சென்னை: முன்னாள் தமிழக பா.ஜ., தலைவர் அண்ணாமலை தொடங்கியுள்ள ‘வீ தி லீடர்ஸ்’ அமைப்பை அடுத்தகட்டத்திற்கு கொண்டு செல்லும் நடவடிக்கைகள் தீவிரமடைந்துள்ள நிலையில், பல்வேறு கட்சிகளைச் சேர்ந்த முன்னாள் எம்.எல்.ஏ.,க்கள் மற்றும் முன்னாள் நிர்வாகிகளிடம் அவர் பேச்சு நடத்தி வருவதாக தகவல் வெளியாகியுள்ளது.

பா.ஜ.,வில் இருந்து விலகிய அண்ணாமலை கடந்த ஜூன் மாதம் ‘வீ தி லீடர்ஸ்’ என்ற புதிய இயக்கத்தை தொடங்கினார். போதைப்பொருள் எதிர்ப்பு, சுற்றுச்சூழல் பாதுகாப்பு உள்ளிட்ட சமூகப் பிரச்னைகளை மையமாகக் கொண்டு இந்த அமைப்பு சார்பில் பல்வேறு நிகழ்ச்சிகள் நடத்தப்பட்டு வருகின்றன. அமைப்பில் 20 லட்சத்துக்கும் அதிகமானோர் பதிவு செய்துள்ளதாக அதன் அதிகாரப்பூர்வ தளம் தெரிவிக்கிறது.

மேலும், ‘வீ தி லீடர்ஸ்’ எதிர்காலத்தில் அரசியல் கட்சியாக மாறும் என்று அண்ணாமலை ஏற்கனவே தெரிவித்துள்ளார். அடுத்த சட்டப்பேரவைத் தேர்தலை நோக்கி அமைப்பை வலுப்படுத்தும் வகையில், சரியான எண்ணிக்கையிலான உறுப்பினர்களையும் தலைவர்களையும் உருவாக்குவது அவசியம் என்றும் அவர் கூறியுள்ளார்.

இதையும் படிங்க: யாராக இருந்தாலும் சட்டத்தின் முன் நிறுத்துங்கள்! நிறைய பணம் கைமாறி இருக்கு! GEM வீரமணி வழக்கில் அண்ணாமலை அதிரடி!

இந்த சூழலில், கடந்த காலங்களில் அண்ணாமலையுடன் இணைந்து பா.ஜ.,வில் செயல்பட்ட முன்னாள் எம்.எல்.ஏ.,க்கள் சிலருடன் தற்போது மீண்டும் பேச்சுவார்த்தை நடத்தப்படுவதாக ‘வீ தி லீடர்ஸ்’ வட்டாரங்கள் தெரிவித்ததாக தகவல் வெளியாகியுள்ளது.

அதன்படி, அதிமுக, திமுக உள்ளிட்ட கட்சிகளைச் சேர்ந்த முன்னாள் எம்.எல்.ஏ.,க்கள் மற்றும் முன்னாள் நிர்வாகிகளில் மக்கள் செல்வாக்கு உள்ளவர்களை அமைப்பில் இணைக்கும் முயற்சி நடைபெறுவதாக கூறப்படுகிறது. குறிப்பாக பெரிய அளவிலான சர்ச்சைகளில் சிக்காதவர்கள் மற்றும் உள்ளூர் அளவில் செல்வாக்கு கொண்டவர்களுக்கு முக்கியத்துவம் அளிக்கப்படலாம் என்றும் அந்த வட்டாரங்கள் தெரிவித்துள்ளன.

அண்ணாமலை பா.ஜ., தமிழக தலைவராக இருந்த காலகட்டத்தில் பல்வேறு கட்சிகளைச் சேர்ந்த முன்னாள் எம்.எல்.ஏ.,க்கள் பா.ஜ.,வில் இணைந்திருந்தனர். அவர்களில் சிலருடன் தற்போது மீண்டும் தொடர்பு ஏற்படுத்த முயற்சி நடப்பதாக கூறப்படுகிறது. இந்த தகவலுக்கு சம்பந்தப்பட்ட முன்னாள் எம்.எல்.ஏ.,க்கள் தரப்பில் இதுவரை அதிகாரப்பூர்வமான உறுதிப்படுத்தல் வெளியாகவில்லை.

‘வீ தி லீடர்ஸ்’ அமைப்பு கொங்கு மண்டலத்தில் ஒப்பீட்டளவில் வலுவாக இருப்பதாகவும், தென் மாவட்டங்களில் அமைப்பை விரிவுபடுத்த வேண்டிய தேவை இருப்பதாகவும் அந்த வட்டாரங்கள் கூறுகின்றன. இதனால் தென் மாவட்டங்களைச் சேர்ந்த முன்னாள் எம்.எல்.ஏ.,க்கள் மற்றும் முக்கிய உள்ளூர் நிர்வாகிகளுக்கு அதிக முக்கியத்துவம் அளிக்கப்படலாம் என தகவல் வெளியாகியுள்ளது.

அமைப்பில் இணையும் முக்கிய நபர்களுக்கு மாநில அளவிலான பொறுப்புகள் வழங்கப்படலாம் என்றும் கூறப்படுகிறது. இதற்கிடையே, ‘வீ தி லீடர்ஸ்’ அமைப்பை அரசியல் கட்சியாக மாற்றுவதற்கான அடுத்தகட்ட நடவடிக்கைகள் எப்போது தொடங்கும் என்பதும் தமிழக அரசியல் வட்டாரங்களில் கவனம் பெற்றுள்ளது.

இதையும் படிங்க: சிறார்களை காப்பாற்ற தவறியது யார்.? வீரமணி மட்டும் தானா.? பாலியல் வழக்கில் அண்ணாமலை சரமாரி கேள்வி..!!