தமிழ்நாடு அரசியலில் மீண்டும் ஒரு முக்கிய திருப்பம் ஏற்பட்டுள்ளது. அதிமுகவில் இருந்து விலகிய மூன்று எம்எல்ஏக்கள் தாக்கல் செய்த ராஜினாமா கடிதங்களை சபாநாயகர் ஜே.சி.டி. பிரபாகர் ஏற்றுக்கொண்டதாக அறிவித்துள்ளார். இந்த நிகழ்வு அதிமுகவுக்கு கணிசமான பலவீனத்தை ஏற்படுத்தியுள்ளதோடு, தமிழக வெற்றிக் கழகம் தரப்புக்கு வலுச்சேர்க்கும் வகையில் அமைந்துள்ளது. 

மதுராந்தகம் தொகுதியைச் சேர்ந்த கே. மரகதம் குமரவேல், பெருந்துறை தொகுதியைச் சேர்ந்த எஸ். ஜெயக்குமார் மற்றும் தாராபுரம் தொகுதியைச் சேர்ந்த பி. சத்தியபாமா ஆகிய மூன்று எம்எல்ஏக்களும் அதிமுகவின் கிளர்ச்சி அணியைச் சேர்ந்தவர்கள். இவர்கள் சி.வி. சண்முகம் மற்றும் எஸ்.பி. வேலுமணி தரப்பினருடன் இருந்தவர்கள் எனக் கூறப்படுகிறது. இந்த மூவரும் தமிழ்நாடு சட்டமன்ற சபாநாயகர் ஜே.சி.டி. பிரபாகரை நேரில் சந்தித்து தங்கள் ராஜினாமா கடிதங்களை சமர்ப்பித்தனர். சபாநாயகர் உடனடியாக அந்த ராஜினாமாக்களை ஏற்றுக்கொண்டார். 

இந்த ராஜினாமாக்கள் ஏற்கப்பட்டதன் மூலம் மதுராந்தகம், பெருந்துறை மற்றும் தாராபுரம் தொகுதிகள் காலியாகின. இதனால் அந்த இடங்களுக்கு இடைத்தேர்தல் நடைபெறும் என எதிர்பார்க்கப்படுகிறது. ராஜினாமா ஏற்கப்பட்ட பிறகு இந்த மூன்று எம்எல்ஏக்களும் தவெகவில் இணைந்துள்ளனர். முதல்வர் விஜயை நேரில் சந்தித்து பேசி உள்ளனர். 

இதையும் படிங்க: கரையும் அதிமுக கோட்டை... விஜய் பக்கம் சாயும் எம்எல்ஏக்கள்..! பொன்னாடை போர்த்தி வரவேற்ற ஆதவ் அர்ஜுனா..!

இந்த நிகழ்வு அதிமுகவின் உட்கட்சி பூசலை மேலும் தீவிரப்படுத்தியுள்ளது. 2026 சட்டமன்றத் தேர்தலுக்குப் பிறகு அதிமுகவில் ஏற்பட்ட பிளவு இப்போது தொடர்ந்து ஆழமாகி வருகிறது. எடப்பாடி கே. பழனிசாமி தரப்புக்கும், சண்முகம்-வேலுமணி தரப்புக்கும் இடையேயான மோதல் தொடர்ச்சியாக பல எம்எல்ஏக்களின் விலகலுக்கு வழிவகுத்துள்ளது. முன்பே பல எம்எல்ஏக்கள் கிளர்ச்சியில் ஈடுபட்டு நம்பிக்கை வாக்கெடுப்பின்போது தவெக அரசுக்கு ஆதரவு தெரிவித்திருந்தனர். இப்போது மூன்று பேர் ராஜினாமா செய்துள்ளதால் அதிமுகவின் சட்டமன்ற பலம் மேலும் குறையும் என கூறப்படுகிறது. 

இதையும் படிங்க: #BREAKING: எடப்பாடிக்கு ஷாக்..!! ADMK எம்எல்ஏக்கள் 3 பேர் ராஜினாமா..! அரசியலில் பரபரப்பு..!