அ.தி.மு.க.வில் இருந்து நீக்கப்பட்ட மூத்த தலைவரும், முன்னாள் அமைச்சருமான கே.ஏ.செங்கோட்டையன், வரும் நவம்பர் 27-ம் தேதி நடிகர் விஜய்யின் தமிழக வெற்றிக் கழகத்தில் (தவெக) இணைய உள்ளார். அவரது நெருங்கிய ஆதரவாளர்கள் இதை உறுதிப்படுத்தியுள்ளனர். அதே நேரத்தில், அ.தி.மு.க.வில் இருந்து வெளியேற்றப்பட்ட முன்னாள் முதலமைச்சர் ஓ.பன்னீர்செல்வமும் எடப்பாடி பழனிசாமிக்கு டிசம்பர் 15 வரை கெடு விதித்துள்ளார். அதற்குப் பிறகு அவர் தனிக்கட்சி தொடங்குவாரா அல்லது தவெகவில் இணைவாரா என்பது விரைவில் தெரியவரும்.
ஜெயலலிதா மறைவுக்குப் பிறகு அ.தி.மு.க.வில் தொடங்கிய உள்கட்சிப் பூசல் இன்றளவும் தொடர்கிறது. 2021 சட்டமன்றத் தேர்தல் தோல்விக்குப் பிறகு இந்தப் பிளவு வெளிப்படையாக வெடித்தது. சசிகலா, டி.டி.வி.தினகரன், ஓ.பன்னீர்செல்வம், செங்கோட்டையன் என ஒவ்வொருவராக கட்சியை விட்டு வெளியேற்றப்பட்டனர்.
செங்கோட்டையன் ஈரோடு மாவட்டத்தில் தனக்கு இருந்த செல்வாக்கையும், ஆதரவாளர்களையும் இழந்தார். கடந்த மாதம் பசும்பொன்னில் நடந்த தேவர் ஜெயந்தியின் போது செங்கோட்டையன், ஓ.பி.எஸ்., சசிகலா, டி.டி.வி.தினகரன் ஆகியோர் ஒன்றாகத் தோன்றி, “அ.தி.மு.க. ஒன்றிணைய வேண்டும்” என்று கோரிக்கை வைத்தனர். ஆனால் எடப்பாடி பழனிசாமி இதை ஏற்கவில்லை.
இதையும் படிங்க: அரசுப்பணிக்கு ரூ.15 லட்சம் லஞ்சம்!! வாரி சுருட்ட பாக்குறீங்களா? வெளுத்து வாங்கும் அண்ணாமலை!
இதனால், நீண்ட மவுனத்துக்குப் பிறகு செங்கோட்டையன் இப்போது புதிய முடிவு எடுத்துள்ளார். நவம்பர் 27-ம் தேதி தனது ஆதரவாளர்களுடன் தவெகவில் இணைவது உறுதியாகியுள்ளது. அதேபோல் ஓ.பன்னீர்செல்வமும் டிசம்பர் 15 வரை எடப்பாடிக்கு கெடு விதித்துள்ளார். கெடு முடிந்த பிறகு அவரும் தவெகவை நோக்கி நகர வாய்ப்பு இருப்பதாக அரசியல் வட்டாரங்கள் தெரிவிக்கின்றன.
செங்கோட்டையன், ஓ.பி.எஸ். போன்ற மூத்த தலைவர்கள் தவெகவில் இணைவது உறுதியானால், அ.தி.மு.க.வுக்கு பெரும் பின்னடைவாக அமையும். குறிப்பாக ஈரோடு, சேலம், நாமக்கல் உள்ளிட்ட மேற்கு மாவட்டங்களில் செங்கோட்டையனுக்கு இன்னும் செல்வாக்கு உள்ளது. இவர்கள் தவெகவில் இணைந்தால், 2026 சட்டமன்றத் தேர்தலில் மூன்றாவது அணியாக தவெக வலுவடைய வாய்ப்பு உள்ளது.
அ.தி.மு.க.வில் இருந்து வெளியேறிய மூத்த தலைவர்கள் ஒவ்வொருவராக தவெகவை நோக்கி நகர்வது தமிழக அரசியலில் பெரும் திருப்பமாகப் பார்க்கப்படுகிறது.
இதையும் படிங்க: செங்கோட்டையன் கோட்டையை அசைக்க களமிறங்கும் இபிஎஸ்!! குறி வைக்கப்படும் ஈரோடு, கோபி தொகுதிகள்!