திருவண்ணாமலை சட்டமன்றத் தொகுதியில் போட்டியிடும் பாஜக வேட்பாளர் சி. ஏழுமலையை ஆதரித்து, பாமக தலைவர் அன்புமணி ராமதாஸ் இன்று திருவள்ளுவர் சிலை அருகில் தேர்தல் பிரச்சாரம் மேற்கொண்டார். அப்போது, திமுக வேட்பாளரும் அமைச்சருமான எ.வ. வேலுவை கடுமையாகச் சாடிய அவர், இந்தத் தேர்தலில் அவர் டெபாசிட் இழக்க வேண்டும் என்று தொண்டர்களிடையே முழங்கினார்.

பரப்புரையில் அன்புமணி ராமதாஸ் பேசியதாவது: "தமிழகத்தில் பெண்களுக்குப் பாதுகாப்பு வேண்டும் என்றால், பெண்களுக்கு எதிரான இந்த திமுக ஆட்சியை வேரோடு அகற்ற வேண்டும். கொள்ளையடித்த பணத்தை வீடு வீடாகக் கொண்டு வந்து கொடுத்து உங்கள் வாக்குகளை வாங்கத் துடிப்பார்கள். உங்கள் பெண் பிள்ளைகளின் எதிர்காலத்தைக் கருத்தில் கொண்டு, மறந்தும் திமுகவிற்கு வாக்களித்து விடாதீர்கள். தமிழகம் இன்று கஞ்சா மற்றும் போதைப் பொருட்களின் கூடாரமாக மாறியுள்ளது."

அமைச்சர் எ.வ. வேலுவை 'விஞ்ஞானி ஐன்ஸ்டீனை விடப் புத்திசாலி' என்று கிண்டலாக விமர்சித்த அன்புமணி, "விவசாயிகளை குண்டர் சட்டத்தில் சிறையில் அடைத்த இந்த அமைச்சரை திருவண்ணாமலை மக்கள் மன்னிக்க மாட்டார்கள். முதல்வர் ஸ்டாலின் கொடுத்த 19 வாக்குறுதிகளில் ஒன்றைக் கூட இங்கு நிறைவேற்றவில்லை. எ.வ. வேலுவை யார் தோற்கடிப்பார்கள் என்று தெரியாது, ஆனால் திமுக காரர்களே அவரைத் தோற்கடித்து விடுவார்கள்," என்று அதிரடியாகத் தெரிவித்தார்.

இதையும் படிங்க: திருவண்ணாமலை கோவிலில் பாஜக பிரமுகர் அண்ணாமலை சாமி தரிசனம்... மனமுருகி வழிபாடு..!!

மேலும், அண்ணாமலையார் கோயில் அறங்காவலர் குழுவில் உள்ளூர் மக்களுக்கு வாய்ப்பளிக்கப்படாதது மற்றும் மக்களின் விருப்பமின்றி 18 ஊராட்சிகளை மாநகராட்சியுடன் இணைத்தது குறித்தும் அவர் கேள்வி எழுப்பினார். நந்தன் கால்வாய் போன்ற எளிய திட்டங்களைக் கூட நிறைவேற்றத் துப்பில்லாத ஆட்சி இது என்று சாடிய அவர், மத்தியில் பாஜக மற்றும் மாநிலத்தில் அதிமுக ஆட்சி அமைந்தவுடன், எடப்பாடி பழனிசாமி பிரதமரைச் சந்தித்து தமிழகத்திற்கான அனைத்துத் திட்டங்களையும் பெற்றுத் தருவார் என்றும், நிர்வாக வசதிக்காகத் திருவண்ணாமலை மாவட்டம் இரண்டாகப் பிரிக்கப்படும் என்றும் உறுதி அளித்தார்.

இதையும் படிங்க: திமுக தேர்தல் அறிக்கை ஹீரோ இல்ல.. காமெடியன்..!! இது யாருக்கும் பயன்படாத ஆணி..!! அன்புமணி ராமதாஸ் விளாசல்..!!