திமுக தலைமையிலான மதச்சார்பற்ற முற்போக்குக் கூட்டணியில் தொகுதிப் பங்கீடு தொடர்பாக நிலவி வரும் வதந்திகளுக்கு விடுதலைச் சிறுத்தைகள் கட்சியின் (விசிக) தலைவர் தொல். திருமாவளவன் அவர்கள் முற்றுப்புள்ளி வைத்துள்ளார். அண்ணா அறிவாலயத்தில் முதலமைச்சர் மு.க. ஸ்டாலின் அவர்களைச் சந்தித்து, 8 தொகுதிகளுக்கான ஒப்பந்தத்தில் கையெழுத்திட்ட பிறகு அவர் செய்தியாளர்களிடம் விரிவாகப் பேசினார்.

திமுக கூட்டணியில் விசிக-வுக்கு 8 தொகுதிகள் (6 தனித் தொகுதிகள், 2 பொதுத் தொகுதிகள்) ஒதுக்கப்பட்டுள்ளன. 10 கட்சிகள் உள்ள ஒரு கூட்டணியில், ஒவ்வொரு கட்சியுடனும் தனித்தனியாகப் பேச்சுவார்த்தை நடத்தும்போது காலதாமதம் ஏற்படுவது இயல்பு; இதனை இழுபறி என்று சொல்ல முடியாது, இதுதான் எதார்த்தம் என்று அவர் கூறினார்.

புதுச்சேரியில் விசிக-வுக்கு ஒரு தொகுதி மட்டும் ஒதுக்கப்பட்டதில் உடன்பாடு இல்லாததால், அங்கு தனித்துப் போட்டியிட முடிவு செய்துள்ளதாக அவர் தெரிவித்தார். மேலும், தமிழகத்தைப் போலவே புதுச்சேரியிலும் விசிக-வுக்கு 'பானை' சின்னத்தை ஒதுக்க வேண்டும் எனத் தேர்தல் ஆணையத்திடம் கோரிக்கை வைத்துள்ளதாகக் குறிப்பிட்டார்.

இதையும் படிங்க: அதிமுக பிரிட்ஜ்-ஆ..!! அப்போ நாங்க LED TV..!! மக்களை கவர திமுக போடும் மாஸ்டர் பிளான்..!!

திமுக கூட்டணியில் பிளவு ஏற்படும் என்று காத்துக் கொண்டிருப்பவர்கள் மீண்டும் ஏமாறவே போவதாகவும், தங்களுக்குள் எந்தவிதமான கருத்து வேறுபாடும் இல்லை என்றும் அவர் உறுதியளித்தார். குறைந்த தொகுதிகளைப் பெறுவது குறித்து எங்கள் கட்சியினர்தான் கவலைப்பட வேண்டும், மற்றவர்கள் அல்ல. பாஜக போன்ற மதவாத சக்திகளை வீழ்த்துவதே எங்களின் முதன்மை லட்சியம்; அதற்காகச் சில தியாகங்களைச் செய்யத் தயாராக இருக்கிறோம் என்று அவர் அதிரடியாகத் தெரிவித்தார்.

எந்தெந்தத் தொகுதிகளில் விசிக போட்டியிடும் என்பது குறித்த பட்டியல், மற்ற கூட்டணிக் கட்சிகளுடனான பேச்சுவார்த்தை முடிந்தவுடன் முதலமைச்சர் அவர்களால் அதிகாரப்பூர்வமாக அறிவிக்கப்படும். மார்ச் 24-அன்று தேமுதிக-வுக்கு 10 தொகுதிகள் ஒதுக்கப்பட்ட நிலையில், திமுக கூட்டணி தனது வேட்பாளர் பட்டியலை இறுதி செய்யும் பணிகளில் தீவிரமாக உள்ளது.

இதையும் படிங்க: விருகம்பாக்கம், ரிஷிவந்தியம் தொகுதிகள்.. தேமுதிகவுக்கு NO சொன்ன திமுக..!! அப்செட்டில் பிரேமலதா..!!