பிரபல முன்னணித் திரைப்பட நடிகர் அஜித்குமாரை தீவிர அரசியலுக்குக் கொண்டு வருவதை முதன்மை நோக்கமாகக் கொண்டு தொடங்கப்பட்டுள்ள ‘அனைத்து நண்பர்கள் முன்னேற்றக் கழகம்’ என்ற அமைப்பின் சார்பில், குன்றத்தூர் அருகே நடிகர் அஜித்தின் முழு உருவச் சிலைக்குப் பாலபிஷேகம் மற்றும் ஆரத்தி எடுத்து அவரை அரசியலுக்கு வரும்படி அழைப்பு விடுத்துள்ளது பெரும் பரபரப்பை ஏற்படுத்தியுள்ளது.

நடிகர் அஜித்குமாரை முன்னிறுத்தி அண்மையில் தொடங்கப்பட்ட இந்தக் கட்சியில் அவரது தீவிர ரசிகர்கள் பல்வேறு மாவட்ட, ஒன்றிய மற்றும் நகர நிர்வாகிகளாகவும் உறுப்பினர்களாகவும் இணைந்து செயல்பட்டு வருகின்றனர். இந்நிலையில், சென்னை குன்றத்தூர் அடுத்த தரப்பாக்கம் பகுதியில் அக்கட்சியின் செயற்குழுக் கூட்டம் அதன் தலைவர் பாபு தலைமையில் எழுச்சியுடன் நடைபெற்றது. இக்கூட்டத்தில் தமிழகத்தின் பல்வேறு மாவட்டங்களில் இருந்தும் திரளான நிர்வாகிகள் மற்றும் தொண்டர்கள் கலந்து கொண்டனர்.

நிகழ்ச்சியின் ஒரு பகுதியாக, "எங்கள் முதல்வர் அஜித் குமார்" என்ற வாசகத்துடன் அமைக்கப்பட்டிருந்த நடிகர் அஜித்தின் கம்பீரமான முழு உருவச் சிலையை அக்கட்சியின் தலைவர் பாபு திறந்து வைத்தார். தொடர்ந்து, அஜித்குமார் நேரடியாகத் தீவிர அரசியலில் களமிறங்க வேண்டும் என்பதை வலியுறுத்தும் வகையில் நிர்வாகிகள் அனைவரும் ஒன்றிணைந்து சிலைக்கு மாலை அணிவித்து, ஆரத்தி எடுத்து, மேளதாளங்கள் முழங்கப் பாலபிஷேகம் செய்து வணங்கினர்.

இதையும் படிங்க: நற்பணி இயக்க நிர்வாகிகளை சந்தித்தார் சிவகார்த்திகேயன்! போரூரில் ரசிகர்கள் உற்சாகம்!

செயற்குழுக் கூட்டத்திற்குப் பின்னர் செய்தியாளர்களைச் சந்தித்த அமைப்பின் தலைவர் பாபு, தமிழக மக்களுக்குத் தூய்மையான மற்றும் நேர்மையான தலைமை கிடைக்க வேண்டும் என்றால் அஜித் குமார் அரசியலுக்கு வர வேண்டும் என்பதே தங்களின் நோக்கம் என்றார். மேலும், சென்னை கோவூர் பகுதியில் சுமார் 5,000 சதுர அடி நிலப்பரப்பில் நடிகர் அஜித்குமாருக்கு பிரம்மாண்ட முறையில் தனிக் கோயில் அமைக்கப்பட உள்ளதாகவும், அதற்கான ஆரம்பக்கட்ட பணிகள் விரைவில் தொடங்கப்படும் என்றும் தெரிவித்து அனைவரையும் வியப்பில் ஆழ்த்தினார்.

இதையும் படிங்க: ஜெம் வீரமணி மீது 8-வது போக்சோ வழக்கு: போலீஸ் காவலில் சிறப்பு புலனாய்வு குழு அதிரடி!