திண்டுக்கல் மாவட்டம், பழனிக்குத் தனது மனைவி நடிகை குஷ்பூ, மகள் மற்றும் உறவினர்களுடன் வருகை தந்த சுந்தர் சி, தனியார் விடுதியில் சிறிது நேரம் ஓய்வெடுத்தார். பின்னர், பேட்டரி கார் மூலம் மின் இழுவை ரயில் நிலையத்திற்குச் சென்று, அங்கிருந்து மலைக்கோவிலை அடைந்தார். முருகப்பெருமானுக்கு நடைபெறும் வைதிகாள் அலங்காரத்தில் குடும்பத்துடன் கலந்துகொண்ட அவர், மூலவரைத் தரிசித்தார். இந்த வழிபாட்டின் போது நடிகர் சுந்தர் சி மற்றும் குஷ்பூவுடன் நடிகர் ஜெயம் ரவியின் முன்னாள் மனைவி ஆர்த்தி மற்றும் அவரது தாயார் சுஜாதா ஆகியோரும் கலந்துகொண்டனர்.

சாமி தரிசனத்திற்குப் பிறகு செய்தியாளர்களைச் சந்தித்த சுந்தர் சி கூறியதாவது, எனக்கு பழனிதான் பூர்வீக ஊர். எனது குலதெய்வமான முருகப்பெருமானை வணங்குவதற்கு அடிக்கடி வருவது எனது வழக்கம். அந்த வகையில் இன்று குடும்பத்துடன் வந்துள்ளேன்.

தேர்தலில் எனது வெற்றி வாய்ப்பு மிகவும் பிரகாசமாக (அமோகமாக) உள்ளது. மக்கள் எனக்கு நல்ல ஆதரவை வழங்கியுள்ளனர். வாக்கு எண்ணிக்கை நடைபெறவுள்ள மே 4-ஆம் தேதி மக்களின் தீர்ப்பு என்னவென்று அனைவருக்கும் தெளிவாகத் தெரியும்.

இதையும் படிங்க: கேரளாவில் காங்கிரஸ் கூட்டணி அதிரடி மீட்சி: எக்ஸிட் போல் முடிவுகளில் 'யுடிஎப்' வெற்றி வாய்ப்பு - இடதுசாரிகளுக்குப் பின்னடைவா?

முன்னதாக, கோவில் வெளிப்பிரகாரத்தில் சுந்தர் சி மற்றும் குஷ்பூவை அடையாளம் கண்ட ரசிகர்கள், உற்சாகத்துடன் அவர்களைச் சூழ்ந்துகொண்டு செல்பி எடுத்துக்கொண்டனர். அனைவருக்கும் புன்னகையுடன் ஒத்துழைப்பு வழங்கிய அவர்கள், பின்னர் கோவில் நிர்வாகம் சார்பில் வழங்கப்பட்ட பிரசாதங்களைப் பெற்றுக்கொண்டு விடைபெற்றனர். அதிமுக வேட்பாளராகக் களம் கண்டுள்ள சுந்தர் சி, தேர்தல் முடிவுகள் வெளியாக இன்னும் சில நாட்களே உள்ள நிலையில், தனது குலதெய்வத்தின் அருளை நாடி பழனிக்கு வந்தது அரசியல் மற்றும் திரையுலக வட்டாரத்தில் பேசப்பட்டு வருகிறது.

இதையும் படிங்க: மேற்கு வங்கத் தேர்தல் நிறைவு: 2-ம் கட்டத்தில் 90% வாக்குப்பதிவு! மே 4-ல் வெளியாகிறது இறுதி முடிவு!