகளிர் அணிக்கு வெள்ளி!