கூட்டணியில் இல்லாத திமுகவை நோக்கிக் கூவும் காங்கிரஸ் கமிட்டி தலைவர் மாணிக்கம் தாகூர் எம்பி தனது வாயை அடக்க வேண்டும்; இல்லையென்றால் அடக்கப்படும் என்று திமுக தலைமைக் கழகம் மிகக் கடுமையான சொற்களால் எச்சரித்து அனல் பறக்கும் பதிலடி அறிக்கையை வெளியிட்டுள்ளது.

தலைமைத் தேர்தல் ஆணையர் ஞானேஷ் குமார் பதவி விலகக் கோரி டெல்லியில் நடைபெறும் போராட்டங்கள் மற்றும் SIR வாக்காளர் பட்டியல் விவகாரத்தில், பாஜகவை பகைத்துக் கொள்ள நேரிடும் என்று அஞ்சி திமுக எம்பிக்கள் போராட்டத்தில் பங்கேற்கவில்லை எனத் தமிழ்நாடு காங்கிரஸ் கமிட்டித் தலைவர் மாணிக்கம் தாகூர் விமர்சித்திருந்தார். இதற்கு எதிர்வினையாக திமுகவின் அதிகாரப்பூர்வ எக்ஸ் தளத்தில் தலைமைக் கழகத்தின் சார்பில் மிகக் காட்டமான அறிக்கை வெளியிடப்பட்டுள்ளது.

அறிக்கையில், சட்டமன்றப் பொதுத்தேர்தலுக்கு முன்பே தனது திமிர்ப் பேச்சுகளால் தமிழ்நாட்டில் வலுவாக இருந்த பாஜக எதிர்ப்புக் கூட்டணியைச் சீர்குலைத்த தவெக அடிமை மாணிக்கம் தாகூர் மீண்டும் தனது வாய்த்துடுக்கை வெளிப்படுத்தியுள்ளார். திமுக வாக்குச்சாவடி முகவர்கள் கூட்டத்தில் உடன்பிறப்புகளை ஊக்குவிக்கப் பேசிய பேச்சை வைத்துக்கொண்டு, தேர்தல் ஆணையத்தின் பாரபட்சமான SIR நடவடிக்கைக்கு மாணிக்கம் தாகூர் வக்காலத்து வாங்குகிறார். இதனை காங்கிரஸ் கட்சியின் தேசியத் தலைமை ஏற்கிறதா? SIR விவகாரத்தில் இதுதான் காங்கிரஸின் நிலைப்பாடா? எனக் கேள்வி எழுப்பியுள்ளது.

இதையும் படிங்க: தபால் வாக்கை வாங்கினோமா.? மரகதம் குமரவேலை விளாசிய பரந்தாமன்..!!

திமுக கூட்டணியில் இருந்த காங்கிரஸ் நிர்வாகிகளைச் சாடிய அறிக்கை, திமுக கூட்டணியில் அங்கம் வகித்துக்கொண்டே மாணிக்கம் தாகூர், கிரிஷ் சோடங்கர், பிரவீன் சக்ரவர்த்தி போன்ற சில புல்லுருவிகள் தெரிவித்த கருத்துகளும், வேறு கட்சியின் ஸ்லீப்பர் செல்களாக அவர்கள் செயல்பட்டதுமே கூட்டணியின் ஒற்றுமையைக் குலைத்தது. காங்கிரஸ் கட்சியில் இருந்த இத்தகைய அழுகிய பிணங்களின் சுமையைச் சுமந்ததும் திமுகவின் வாக்குகள் சரிய ஒரு காரணமானது. அந்தச் சுமையைத் தூக்கி எறிந்த பின்னர் மக்களிடம் திமுகவுக்கான ஆதரவு பன்மடங்கு பெருகியிருக்கிறது என்பதை நடந்து முடிந்த இடைத்தேர்தல் முடிவுகள் உணர்த்துகின்றன என்று சாடியுள்ளது.

இந்தியா கூட்டணியில் இருந்து திமுக விலகியதை உறுதிபடுத்திய தலைமைக் கழகம், பதவிப் பிச்சைக்காகக் கூட்டணி தர்மத்திற்கு எதிராக காங்கிரஸ் புல்லுருவிகள் செய்த துரோகத்தையடுத்து 'இந்தியா' கூட்டணியில் இருந்து நாங்கள் வெளியேறிவிட்டோம். அக்கூட்டணியில் இல்லாத திமுக இனி அவர்கள் முன்னெடுக்கும் போராட்டங்களில் இணைய வேண்டிய அவசியமும் இல்லை; இணைய வேண்டும் என்று கட்டாயப்படுத்தும் உரிமையும் அவர்களுக்கு இல்லை; இனி எங்கள் வழி, தனி வழி! என்று திட்டவட்டமாகத் தெரிவித்துள்ளது.

முதலமைச்சர் விஜய் மற்றும் மாணிக்கம் தாகூரின் செயல்பாடுகளைக் கடுமையாகச் சாடிய அறிக்கை, மாணிக்கம் தாகூர் சூடு, சொரணையுள்ள மனிதராக இருந்தால், காங்கிரஸுடன் கூட்டணியில் இருக்கும் தவெகவின் தலைவர் விஜய் ஏன் இந்தப் போராட்டத்தில் இணையவில்லை என்று கேட்க வேண்டும். ஞானேஷ் குமார் குறித்தோ, பாஜக குறித்தோ, பிரதமர் மோடி குறித்தோ ஒரு வார்த்தை கூட உதிர்க்காத தொடைநடுங்கிதான் விஜய். பனையூர் பண்ணையாரின் காலடியில் மண்டியிட்டு, தவெக போடும் பிஸ்கட்டுக்காக வாழும் மாணிக்கம் தாகூருக்கு திமுகவின் பாஜக எதிர்ப்பு குறித்துப் பேசத் துளியும் அருகதை இல்லை. அவதூறு பேசுவது தொடர்ந்தால் அதற்குரிய விளைவுகளை மாணிக்கம் தாகூர் எதிர்கொண்டே ஆக வேண்டும் என்று எச்சரித்துள்ளது.

இதையும் படிங்க: 2027ல் மு.க.ஸ்டாலின் தான் மீண்டும் முதல்வர்... தவெகவுக்கு திமுக எம்.எல்.ஏ சேடப்பட்டி மணிமாறன் எச்சரிக்கை...!